ក្នុងកម្មវិធីចូលរួមសម័យប្រជុំលើកទី ១៩ របស់អង្គការយូណេស្កូ នៅរដ្ឋធានី Asuncion ប្រទេសប៉ារ៉ាហ្គាយ គណៈប្រតិភូខេត្តអានយ៉ាង ដឹកនាំដោយសមមិត្ត ឡេហុងក្វាង សមាជិកគណៈកម្មាធិការមជ្ឈិមបក្ស លេខាបក្ខភាគខេត្ត បានជួបជាមួយលោកស្រី Maria del Carmen Pérez Falabella កុងស៊ុលកិត្តិយសវៀតណាមប្រចាំនៅប៉ារ៉ាហ្គាយ។ កិច្ចជំនួបនេះបានប្រព្រឹត្តទៅក្នុងបរិយាកាសជាដៃគូសហប្រតិបត្តិការ និងជំរុញការផ្លាស់ប្តូរអន្តរជាតិ។
អញ្ជើញចូលរួមកិច្ចប្រជុំក៏មានលោកស្រី ង្វៀនធីវ៉ានអាញ - ឯកអគ្គរដ្ឋទូត ប្រធានគណៈប្រតិភូវៀតណាមប្រចាំនៅ UNESCO។ លោកស្រី ឡេធីហុងវ៉ាន ប្រធាននាយកដ្ឋានការទូតវប្បធម៌ និងយូណេស្កូ អគ្គលេខាធិការគណៈកម្មាធិការជាតិវៀតណាមទទួលបន្ទុកយូណេស្កូនិងក្រសួងការបរទេស។
លោកស្រី Maria del Carmen Pérez Falabella បានស្វាគមន៍គណៈប្រតិភូខេត្តអានយ៉ាង ទៅកាន់ប្រទេសប៉ារ៉ាហ្គាយ ដើម្បីចូលរួមសម័យប្រជុំលើកទី ១៩ របស់អង្គការ UNESCO ហើយបានសម្តែងការកោតសរសើរចំពោះកិច្ចខិតខំប្រឹងប្រែងសហប្រតិបត្តិការពីភាគីខេត្តអានយ៉ាង ក្នុងការបំពេញឯកសារដាក់ជូនអង្គការ UNESCO ឲ្យទទួលស្គាល់ពិធីបុណ្យលោកយាយភ្នំស្វាម គឺជាបេតិកភណ្ឌវប្បធម៌អរូបីនៃមនុស្សជាតិ ទន្ទឹមនិងនោះប្តេជ្ញាគាំទ្រផ្សព្វផ្សាយរូបភាពវៀតណាមនិយាយរួម និងខេត្តអានយ៉ាងនិយាយដោយឡែក ទៅដល់ប្រជាជនប៉ារ៉ាហ្គាយ។
តាងនាមគណប្រតិភូ សមមិត្ត ឡេហុងក្វាង លេខាបក្ខភាគខេត្តអានយ៉ាង បានថ្លែងអំណរគុណចំពោះលោកស្រី Falabella ចំពោះការរួមចំណែកយ៉ាងសំខាន់ក្នុងការតភ្ជាប់ ជួយឲ្យភាគីទាំងពីរយល់កាន់តែស៊ីជម្រៅអំពីវប្បធម៌ សេដ្ឋកិច្ច និងសក្តានុពលសហប្រតិបត្តិការអភិវឌ្ឍន៍។ ហើយទោះបីជាមានភាពមមាញឹកយ៉ាងណាក៏ដោយ លោកស្រីនៅតែចំណាយពេលវេលាសម្រាប់គណៈប្រតិភូខេត្តអានយ៉ាង ជួបសំណេះសំណាលយ៉ាងស្និទ្ធស្នាល ប្រការនេះកាន់តែបញ្ជាក់អំពីតួនាទីជាស្ពានតភ្ជាប់រវាងវៀតណាម និងប៉ារ៉ាហ្គាយ ក៏ដូចជាតំណាងគាំទ្រ និងការពារពលរដ្ឋវៀតណាមនៅទីនេះ។ សមមិត្ត ឡេហុងក្វាង ឡេខាបក្ខភាគខេត្តក៏បានឧទ្ទេសនាមអំពី លក្ខណៈវប្បធម៌ និងភាពខ្លាំងក្នុងមូលដ្ឋានរបស់ខេត្តអានយ៉ាង រួមទាំងពិធីបុណ្យលោកយាយភ្នំស្វាម ដែលកំពុងស្នើទៅអង្គការ UNESCO ឲ្យទទួលស្គាល់ជាបេតិកភណ្ឌវប្បធម៌អរូបីតំណាងឲ្យមនុស្សជាតិផងដែរ។
លោកស្រី Maria del Carmen Perez គឺជាសកម្មជនវប្បធម៌ និងជាអ្នកជំនួញម្នាក់ដ៏មានកិត្យានុភាពនៅប្រទេសប៉ារ៉ាហ្គាយ ធ្លាប់កាន់មុខតំណែងសំខាន់ៗជាច្រើននៅក្នុងរដ្ឋាភិបាល និងមានទំនាក់ទំនងយ៉ាងទូលំទូលាយជាមួយមជ្ឈដ្ឋាននយោបាយ និងអាជីវកម្ម។ លោកស្រី Maria del Carmen មានមនោសញ្ចេតនាយ៉ាងខ្លាំងចំពោះប្រទេសវៀតណាម ហើយបានទទួលជាកុងស៊ុលកិត្តិយសរបស់វៀតណាមប្រចាំនៅប្រទេសប៉ារ៉ាហ្គាយនៅថ្ងៃទី ១៧ ខែមករា ឆ្នាំ ២០២១។
ក្នុងបរិយាកាសស្និទ្ធស្នាល សមមិត្ត ឡេហុងក្វាង លេខាបក្ខភាគខេត្ត បានជូនអំណោយដល់លោកស្រី Falabella ប្រកបដោយអត្ថន័យ បង្ហាញពីអារម្មណ៍ដ៏ល្អរបស់ខេត្តអានយ៉ាង មានចំពោះលោកស្រី៕
ប្រែ៖ ណារីពៅ
