រសៀលថ្ងៃទី១៤ ខែកក្កដា នៅការិយាល័យរដ្ឋបាលខេត្តកំពង់ស្ពឺ ព្រះរាជាណាចក្រកម្ពុជា គណៈទទួលបន្ទុកពិសេសខេត្តអានយ៉ាង (វៀតណាម) និងគណៈទទួលបន្ទុកពិសេសខេត្តកំពង់ស្ពឺ (ព្រះរាជាណាចក្រកម្ពុជា) បានរៀបចំពិធីចុះហត្ថលេខាលើកំណត់ហេតុប្រគល់ និងទទួលអដ្ឋិធាតុយុទ្ធជនពលីនៃកងទ័ពស្ម័គ្រចិត្ត និងអ្នកជំនាញវៀតណាម ដែលបានពលីជីវិតក្នុងសម័យសង្គ្រាម ហើយបានក្រុម កា៩៣ ស្វែងរក និងប្រមូលក្នុងដំណាក់កាល២៥ (រដូវប្រាំង ឆ្នាំ២០២៥–២០២៦)។
គណៈប្រតិភូនៃគណៈទទួលបន្ទុកពិសេសខេត្តអានយ៉ាង ដឹកនាំដោយលោក ឡេ វ៉ាន់ ភឿក អនុប្រធានគណៈកម្មាធិការប្រជាជនខេត្ត និងជាប្រធានគណៈទទួលបន្ទុកពិសេសខេត្ត។ ភាគីខេត្តកំពង់ស្ពឺ ដឹកនាំដោយឯកឧត្តម តូច ប៉ូលីវ៉ា អភិបាលរងខេត្ត និងជាប្រធានគណៈទទួលបន្ទុកពិសេសខេត្តកំពង់ស្ពឺបានអញ្ជើញជាអធិបតីក្នុងពិធី។
តាមរបាយការណ៍របស់មេបញ្ជាការក្រុម កា៩៣ បានឲ្យដឹងថា ក្នុងលក្ខណៈដែលសង្គ្រាមបានកន្លងផុតទៅជាយូរឆ្នាំដូច្នេះប្រភពព័ត៌មានអំពីផ្នូរយុទ្ធជនពលីកាន់តែតិចទៅៗ ទោះបីភូមិសាស្ត្រ និងស្ថានភាពដីធ្លីមានការផ្លាស់ប្តូរជាច្រើន ហើយអាកាសធាតុរដូវប្រាំងក្តៅហួតហែងក៏ដោយ ក៏កម្មាភិបាលនិងយុទ្ធជននៃអង្គភាពនៅតែខិតខំច្បាមជាប់ភូមិសាស្ត្រដើម្បីបំពេញភារកិច្ច ដោយស្រាវជ្រាវប្រភពព័ត៌មានចំនួន ៣៥ ជីករុករកដោយដៃនៅ ៤២ ទីតាំង ជាមួយបរិមាណដីជាង ៣២.២០០ ម៉ែត្រគូប។ លទ្ធផល ក្រុមប្រមូលអដ្ឋិធាតុយុទ្ធជនពលីបានចំនួន ៨១ អដ្ឋិធាតុ ដែលសុទ្ធតែមិនទាន់អាចកំណត់អត្តសញ្ញាណបានទាំងអស់។ លទ្ឋផលនេះបានបង្កើនអដ្ឋិធាតុយុទ្ធជនពលីដែលក្រុមកា៩៣ បានស្វែងរក និងប្រមូលអដ្ឋិធាតុយុទ្ធជនពលីនៅលើទឹកដីខេត្តកំពង់ស្ពឺគិតចាប់តាំងពីឆ្នាំ២០០១ មកដល់បច្ចុប្បន្ន ឡើងដល់ ១.៣៨៨ អដ្ឋិធាតុ។
មិនត្រឹមតែសម្រេចបានជោគជ័យភារកិច្ចស្វែងរក និងប្រមូលអដ្ឋិធាតុទេ ក្នុងអំឡុងពេលបំពេញភារកិច្ចនៅកម្ពុជា ក្រុម កា៩៣ ក៏បានអនុវត្តការងារទំនាក់ទំនងយោធា និងការងារប្រជាជនបានល្អប្រសើផងដែរ ដូចជា ពិនិត្យ ព្យាបាលជំងឺ និងចែកថ្នាំដោយឥតគិតថ្លៃជូនប្រជាពលរដ្ឋ សួរសុខទុក្ខ និងជូនអំណោយដល់អាជ្ញាធរ កងកម្លាំងប្រដាប់អាវុធ និងប្រជាពលរដ្ឋក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ចូលឆ្នាំប្រពៃណីខ្មែរ ឆ្នាំ២០២៦។ សកម្មភាពទាំងនេះបានរួមចំណែកបង្កើនការផ្សារភ្ជាប់ និងការជឿទុកចិត្តរវាងកម្លាំងបំពេញភារកិច្ចជាមួយអាជ្ញាធរ និងប្រជាពលរដ្ឋខេត្តកំពង់ស្ពឺ ដែលបានបង្កលក្ខណៈងាយស្រួលក្នុងការស្វែងរក និងប្រមូលអដ្ឋិធាតុយុទ្ធជនពលី។
នៅក្នុងពិធីនេះ គណៈទទួលបន្ទុកពិសេសខេត្តកំពង់ស្ពឺ បានចុះហត្ថលេខាលើកំណត់ហេតុនិងប្រគល់អដ្ឋិធាតុយុទ្ធជនពលីនៃកងទ័ពស្ម័គ្រចិត្ត និងអ្នកជំនាញវៀតណាមចំនួន ៨១ អដ្ឋិធាតុ ជូនគណៈទទួលបន្ទុកពិសេសខេត្តអានយ៉ាង ដើម្បីនាំត្រឡប់ទៅប្រទេសវៀតណាមវិញ រៀបចំពិធីគោរពវិញ្ញាណក្ខន្ធ និងបញ្ចុះសពតាមបទប្បញ្ញត្តិ។
ថ្លែងមតិនៅពិធី លោក ឡេ វ៉ាន់ ភឿក បានកោតសរសើរ និងវាយតម្លៃខ្ពស់ចំពោះស្មារតីទទួលខុសត្រូវ និងការខិតខំប្រឹងប្រែងរបស់កម្មាភិបាល និងយុទ្ធជនក្រុម កា៩៣។ ទន្ទឹមនិងនោះ ថ្លែងអំណរគុណយ៉ាងគោរពចំពោះគណៈទទួលបន្ទូកពិសេស អាជ្ញាធរ កងកម្លាំងប្រដាប់អាវុធ និងប្រជាពលរដ្ឋខេត្តកំពង់ស្ពឺ ដែលតែងតែសហការ ផ្តល់ព័ត៌មាន និងគាំទ្រដល់អង្គភាពក្នុងការបំពេញភារកិច្ច។ សមមិត្តក៏បានសម្តែងក្តីសង្ឃឹមថា ភាគីកម្ពុជានឹងបន្តផ្តល់ការគាំទ្រ និងបង្កលក្ខណៈឲ្យក្រុម កា៩៣ ក្នុងការអនុវត្តមានប្រសិទ្ធភាពនូវ យុទ្ធនាការកំពូល ៥០០ ថ្ងៃយប់ស្វែងរក ប្រមូលអដ្ឋិធាតុយុទ្ធជនពលី និងនាំយកយុទ្ធជនពលីជាច្រើនទៀតត្រឡប់មកមាតុភូមិវិញ។
ឯកឧត្តម តូច ប៉ូលីវ៉ា អភិបាលរងខេត្ត និងជាប្រធានគណៈទទួលបន្ទុកពិសេសខេត្តកំពង់ស្ពឺ បានវាយតម្លៃខ្ពស់ចំពោះស្មារតីទទួលខុសត្រូវ និងឆន្ទះតស៊ូអត់ធ្មត់របស់ក្រុម កា៩៣ ក្នុងការបំពេញភារកិច្ចនៅលើទឹកដីខេត្តកំពង់ស្ពឺ។ ឯកឧត្តមបានបញ្ជាក់ថា ខេត្តកំពង់ស្ពឺនឹងបន្តសហការយ៉ាងជិតស្និទ្ធ និងបង្កលក្ខណៈងាយស្រួលដើម្បីអង្គភាពសម្រេចបានជោគជ័យនូវភារកិច្ចស្វែងរក និងប្រមូលអដ្ឋិធាតុយុទ្ធជនពលីដែលនៅសេសសល់ រួមចំណែកថែរក្សា និងពង្រីកចំណងមិត្តភាព សាមគ្គីភាព និងកិច្ចសហប្រតិបត្តិការប្រពៃណីរវាងកម្ពុជា និងវៀតណាម។
ប្រែ៖ ណារីពៅ
