ក្នុងដំណើរនោះ គណៈប្រតិភូបានសិក្សាស្រាវជ្រាវជាក់​ស្តែង​​នៅតាមគោលដៅគំរូរបស់ខេត្តមួយចំនួនដូចជា៖ តំបន់​ទេសចរណ៍ជាតិភ្នំស្វាម ព្រៃស្មាច់ត្រាសឺ តំបន់​ទេស​ចរណ៍ថាមពលពន្លឺព្រះអាទិត្យអានហាវជាដើម។ ទន្ទឹម​និងនោះ គណៈប្រតិភូក៏បានវាយតម្លៃ​សមត្ថ​ភាព​​កន្លែង​ស្នាក់នៅ និងសេវាកម្មទេសចរណ៍ថ្មីៗ​នៅ​លើ​ភូមិ​សាស្ត្រផងដែរ។​

នៅកន្លែងឈប់សម្រាកនីមួយៗ សមាជិកក្រុមមិនត្រឹមតែកត់ត្រាទទួលស្គាល់នូវតម្លៃទេសភាពធម្មជាតិដ៏​ល្អប្លែករបស់តំបន់ភ្នំប្រាំពីរប៉ុណ្ណោះទេ ប៉ុន្តែថែមទាំងទទួលបានបទពិសោធន៍ដោយផ្ទាល់ពីផលិត​​ផលពិសេសៗ និងស្វែងយល់សិក្សា​យ៉ាងស៊ី​ជម្រៅអំពីជីវភាពវប្បធម៌របស់ជនជាតិដើមភាគតិចផងដែរ។​

បន្ទាប់ពីសិក្សាស្រាវជ្រាវ តំណាងក្រុមហ៊ុន​ទេស​ចរ​ណ៍​អន្តរជាតិជាច្រើនបានវាយតម្លៃខ្ពស់ចំពោះសក្តានុពលរបស់​អានយ៉ាង ក្នុងការអភិវឌ្ឍទេសចរណ៍ធម្មជាតិ ទេស​​ចរណ៍វប្បធម៌-ជំនឿ ទេសចរណ៍សហគមន៍ និង​ទេស​ចរណ៍តាមព្រំដែន។ ជាពិសេស ការរួមផ្សំ នៃ​ធន​ធានធម្មជាតិដ៏សម្បូរបែបជាមួយនិងអត្តសញ្ញាណវប្បធម៌​សម្បូបែបរបស់ជនជាតិទាំងបួន គិញ - ចិន - ចាម - ខ្មែរ និងម្ហូបពិសេសបានចាត់ទុកជា "គន្លឹះ" ដើម្បី​ខេត្ត​អាន​យ៉ាងទាក់ទាញភ្ញៀវអន្តរជាតិនាពេលខាងមុខ។

លោក ង្វៀនវៀតអាញ់ នាយករងមជ្ឈម​ណ្ឌល​ជំរុញ​វិនិ​យោគ​ ពាណិជ្ជកម្ម និងទេសចរណ៍ខេត្តអានយ៉ាង បាន​ឲ្យ​ដឹង​ថា មូលដ្ឋានកំពុងផ្តោតលើការលើកកម្ពស់​គុណ​ភាព​សេវាកម្ម បង្កើនការតភ្ជាប់ជាមួយធុរកិច្ចអន្តរជាតិ និង​ពង្រីកការឃោសនាគោលដៅ។ កម្មវិធី Famtrip លើក​នេះគឺជាសកម្មភាពផ្សព្វផ្សាយដ៏សំខាន់មួយ ដើ​ម្បី​​ផ្សព្វផ្សាយរូបភាពទេសចរណ៍អានយ៉ាង បន្ទាប់​ពី​រ​ដូវ​កាល​ពិធីបុណ្យទាន និងឆ្ពោះទៅដល់​រដូវកំ​ពូល​នៅ​ចុង​ឆ្នាំ​។

តាមរយៈសកម្មភាពនេះ បណ្តាសញ្ញាវិជ្ជមានបានកត់​ត្រាទទួលស្គាល់នៅពេលដែលក្រុមហ៊ុនទេសចរណ៍ជាច្រើនបង្ហាញពីបំណងចង់សហការក្នុងការកសាងផលិត​ផលដំណើរទេសចរណ៍ថ្មី គំនិតច្នៃប្រឌិតតភ្ជាប់ផ្លូវ​ទេស​ចរណ៍​អានយ៉ាង ជាមួយទីក្រុង Kuala Lumpur (ម៉ា​ឡេស៊ី) តាមរយៈការសហការរវាងផ្លូវគោក និង​ផ្លូវ​អា​កាស​អន្តរតំបន់។ នេះ​​បានសង្ឃឹម​ថា​ជា​ជំហាន​ដំបូង​មាន​​អំណោយផល បើក​ឱកាស​នាំ​ទេសចរណ៍​អាន​យ៉ាង​ទៅ​កាន់​ទីផ្សារ​អន្តរជាតិ​កាន់តែ​ទូលំទូលាយ៕

ប្រែ៖ សំណាង