ដើម្បីជំរុញវិស័យទេសចរណ៍ និងការប្រើប្រាស់ ដើម្បីរួមចំណែកក្នុងការអនុវត្តគោលដៅកំណើនសេដ្ឋកិច្ចពីរខ្ទង់ មជ្ឈមណ្ឌលជំរុញវិនិយោគ ពាណិជ្ជកម្ម និងទេសចរណ៍ខេត្តអានយ៉ាង នឹងរៀបចំពិធីបុណ្យទេសចរណ៍ និងម្ហូបអាហាររ៉ាច់យ៉ា លើកទី ២ រួមបញ្ចូលនឹងផ្សារណាត់ជំរុញពាណិជ្ជកម្ម និងពិព័រណ៍ផលិតផល OCOP ក្នុងឆ្នាំ ២០២៦។
ព្រឹត្តិការណ៍នេះនឹងប្រព្រឹត្តទៅចាប់ពីថ្ងៃទី ២២ ខែឧសភា ដល់ថ្ងៃទី ៣១ ខែឧសភា ឆ្នាំ ២០២៦ នៅទីលាន ត្រាន់ ក្វាង ខៃ សង្កាត់រ៉ាច់យ៉ា ខេត្ត អានយ៉ាង។ នេះគឺជាសកម្មភាពសំខាន់ៗមួយនៅក្នុងខ្សែសង្វាក់ព្រឹត្តិការណ៍ជំរុញផ្សព្វផ្សាយឆ្នាំ ២០២៦ ដែលសន្យាថានឹងក្លាយជាគោលដៅដ៏ទាក់ទាញសម្រាប់ប្រជាជនក្នុងមូលដ្ឋាននិងភ្ញៀវទេសចរមកពីគ្រប់ទិសទី។
ជាមួយនឹងទ្រង់ទ្រាយតាមការសន្និដ្ឋានមានស្តង់តាំងពិព័រណ៍ចំនួនពី ៣០០ ទៅ ៤០០ ស្តង់ ផ្សារណាត់នេះបានរចនាឡើងជាមួយនឹងតំបន់ចម្រុះ និងឯកទេស។ ចំណុចលេចធ្លោនៃព្រឹត្តិការណ៍នេះគឺស្តង់តាំងពិព័រណ៍ទេសចរណ៍ ដែលបង្ហាញពីដំណើរកម្សាន្តដើម្បីសស្វែងយល់អំពីទឹកដីនៃខេត្តអានយ៉ាង។ ទន្ទឹមនិងនោះ តំបន់ដាក់តាំងបង្ហាញផលិតផលOCOP និងមុខម្ហូបពិសេសក្នុងស្រុកនឹងក្លាយជាកន្លែងប្រមូលផ្តុំនៃផលិតផលគុណភាពខ្ពស់ដែលពោពេញទៅដោយអត្តសញ្ញាណប្រពៃណី។ជាពិសេស តំបន់អាហារដែលមានមុខម្ហូបក្នុងស្រុកប្លែកៗ និងបែបជនបទ នឹងផ្តល់នូវបទពិសោធន៍រស់ជាតិដែលមិនអាចបំភ្លេចបានសម្រាប់ភ្ញៀវ។
កម្មវិធីនេះមានអត្ថន័យជាយុទ្ធសាស្ត្រក្នុងការអនុវត្តកម្មវិធីជំរុញទេសចរណ៍ និងប្រើប្រាស់របស់ខេត្ត។ តាមរយៈនេះ បានបង្កើតជាកម្លាំងចលករដ៏រឹងមាំមួយដើម្បីជំរុញអត្រាកំណើនសេដ្ឋកិច្ចរបស់ខេត្តអានយ៉ាងឲ្យសម្រេចបានកម្រិតលើសពីពីរខ្ទង់នៅឆ្នាំ ២០២៦។ ព្រឹត្តិការណ៍នេះក៏ជាស្ពានដ៏សំខាន់មួយដើម្បីពង្រឹងកិច្ចសហប្រតិបត្តិការ និងពង្រីកការផ្លាស់ប្តូរសេដ្ឋកិច្ចរវាងខេត្តអានយ៉ាង ជាមួយខេត្តក្រុងនានាក្នុងប្រទេសទាំងមូលផងដែរ។ នេះគឺជាឱកាសមួយសម្រាប់សាជីវកម្ម និងអង្គភាពផ្តល់សេវាកម្មទេសចរណ៍និងពាណិជ្ជកម្មនៅក្នុងខេត្តមានឱកាសជួបជុំ ផ្លាស់ប្តូរបទពិសោធន៍ និងណែនាំផលិតផល និងសេវាកម្មរបស់ពួកគេដោយផ្ទាល់ដល់ដៃគូ អ្នកចែកចាយ និងភ្ញៀវទេសចរក្នុងនិងក្រៅប្រទេស៕
ប្រែ៖ ណារីពៅ
