ព្រឹកថ្ងៃទី ៥ ខែធ្នូ នៅទីសក្ការៈបូជាអាទិទេពសមុទ្ទខាងត្បូងឡៃសឺន មន្ទីរវប្បធម៌ និងកីឡាខេត្តអានយ៉ាង បានសហការជាមួយគណៈកម្មាធិការប្រជាជនតំបន់ពិសេសគៀនហៃ រៀបចំពិធីបូជាអាទិទេព ដោយមានការចូលរួមពីប្រជាជននិងអ្នកទេសចរយ៉ាងច្រើនកុះករ។
អ្នកស្រុកតំបន់សមុទ្ទជឿថា ត្រីពិន្ទងបានចាប់កំណើតពីអាទិពេទនៃសមុទ្ទខាងត្បូង ដែលជាអាទិពេទមានចិត្តសប្បុរស តែងតែជួយដល់អ្នកនេសាទឆ្លងផុតពីគ្រោះព្យុះ ខ្យល់កន្ត្រាក់ និងជួយសង្គ្រោះមនុស្សដែលជួបគ្រោះអាសន្ននៅឯនាយសមុទ្ទ។
នៅពេលដែលត្រីពិន្ទងជួប “ទុក្ខ” បានអណ្តែតមកដល់ច្រាំង ប្រជាជនបានរៀបចំពិធីបុណ្យសព បញ្ចុះសព និងសង់ទីសក្ការៈបូជាដោយការគោរព ហើយទីនេះក៏ជាកន្លែងសម្រាប់ប្រជាជនប្រជុំជីវភាពវប្បធម៌ ដើម្បីភ្ជាប់ចំណងមិត្តភាពសហគមន៍ រម្លឹកដល់បុព្វបុរសដែលបានរួមចំណែកក្នុងការការពារសមុទ្ទ និងកោះ។
យោងតាមជំនឿរបស់ប្រជាជន អាទិទេពសមុទ្ទខាងត្បូងគឺជាអាទិទេពមួយអង្គដែលតែងតែប្រោះព្រំដល់អ្នកនេសាទក្នុងការធ្វើដំណើរដោយសុវត្ថិភាព នេសាទត្រីបានពេញឃ្លុប មានជីវភាពថ្កុំថ្កើង និងសុភមង្គល។ ពិធីបូជាអាទិទេពគឺជាឱកាសមួយដើម្បីថែរក្សា និងពង្រីកប្រពៃណីវប្បធម៌ដ៏ពិសេសរបស់ប្រជាជននៅតំបន់សមុទ្ទកោះគៀនហៃ ទន្ទឹមនិងនោះក៏អធិស្ឋានសូមឲ្យប្រទេសសន្តិភាពនិងប្រជាជនសុខសាន្ត។
លោក ទ្រឿង វ៉ាន់ឌឿក អនុប្រធានគណៈគ្រប់គ្រងកេរដំណែលប្រវត្តិសាស្ត្រ និងវប្បធម៌ទីសក្ការៈបូជាអាទិទេពសមុទ្ទខាងត្បូងបានមានប្រសាសន៍ថា ពិធីបូជាអាទិទេព គឺជាពិធីដ៏សំខាន់មួយនៅទីសក្ការៈបូជាអាទិទេពសមុទ្ទខាងត្បូងឡៃសឺន។ កម្មវិធីចាប់ផ្តើមដោយសំឡេងទូងស្គរ ប្រកាសជាសញ្ញាថាដល់ពេលវេលាដ៏ពិសិដ្ឋនៃពិធីបុណ្យ។ បន្ទាប់មកគឺការសម្តែងរបាំថ្វាយអាទិទេពសមុទ្ទខាងត្បូង។
បន្ទាប់ពីការអានសុន្ទរកថាសរសើរ ដែលធ្វើឡើងដោយបូជាចារ្យជាន់ខ្ពស់ ពិធីគោរពបូជាចារ្យនៅទីសក្ការៈបូជាអាទិទេពសមុទ្ទខាងត្បូងឡៃសឺនបានចាប់ផ្តើមដំណើរការ បណ្តាអាជ្ញាធរតំបន់ពិសេស ប្រជាជន និងអ្នកទេសចរបានអុជធូបថ្វាយអាទិទេពសមុទ្ទខាងត្បូង និងឧទ្ទិសផលបុណ្យដល់បុព្វបុរសនិងបុព្វការីជន ដែលមានគុណបង្កើតនិងកសាងភូមិសិប្បកម្មកោះឡៃសឺន។
ពិធីដង្ហែរព្រះអាទិទេពបានធ្វើឡើងយ៉ាងឱឡារិក និងថ្លៃថ្នូរ ដឹកនាំដោយក្រុមរាំមុងសាយតោនិងនាគ បន្ទាប់មកសិស្សានុសិស្ស កងទ័ពស្ម័គ្រចិត្ត ក្រុមសិស្សបម្រើពិធីបុណ្យ គណៈបូជាចារ្យ គ្រែស្នែងអាទិទេព ព្រឹទ្ធាចារ្យ ថ្នាក់ដឹកនាំអាជ្ញាធរមូលដ្ឋាន ប្រជាជន និងអ្នកទេសចរ។
នៅកំពង់ផែងិនអុង គ្រែស្នែងបានដង្ហែឡើងលើទូកទទួល ដឹកនាំទូកក្បួនគឺអ្នកនេសាទយ៉ាងច្រើនកុះក។ ពេលទៅដល់ទីតាំងសែនអាទិទេពនៅឯនាយសមុទ្ទ បូជាចារ្យនឹងថ្វាយយញ្ញបូជា និងសូត្រធម៌បួងសួងតាមប្រពៃណីសុំសន្តិភាព។ របៀបវារៈបណ្តែតផ្កា និងបណ្តែតគ្រឿងបូជាចូលទៅក្នុងសមុទ្ទ គឺជានិមិត្តរូបនៃការអធិស្ឋានសុំសន្តិភាព និងការប្រមូលផលដ៏បរិបូរណ៍។ ទូកនេសាទរាប់សិបគ្រឿងរបស់អ្នកនេសាទមកពីឡៃសឺន និងតំបន់ជុំវិញចូលរួមក្នុងក្បួនដង្ហែរស្វាគមន៍អាទិទេព។
ពិធីបូជាអាទិពេទសមុទ្ទមានភាពប្លែកពិសេសដោយសារតែពិធីដង្ហែរអាទិទេពចេញទៅសមុទ្ទ ដោយមានការចូលរួមពីទូកកប៉ាលដែលតុបតែងដោយទង់ជាតិដែលមានពណ៌ទាក់ទាញភ្នែក រួមជាមួយនឹងគ្រឿងបូជាដែលបង្ហាញពីសេចក្តីប្រាថ្នាសម្រាប់ការអធិដ្ឋានសូមសន្តិភាព អាកាសធាតុអំណោយផល និងប្រមូលផលបង្កង បង្គា និងត្រីពេញឃ្លុប។
នេះជាជំនឿប្រជាប្រិយដ៏ពិសេសមួយរបស់អ្នកនេសាទ ដោយរួមបញ្ចូលគ្នានូវធាតុផ្សំខាងវិញ្ញាណ និងវប្បធម៌ប្រពៃណី ដែលទាក់ទាញទាំងអ្នកស្រុក និងអ្នកទេសចរ។ នេះជាលើកដំបូងហើយ ដែលបង ង្វៀនទ្វីនហៃ បានចូលរួមពិធីដង្ហែរអទិទេពនៅលើកោះឡៃសឺន បងជាអ្នកទេសចរម្នាក់មកពីសង្កាត់ចូវដុក បានចែករំលែកថា៖ “ខ្ញុំពិតជាចាប់អារម្មណ៍យ៉ាងខ្លាំងជាមួយនឹងពិធីដ៏ពិសេសៗ ដែលបង្កប់យ៉ាងជ្រៅនៅប្រពៃណីពិសេសរបស់ប្រជាជននៅតំបន់សមុទ្ទនេះ ជាពិសេសគឺទិដ្ឋភាពដ៏ស្រស់ស្អាតនៃទូកកប៉ាលបើកចេញទៅសមុទ្ទជាមួយគ្នាដើម្បីប្រារពពិធីបុណ្យ” គឺស្អាត់ណាស់។
យោងតាមលោក ចូវ ហុងគី អនុលេខាបក្ខភាគ និងជាប្រធានគណៈកម្មាធិការប្រជាជនតំបន់ពិសេស គៀនហៃ បានមានប្រសាសន៍ថា ក្នុងរយៈពេលពីរថ្ងៃ (ថ្ងៃទី ៤ និងទី ៥ ខែធ្នូ ត្រូវនឹងថ្ងៃទី ១៥ និងទី ១៥ ខែ ១០ ច័ន្ទគតិ) ពិធីដង្ហែរអាទិពេទសមុទ្ទខាងត្បូងឡៃសឺន នៅក្នុងតំបន់ពិសេសគៀនហៃ បានប្រព្រឹត្តទៅក្នុងបរិយាកាសដ៏ឱឡារិក និងគួរឲ្យគោរព បានបន្សល់ទុកនូវចំណាប់អារម្មណ៍ល្អៗក្នុងចិត្តប្រជាជន និងអ្នកទេសចរមកពីទីជិតទីឆ្ងាយ។
ឆ្លងកាត់រាប់រយឆាំ្នមកហើយ ពិធីបុណ្យអាទិទេពសមុទ្ទខាងត្បូងឡៃសឺនបានក្លាយជាផ្នែកមួយមិនអាចខ្វះបានក្នុងជីវភាពស្មារតីរបស់ប្រជាជននៅទីនេះ គឺជាពិធីបុណ្យតំណាងមិនត្រឹមតែរបស់ប្រជាជនឡៃសឺនប៉ុណ្ណោះទេ ថែមទាំងរបស់តំបន់សមុទ្ទភាគខាងលិចទាំងមូលនៃខេត្តអានយ៉ាងផងដែរ។
មិនត្រឹមតែមានអត្ថន័យខាងជំនឿយ៉ាងជ្រាលជ្រៅប៉ុណ្ណោះទេ ពិធីបូជាអាទិទេពសមុទ្ទខាងត្បូងឡៃសឺន ក៏ជាចំណុចលេចធ្លោខាងវប្បធម៌ និងទេសចរណ៍ដ៏សំខាន់មួយផងដែរ ដោយរួមចំណែកដល់ការផ្សព្វផ្សាយរូបភាពប្រជាជន និងតំបន់សមុទ្ទកោះអានយ៉ាងទៅដល់ភ្ញៀវទេសចរជិតឆ្ងាយ ជំរុញការអភិវឌ្ឍសេដ្ឋកិច្ច និងទេសចរណ៍ក្នុងមូលដ្ឋាន ធ្វើឲ្យខេត្តអានយ៉ាងក្លាយជាគោលដៅទេសចរណ៍ដ៏ទាក់ទាញរបស់តំបន់វាលរាបទន្លេគឺឡុង៕
ប្រែ៖ ណារីពៅ
