ថ្ងៃទី ៧ ខែមីនា គណៈកម្មាធិការប្រជាជនខេត្តបានរៀបចំការពិនិត្យហេដ្ឋារចនាសម្ព័ន្ធភ្ជាប់តំបន់ទេសចរណ៍ភ្នំពពាល។ គណៈប្រតិភូដឹកនាំដោយលោក ហូ វ៉ាន់ ម៉ឹង សមាជិកគណៈកម្មាធិការមជ្ឈិមបក្ស អនុលេខាបក្សខេត្ត និងប្រធានគណៈកម្មាធិការប្រជាជនខេត្ត ជាប្រធានក្រុម។ ចូលរួមជាមួយក៏មានលោក ឡេ វ៉ាន់ភឿក អនុប្រធានគណៈកម្មាធិការប្រជាជនខេត្ត និងថ្នាក់ដឹកនាំមន្ទីរ គណៈ ផ្នែកខេត្ត។
នៅក្នុងពេលជួបធ្វើការ គណៈកម្មាធិការប្រជាជនភ្នំពពាល(នុយកាំ) បានរាយការណ៍អំពីស្ថានភាពអភិវឌ្ឍវិស័យទេសចរណ៍នៅក្នុងតំបន់ និងបានស្នើគម្រោងវិនិយោគហេដ្ឋារចនាសម្ព័ន្ធដឹកជញ្ជូនសំខាន់ៗជាច្រើន ដើម្បីបង្កើនសមត្ថភាពភ្ជាប់ សម្រាប់បម្រើការអភិវឌ្ឍទេសចរណ៍ និងជីវភាពប្រជាពលរដ្ឋ។ ក្នុងនោះរួមមានសំណង់តូចធំ ដូចជា៖ លើកកម្ពស់ និងពង្រីកផ្លូវ កុងប៊ិញ តភ្ជាប់តំបន់ទេសចរណ៍ភ្នំពពាល(នុយកាំ)ជាមួយចំណតរថយន្ត និងសាងសង់ប្រព័ន្ធបង្ហូរទឹក។ វិនិយោគសាងសង់ស្ពានភ្ជាប់ផ្លូវត្រាសឺខាងលិច ឆ្លងកាត់ផ្លូវខេត្តលេខ ៩៤៥។ វិនិយោគផ្លូវអានដុង (អានឡាកខាងជើង) ភ្ជាប់តំបន់ តាន់ឡាព ចាស់ពីផ្លូវខេត្តលេខ ៩៤៥ ទៅមជ្ឈមណ្ឌលឃុំនៅផ្លូវខេត្តលេខ ៩៤៨។ លើកកម្ពស់និងពង្រីកផ្លូវ Latina ភ្ជាប់ផ្លូវខេត្តលេខ ៩៤៨ ជាមួយផ្លូវខេត្តលេខ ៩៤៩។
មូលដ្ឋានក៏បានរាយការណ៍អំពីទិសដៅកែសម្រួលផែនការអភិវឌ្ឍតំបន់ទេសចរណ៍ ដោយរៀបចំឡើងវិញពី ៩ តំបន់មុខងារ មកនៅសល់ ៥ តំបន់ ដើម្បីផ្តោតធនធានវិនិយោគ និងអភិវឌ្ឍតំបន់សំខាន់ៗ ដែលភ្ជាប់ជាមួយការធ្វើអាជីវកម្មសក្តានុពលអេកូឡូស៊ី វប្បធម៌ជំនឿ និងទេសភាពពិសេសរបស់តំបន់ភ្នំពពាល។
ថ្លែងមតិក្នុងជួបធ្វើការ លោក ហូ វ៉ាន់ ម៉ឹង ប្រធានគណៈកម្មាធិការប្រជាជនខេត្ត បានសង្កត់ធ្ងន់ថា ភ្នំពពាល ជាគោលដៅទេសចរណ៍សំខាន់របស់ខេត្ត មានសក្តានុពលធំសម្រាប់អភិវឌ្ឍទេសចរណ៍អេកូឡូស៊ី វប្បធម៌ និងជំនឿសាសនា។ ដូច្នេះ ការវិនិយោគហេដ្ឋារចនាសម្ព័ន្ធដឹកជញ្ជូនភ្ជាប់ត្រូវតែគិតគូរយ៉ាងសមស្រប និងមានផែនការរយៈពេលវែង ដើម្បីបម្រើទាំងការអភិវឌ្ឍទេសចរណ៍ និងបង្កើតភាពងាយស្រួលសម្រាប់ជីវភាព និងមុខរបររបស់ប្រជាជនមូលដ្ឋានផងដែរ។
ក្នុងឱកាសនេះ លោក ហូ វ៉ាន់ ម៉ឹង ប្រធានគណៈកម្មាធិការប្រជាជនខេត្ត និងគណៈប្រតិភូក៏បានអញ្ជើញទៅពិនិត្យជាក់ស្តែងសកម្មភាពនៅតំបន់ទេសចរណ៍ភ្នំពពាល។ យោងតាមរបាយការណ៍ តំបន់ទេសចរណ៍ភ្នំពពាលលេចធ្លោដោយមានកន្លែងទេសចរណ៍ជំនឿ កម្សាន្ត និងទេសភាពធម្មជាតិ ដោយទាក់ទាញភ្ញៀវទេសចរប្រមាណ ១០ លាននាក់ក្នុងមួយឆ្នាំ ពីក្នុង និងក្រៅប្រទេស។ គោលដៅទេសចរណ៍សំខាន់ៗរួមមាន បឹងធ្វីលីម ជ្រោះថាញ់ឡុង ជ្រោះអូរទឹកឆា ទឹកជ្រោះទេវតា និងគោលដៅទេសចរណ៍វប្បធម៌ជំនឿដូចជា វត្តវ៉ានលិញ រូបសំណាកតាកំប៉ោងទេវតា វត្តព្រះធំ ព្រមទាំងភ្នំតូចៗ រូងភ្នំ និងវិមាន។
បច្ចុប្បន្ន តំបន់ទេសចរណ៍មានមូលដ្ឋានស្នាក់នៅ ១២ កន្លែងនៅជើងភ្នំ ដែលអាចទទួលភ្ញៀវប្រហែល ៨០០ នាក់ និង ១២ កន្លែងនៅលើភ្នំ ដែលអាចទទួលបានប្រហែល ៧០០ នាក់ ភាគច្រើនជាផ្ទះសំណាក់ និងផ្ទះសម្រាក។ គណៈគ្រប់គ្រងតំបន់ទេសចរណ៍ភ្នំពពាលបានសហការយ៉ាងជិតស្និទ្ធជាមួយគណៈកម្មាធិការប្រជាជន ឃុំភ្នំពពាល(នុយកាំ) និងសង្កាត់ជីឡាំង ក្នុងការគ្រប់គ្រងសកម្មភាពទេសចរណ៍ រួមមានមូលដ្ឋានស្នាក់នៅ ពាណិជ្ជកម្ម និងសេវាកម្មផ្សេងៗ។
នៅរសៀលថ្ងៃដដែល លោក ហូ វ៉ាន់ ម៉ឹង ប្រធានគណៈកម្មាធិការប្រជាជនខេត្ត បានទៅ ពិនិត្យទីតាំងសំខាន់ៗមួយចំនួននៅក្នុងតំបន់ រួមមាន៖ចំណុចចាប់ផ្តើមពីដើមផ្លូវឡាទីណា គឺពីផ្លូវខេត្តលេខ ៩៤៨ ទៅផ្លូវខេត្តលេខ ៩៤៩។ តំបន់លេខ៣ - ជ្រោះថាញឡុង។ តំបន់លេខ១ - មជ្ឈមណ្ឌលបឹងធ្វីលីម និងតំបន់លេខ២ - ដុបមម៉ុងមមាច នៃតំបន់ទេសចរណ៍ភ្នំពពាល។
តាមរយៈការត្រួតពិនិត្យ ថ្នាក់ដឹកនាំខេត្តបានវាយតម្លៃខ្ពស់ចំពោះសក្តានុពលទេសភាព និងលក្ខខណ្ឌអភិវឌ្ឍទេសចរណ៍នៅក្នុងតំបន់ ទន្ទឹមនឹងនេះ មូលដ្ឋានចាំបាច់ត្រូវយកចិត្តទុកដាក់អភិរក្សធម្មជាតិ និងអភិវឌ្ឍទេសចរណ៍តាមទិសចីរភាព ភ្ជាប់នឹងលើកកម្ពស់គុណភាពសេវាកម្ម ដើម្បីរៀបចំភ្នំពពាលក្លាយជាគោលដៅទេសចរណ៍ដ៏ទាក់ទាញរបស់ខេត្ត និងតំបន់វាលរាបទន្លេគឺវឡុង។
លោក ហូ វ៉ាន់ ម៉ឹង ប្រធានគណៈកម្មាធិការប្រជាជនខេត្ត ស្នើឲ្យមូលដ្ឋានចេញសេចក្តីសម្រេចស្តីពីការអភិវឌ្ឍតំបន់ទេសចរណ៍ភ្នំពពាលឲ្យបានឆាប់ ដើម្បីតម្រង់ទិសសម្រាប់ការងាររៀបចំផែនការ និងវិនិយោគ។ ទន្ទឹមនិងនោះ តម្រូវឲ្យមន្ទីរ ផ្នែកពាក់ព័ន្ធសហការត្រួតពិនិត្យឡើងវិញផែនការទូទៅនៅតំបន់ទេសចរណ៍ភ្នំពពាល។
តាមនោះវាយតម្លៃស្ថានភាពហេដ្ឋារចនាសម្ព័ន្ធ បញ្ជាក់គម្រោងអាទិភាពវិនិយោគទៅតាមផែនទីបង្ហាញផ្លូវសមស្រប និងស្វែងរកប្រភពធនធានវិនិយោគផ្សេងៗ ដើម្បីបញ្ចប់ប្រព័ន្ធដឹកជញ្ជូនភ្ជាប់ទៅកាន់តំបន់ទេសចរណ៍។
ចំពោះផែនការរួម លោកប្រធានគណៈកម្មាធិការប្រជាជនខេត្តក៏បានណែនាំឲ្យកាត់បន្ថយអតិបរមាផលប៉ះពាល់ដល់ព្រៃឈើ និងឲ្យគណៈគ្រប់គ្រងតំបន់ទេសចរណ៍ភ្នំពពាលបង្កើនការងារគ្រប់គ្រង ដើម្បីជៀសវាងសកម្មភាពកើតមានដោយឯកឯងនៅតាមកន្លែងទេសចរណ៍៕
ប្រែ៖ សំណាង
