មោទនភាពអំពីរបរធ្វើអំបុកប្រពៃណី ក្នុងឱកាសអកអំបុកឆាំ្ននេះ អាជ្ញាធរមូលដ្ឋានជុំ អូរឡឹម (ខេត្តអានយ៉ាង) បានបង្កើតបរិយាកាស បុកអំបុកដ៏អ៊ូអរក្នុងសហគមន៍ ណែនាំពីលក្ខណៈពិសេសនៃរបរផងនិងទាំងសង្ឃឹមថា បើកចេញនូវកន្លែងលេងវប្បធម៌ដែលអាចរក្សាបានជាប្រចាំដើម្បីស្វាគមន៍ភ្ញៀវទេសចរមកទស្សនាឃុំវីរៈភាពផង។
លក្ខណៈវប្បធម៌ដ៏អស្ចារ្យ
ថ្ងៃពេញបូណ៌មីខែកត្តិក ឬខែវិច្ឆិកាជារៀងរាល់ឆ្នាំ គឺជាពេលវេលាប្រជាពលរដ្ឋខ្មែរចាប់ផ្ដើមច្រូតស្រូវ។ ដោយមានជំនឿ ចិត្តស្មោះស្ម័គ្រ និងសម្តែងការដឹងគុណទៅដល់ព្រះច័ន្ទនឹងដឹងគុណទៅដល់ទេវតាដែលប្រទានទឹកភ្លៀងធ្លាក់មកលើព្រះធរណី អាកាសធាតុអំណោយផលធ្វើឲ្យដំណាំសព្វសារពើដុះដាល ហើយទទួលផលកសិកម្មបានច្រើន ទន្ទឹមនិងនោះ បួងសួងសុំសុខភាពមាំមួន សម្បូរធូរធារ និងសុខសន្តិភាពដល់គ្រប់ក្រុមគ្រួសារ ជនរួមជាតិខ្មែរបានប្រគល់នូវជំនឿនេះទៅលើគ្រាប់ស្រូវដំណើបដើមរដូវ។
បងប្អូនបានយកស្រូវដំណើបទុំថ្មីទៅលីង ហើយបុកជាអំបុក រួចអុំយកអង្កាមចេញស្អាត ដាក់សែនថ្វាយទេវតា ចំពេលព្រះច័ន្ទរះពេញវង់។ នេះជាឱកាសសម្រាប់អ្នកទាំងអស់គ្នាបានរៀនសូត្រនិងផ្លាស់ប្តូរបទពិសោធន៍ជាមួយគ្នាក្នុងការផលិត រីករាយជាមួយតែ អំបុក និងមើមបន្លែផ្លែឈើដែលដាំដោយខ្លួនឯង។
បញ្ហានេះ ក៏ មានអត្ថន័យអប់រំកូនចៅអំពីស្មារតីពលកម្មផលិត សាមគ្គីភាពក្នុងភូមិស្រុក កោតសរសើររបរប្រពៃណី ស្រូវទឹកដែលបាននាំមកនូវភាពរុងរឿង និងសុភមង្គលក្នុងសហគមន៍។ តាមយៈនោះ ពិធីអកអំបុកបានក្លាយជាលក្ខណៈវប្បធម៌ដ៏អស្អារ្យរបស់ជនរួមជាតិខ្មែរ។
ការធ្វើអំបុកគឺជារបរប្រពៃណីរបស់ជនរួមជាតិខ្មែរនៅឃុំអូរឡឹម ប៉ុន្តែជំនាន់យុវជនបច្ចុប្បន្ននេះមិនសូវមានអ្នកណាដឹងទេ។ លោកពូ ចៅសុខសា រស់នៅភូមិភឿកឡុក គឺជាសិប្បករមួយរូប ដែលប្រកបរបរដាល់អំបុកនេះ ជិត៥០ឆ្នាំមកហើយ។ ជារៀងរាល់ថ្ងៃ គាត់ដាល់មួយថាំង(ពី ២០គីឡូក្រាមទៅ២៧គីឡូក្រាម) ដំណើបស្រស់ធ្វើអំបុកចែកចាយទៅអ្នកលក់ដុំនៅទីក្រុងកាន់ធើ ទីក្រុងហូជីមិញ និងសង្កាត់ឡុងស្វៀន។
ក្នុងអំឡុងពេលកើតមានរោគរាតត្បាតកូវីដ-១៩ ការធ្វើអំបុកត្រូវបានអាក់ខាន រួចហើយផលិតមានបន្តិចបន្តួចរហូតមកដល់បច្ចុប្បន្ន។ លោកពូសោកស្ដាយថា៖ “កាលពីមុន មានគ្រួសារជាច្រើនធ្វើអំបុក ក្រោយមក ថយចុះនៅត្រឹម ១៥គ្រួសារ ឥឡូវនេះគឺអត់ច្បាស់ មានអ្នកចេះបុកអំបុកដែរ តែមិនធ្វើជាប្រចាំទេ បានប្តូរទៅធ្វើការងារផ្សេង ដើម្បីចិញ្ចឹមជីវិត” វិញហើយ។
យោងតាមព្រឹទ្ធាចារ្យនៅឃុំអូរឡឹមបានឲ្យដឹងថា មុខរបរធ្វើអំបុកត្រូវបាត់បង់ជាបណ្តើរៗ ដោយសារវត្ថុធាតុដើមសម្រាប់ធ្វើជាស្រូវដំណើបស្រែប្រាំងវាកម្រ។ ស្រូវដំណើបស្រែលើមានរយៈពេលលូតលាស់ពី ៣-៤ខែ មិនស្មើគ្នាដូចស្រូវធុងណុងសព្វថ្ងៃនេះទេ ស្រូវស្រែប្រាំងត្រូវកណ្តុរ៍កាត់បំផ្លាញ មិនបានផល ប៉ះពាល់ដល់ប្រាក់ចំណូល និងជីវភាពរបស់បងប្អូន។
ថ្វីត្បិតតែរបរធ្វើអំបុកមានសភាពស្ងាត់ធៀបនឹងពីមុន ប៉ុន្តែបើនិយាយពីល្ខណៈវប្បធម៌របស់សហគមន៍ ជនរួមជាតិខ្មែរវិញ បងប្អូននៅអូរឡឹមមានមោទនភាពយ៉ាងខ្លាំង ហើយសង្ឃឹមថានឹងមានឱកាសអភិវឌ្ឍរបរឡើងវិញ។
អភិរក្សវប្បធម៌សហគមន៍
ឆ្នាំនេះជាលើកទីមួយហើយដែលឃុំអូរឡឹមបានរៀបចំការប្រកួតបុកអំបុក។ សហគមន៍ខ្មែរនៅតាមភូមិស្រុកបានមកជួបជុំគ្នានៅមណ្ឌលឃុំដើម្បីបង្ហាញពីជំនាញដោយក្តីរំភើបរីករាយ។ សប្បាយព្រោះបានឃើញទិដ្ឋភាពដ៏អ៊ូអរនៃការរៀបចំពិធីថ្វាយព្រះច័ន្ទ។សប្បាយព្រោះក្មេងៗជំនាន់ក្រោយមានចិត្តចង់ចេះចង់ដឹងនិងត្រេកអរគាំទ្រ នៅពេលមើលបុកអំបុក។សប្បាយព្រោះការប្រកួតនេះមិនមែនមានតែភូមិមួយប៉ុណ្ណោះទេ គឺបានប្រមូលផ្តុំគ្រប់ភូមិ សាលារៀន និងមានការចូលរួមពីកងកម្លាំងប្រដាប់អាវុធ យុវជនផងដែរ បានបង្កើតជាបរិយាកាសកក់ក្តៅ និងមានន័យ។
អ្នកស្រី នាង សំបូ អនុប្រធានគណៈកម្មាធិការប្រជាជនឃុំអូរឡឹម មានប្រសាសន៍ថា ឃុំអូរឡឹមទាំងមូល មានជនរួមជាតិខ្មែររស់នៅ ៦៥% មានពិធីបុណ្យវប្បធម៌ពិសេសៗជាច្រើនដែលគួរតែយកចិត្តទុកដាក់រក្សា និងអភិរក្ស។ ក្នុងនោះ ពិធីបុណ្យអកអំបុក ឬហៅថា ពិធីបុណ្យសំពះព្រះខែ មានអត្តសញ្ញាណវប្បធម៌ប្រពៃណីដ៏រឹងមាំ បានជនរួមជាតិរៀបចំធ្វើឡើងជារៀងរាល់ឆ្នាំ។
អនុវត្តកម្មវិធីគោលដៅជាតិអភិវឌ្ឍសេដ្ឋកិច្ចសង្គមតំបន់ជនរួមជាតិភាគតិច និងតំបន់ភ្នំ ដំណាក់កាល ២០២១-២០៣០ មូលដ្ឋានបានយកចិត្តទុកដាក់ជាពិសេសចំពោះគម្រោងទី៦៖ “អភិរក្ស និងពង្រីកតម្លៃវប្បធម៌ប្រពៃណីដ៏ល្អរបស់ជនជាតិភាគតិច ផ្សារភ្ជាប់នឹងការអភិវឌ្ឍទេសចរណ៍”។
អ្នកស្រី នាង សំបូ មានប្រាសាសន៍ថា៖ “ពីភាពជោគជ័យនៃការប្រកួតលើកទី១ នៅឆ្នាំក្រោយ យើងខ្ញុំមានគម្រោងពង្រីកទ្រង់ទ្រាយ ដាក់ល្បែងប្រជាប្រិយបន្ថែមទៀត ដើម្បីទាក់ទាញ បង្កើតជាបរិយាកាសរីករាយ អបអរសាទរ លក្ខណៈពិសេសនៃពិធីបុណ្យអកអំបុក។មូលដ្ឋានក៏បានតម្រង់ទិស នាពេលខាងមុខ ជំរុញបងប្អូនឲ្យធ្វើស្រូវដំណើបស្រែប្រាំង ពង្រឹងឡើងវិញក្រុមដាល់អំបុកក្នុងភូមិរបរ (ពី ១០ ទៅ ១៥នាក់) បង្កើតលក្ខណៈអំណោយផលសម្រាប់អ្នកមកទស្សនានិងទទួលបទពិសោធន៍”។
បុកអំបុកគឺជាបេតិកភណ្ឌវប្បធម៌អរូបីមួយរបស់ជនជាតិខ្មែរនៅភាគខាងត្បូង។នៅឃុំ អូឡឹមក៏មានសិល្បះសម្តែងយីកេ សិល្បះសម្តែងស្គរឆៃយ៉ាំ ភ្លេងពិណពេទ្យ ពិធីប្រណាំងគោ បានទទួលស្គាល់ជាបេតិកភណ្ឌវប្បធម៌អរូបីជាតិ។
នៅលើភូមិសាស្ត្រឃុំ មានបឹងដ៏ស្រស់ស្អាត តំបន់កេរដំណែលប្រវត្តិសាស្ត្របដិវត្តន៍ ទីតាំងថតរូប និងទស្សនាជាដើម ទាក់ទាញភ្ញៀវទេសចរជាច្រើនមកទស្សនា។ មូលដ្ឋានបានព្យាករថានឹងដាក់សកម្មភាពប្រពៃណីដែលពោពេញទៅដោយអត្តសញ្ញាណខ្មែរក្លាយជាផ្នែកមួយនៃដំណើរកម្សាន្តដែលអ្នកទេសចរមកដល់តំបន់ដីវីរភាពអូរឡឹមនាពេលឆាប់ៗនេះ៕
ប្រែ៖ ណារីពៅ
