ព្រឹត្តិការណ៍ពិសេសៗដែលប្រព្រឹត្តទៅនៅទីក្រុង ចូវដុក និងទីរួមខេត្តទិញបៀន ខេត្ត អានយ៉ាង បាននាំមកនូវបរិយាកាសដ៏រស់រវើក ទាក់ទាញប្រជាជន និងភ្ញៀវទេសចរយ៉ាងច្រើនកុះករមកពីគ្រប់ទិសទីមកទស្សនា គោរពបូជា និងរកបទពិសោធន៍។
នៅទីក្រុង ចូវដុក នៅល្ងាចថ្ងៃទី ១៩ ខែឧសភា ឆ្នាំ ២០២៥ (ត្រូវថ្ងៃទី ២២ ខែមេសា ច័ន្ទគតិ) ពិធីបុណ្យលោកយាយភ្នំស្វាម បានឈានចូលជាផ្លូវការ តាមរយៈការរៀបចំដង្ហែរូបសំណាកលោកយាយ និងពិធីបុណ្យតាមដងផ្លូវ។ ពិធីបុណ្យលោកយាយភ្នំស្វាមឆ្នាំនេះ ប្រព្រឹត្តទៅចាប់ពីថ្ងៃទី ១១ ខែឧសភាដល់ថ្ងៃទី ២៤ ខែឧសភា (ត្រូវនិងថ្ងៃទី ១៤ ដល់ថ្ងៃទី ២៧ ខែ ៤ ច័ន្ទគតិ)។ ពិធីប្រពៃណីជាច្រើនត្រូវបានប្រារព្ធឡើងយ៉ាងឱឡារិក រួមមាន៖ កាត់ដេរសំលៀកបំពាក់ថ្វាយលោកយាយ (ថ្ងៃទី ១៥ ខែ ៤ ច័ន្ទគតិ) ពិធីដង្ហែរូបសំណាកលោកយាយ(ថ្ងៃទី ២២ ខែ ៤ ច័ន្ទគតិ) ពិធីស្រង់ទឹកលោកយាយ (ម៉ោង ២៤ យប់ ២៣ និងជិតភ្លឺថ្ងៃ ២៤ ខែ ៤ ច័ន្ទគតិ) ពិធីដង្ហែព្រះរាជក្រឹត្យចូលវត្តលោកយាយ (ថ្ងៃ២៥ ខែ ៤ ច័ន្ទគតិ) ពិធីឧទ្ទិសបួងសួង និងទូងស្គរបើកភពផែនដីថ្មី (ម៉ោង២៤យប់ថ្ងៃទី ២៥ ទាបភ្លឺថ្ងៃ ២៦ ខែ៤ ច័ន្ទគតិ)។ ពិធីបូជា (ម៉ោង ២៤ នៅយប់ថ្ងៃទី ២៥ ទាបភ្លឺថ្ងៃ ២៦ ខែ៤ ច័ន្ទគតិ) ពិធីដង្ហែព្រះរាជក្រឹត្យទៅដាក់កន្លែងដើមវិញ (ថ្ងៃ ២៧ ខែ ៤ ច័ន្ទគតិ)។ល។
ពិធីបុណ្យលោកយាយភ្នំស្វាម បាន អង្គការយូណេស្កូទទួលស្គាល់ជាបេតិកភណ្ឌវប្បធម៌អរូបីនៃមនុស្សជាតិជាផ្លូវការនៅថ្ងៃទី ៤ ខែធ្នូ ឆ្នាំ ២០២៤។ ព្រឹត្តិការណ៍នេះគឺជាការទទួលស្គាល់របស់សហគមន៍អន្តរជាតិអំពីតម្លៃពិសេសរបស់ពិធីបុណ្យនេះ រួមទាំងប្រវត្តិសាស្រ្ត វប្បធម៌ និងខាងវិញ្ញាណ។ ពិធីបុណ្យនេះបានបង្កប់នូវលក្ខណៈវប្បធម៌របស់ប្រជាជនតំបន់ទន្លេទឹកភាគនិរតី រួមចំណែកផ្សារភ្ជាប់ជាមួយជីវិតខាងវិញ្ញាណរក្សានូវតម្លៃប្រវត្តិសាស្ត្រនៃមនុស្សជំនាន់មុនក្នុងដំណើរការ“គាស់រាន” តំបន់ដីភាគនិរតីនៃមាតុភូមិ។
រួមជាមួយនឹងបរិយាកាសពិធីបុណ្យខាងវិញ្ញាណ នៅទីរួមខេត្តទិញបៀន ចាប់ពីថ្ងៃទី ១៩ ដល់ថ្ងៃទី ២៥ ឧសភា ឆ្នាំ ២០២៥ ផ្សារណាត់ពាណិជ្ជកម្មអន្តរជាតិ ទិញបៀនអានយ៉ាង នឹងប្រព្រឹត្តទៅនៅតំបន់ឧស្សាហកម្មស្វឺនតូ ដោយមានស្តង់ទំនិញជាង ៣៣០ មកពីខេត្ត ក្រុងក្នុង និងក្រៅប្រទេសចំនួន ១៥ ដូចជាទីក្រុងហូជីមិញ បារៀ- វុងតាវ ទៀនយ៉ាង ដុងថាប វិញឡុង គៀនយ៉ាង រួមជាមួយនិងធុរកិច្ចមកពីប្រទេសកម្ពុជា ថៃជាដើម បានចែកចេញជាតំបន់៖ ផលិតផល OCOP អានយ៉ាងផ្តើមអាជីព ផលិតផលពិសេសនៃតំបន់នានារបស់វៀតណាម។ធុរកិច្ចអន្តរជាតិ។ តំបន់អាហារ- ល្បែង - សម្តែងវប្បធម៌ជាដើម។
ផ្សារណាត់បើកធ្វើសកម្មភាពពីម៉ោង ៨ ព្រឹកដល់ម៉ោង ១០ យប់ជារៀងរាល់ថ្ងៃ ជាមួយនឹងការចូលទស្សនាដោយឥតគិតថ្លៃពីម៉ោង ៨ ព្រឹកដល់ម៉ោង ៤ រសៀលជារៀងរាល់ថ្ងៃ។មកកាន់ផ្សារណាត់ អ្នកនឹងអាចចូលទស្សនា ទិញផលិតផល OCOP ផលិតផលពិសេសរបស់អានយ៉ាង និងខេត្ត-ក្រុងផ្សេងៗទៀត។ បណ្តាផលិតផលកសិកម្ម និងជលផល ទំនិញប្រើប្រាស់ និងផលិតផលពិសេសរបស់តំបន់នានារបស់វៀតណាម។ ទណ្ទឹមនិងនោះក៏មានកន្លែងលក់អាហារ និងនំប្រពៃណី តំបន់ឆាកកណ្តាលវាល ល្បែងកម្សាន្ត និងសកម្មភាពវប្បធម៌សិល្បៈបម្រើភ្ញៀវទេសចរជារៀងរាល់យប់ នាំមកនូវបរិយាកាសទិញទំនិញ កែកម្សាន្ត និងតភ្ជាប់ពាណិជ្ជកម្មដោយប្រសិទ្ធភាពរវាងវៀតណាម និងប្រទេសនានាក្នុងតំបន់។
ចូលរួមជ្រោមជ្រែងរដូវបុណ្យទាន តំបន់ទេសចរណ៍នានា ក៏បានដាក់ចេញកម្មវិធីលើកទឹកចិត្តដ៏ទាក់ទាញជាច្រើន។ ព្រៃស្មាច់ត្រាស៊ឺ - ជាតំបន់អេកូទេសចរណ៍ដ៏ល្បីឈ្មោះរបស់ទិញបៀន បានផ្តល់អនុគ្រោះការបញ្ចុះតម្លៃ ៥០% លើសំបុត្រចូលទស្សនាសម្រាប់តែប្រជាជនខេត្តអានយ៉ាង (គ្រាន់តែបង្ហាញអត្តសញ្ញាណប័ណ្ណ/អត្តសញ្ញាណប័ណ្ណពលរដ្ឋមានអាសយដ្ឋាននៅក្នុងខេត្ត)។តំបន់ទេសចរណ៍ថាមពលពន្លឺព្រះអាទិត្យអានហាវក៏ ផ្តល់ជូននូវការអនុគ្រោះដ៏ទាក់ទាញផងដែរ៖ ទិញសំបុត្រចំនួន ១០ សន្លឹកជូនមួយសន្លឹកនៅពេលទិញដោយផ្ទាល់ និង ទិញ ១០សន្លឹកជូន ២ សន្លឹកនៅពេលដែលកក់មុន ២ ម៉ោង។
នៅទីរួមខេត្ត ទិញបៀន តំបន់ទេសចរណ៍ភ្នំពពាល (ឃុំ អានហាវ) ក៏កំពុង បានផ្សព្វផ្សាយរូបភាពធម្មជាតិដ៏វិសេសវិសាលដល់ភ្ញៀវទេសចរណ៍ពីទីជិតឆ្ងាយ ជាមួយនឹងទេសភាពដ៏មហាស្កឹមស្កៃ ត្រីសមុទ្រនិងពពករសាត់អណ្តែតលើវេហា រួមនឹងផ្លូវដើរកម្សាន្តគួរឲ្យគយគន់កំពុងរង់ចាំអ្នកមកទស្សនា។ នេះក៏ជា ពេលវេលាដ៏ស័ក្តិសមសម្រាប់រីករាយជាមួយរដូវផ្លែឈើទុំដូចជាទុរេន បឺរ ភ្ញៀវជាដើម ជាពិសេសគឺនំចាក់អំបែងបន្លែព្រៃរសជាតិពិតនៃព្រៃភ្នំ។
ក្នុងអាកាសធាតុខែឧសភាដ៏ស្រស់ស្អាត បរិយាកាសពិធីបុណ្យបានសាយភាយពេញតំបន់ភ្នំទាំងប្រាំពីរនៃខេត្តអានយ៉ាង ជាមួយនឹងការវេញបញ្ចូលគ្នានូវពណ៌វប្បធម៌-ពាណិជ្ជកម្មនិងវិញ្ញាណ បាននាំមកនូវឱកាសជួបជុំពិសេសសម្រាប់អ្នកទេសចរមកកាន់ខេត្តអានយ៉ាង ទទួលយកបទពិសោធន៍អំពីតម្លៃវប្បធម៌ដ៏យូរអង្វែង ជាមួយគ្នា ហើយស្វែងយល់ពីធម្មជាតិដ៏មានចំណាប់អារម្មណ៍ និងតភ្ជាប់ពាណិជ្ជកម្មពោពេញដោយសក្តានុពលរវាងតំបន់ និងអន្តរជាតិ៕
ប្រែ៖ ណារីពៅ
