នៅយប់ថ្ងៃទី ០៧ ខែមីនា លោក ហូ វ៉ាន់ ម៉ឹង សមាជិកគណៈកម្មាធិការមជ្ឈិមបក្ស អនុលេខាគណៈកម្មាធិការបក្សខេត្ត និងជាប្រធានគណៈកម្មាធិការប្រជាជនខេត្ត បានអញ្ជើញចូលរួម ពិធីបុណ្យបណ្តែតប្រទីបនៅភ្នំពពាល លើកទី២ ឆ្នាំ២០២៦ ដែលប្រារព្ធឡើងនៅឃុំភ្នំពពាល(នុយកាំ)។ ក៏មានការអញ្ជើញចូលរួមពីលោក ឡេ វ៉ាន់ ភឿក អនុប្រធានគណៈកម្មាធិការប្រជាជនខេត្ត និងថ្នាក់ដឹកនាំមន្ទីរ គណៈ ផ្នែកនានារបស់ខេត្តផងដែរ។
ពិធីបុណ្យបណ្តែតប្រទីប ភ្នំពពាលបានរៀបចំដោយគណៈកម្មាធិការប្រជាជនឃុំភ្នំពពាល(នុយកាំ) សហការជាមួយគណៈគ្រប់គ្រងតំបន់ទេសចរណ៍ភ្នំពពាល។ ព្រឹត្តិការណ៍នេះបានទាក់ទាញប្រជាជន ពុទ្ធបរិស័ទ និងភ្ញៀវទេសចរពីក្នុង និងក្រៅខេត្តជាង ២០ ពាន់នាក់ មកចូលរួមគោរពបូជា និងទស្សនា។
ជាមួយនឹងសកម្មភាពដូចជា៖ ការសម្ដែងរាំងម៉ុងសាយតោនាគ ការទស្សនាតំបន់ពិធីបុណ្យ ពិធីបួងសួងសុំសុខសាន្ត និងបណ្តែតប្រទីប ព្រមទាំងកម្មវិធីសិល្បៈចម្រុះ ក្រោមប្រធានបទ “សំឡេងពីថ្ងៃបុណ្យនៅភ្នំពពាល”។
ថ្លែងមតិក្នុងពិធីបើក លោក ង្វៀន ហុង សឺន អនុប្រធានគណៈកម្មាធិការប្រជាជនឃុំពពាល(នុយកាំ) បានឲ្យដឹងថា “ពិធីបុណ្យនេះបានរៀបចំឡើងក្នុងគោលបំណងលើកតម្កើងតម្លៃវប្បធម៌ប្រពៃណី និងសាយភាយស្មារតីសាមគ្គីភាពសហគមន៍ និងអធិស្ឋានសូមឲ្យប្រទេសជាតិសន្តិភាពប្រជាជនសុខសាន្ត និងអាកាសធាតុអំណោយផល”។ ប្រទីបផ្កាបានអុជបំភ្លឺ គឺជានិមិត្តសញ្ញានៃសេចក្ដីជំនឿ ក្តីសង្ឃឹម និងការតភ្ជាប់រវាងមនុស្សនិងមនុស្ស រវាងមនុស្សនិងធម្មជាតិ។
លោក ង្វៀន ហុង គឿង អនុប្រធានគណៈកម្មាធិការប្រជាជនឃុំភ្នំពពាល(នុយកាំ)ក៏បានឲ្យដឹងថា បន្ទាប់ពីការរៀបចំលើកដំបូង ពិធីបុណ្យនេះបានបង្កើតចំណាប់អារម្មណ៍ល្អ បានរួមចំណែកផ្សព្វផ្សាយរូបភាពទេសចរណ៍បែបធម្មជាតិ និងទេសចរណ៍បែបសាសនារបស់មូលដ្ឋាន ទន្ទឹមនិងនោះជំរុញសកម្មភាពពាណិជ្ជកម្ម សេវាកម្ម និងទេសចរណ៍ រួមចំណែកលើកកម្ពស់ជីវភាពប្រជាជន។
ក្នុងឆ្នាំ ២០២៦ មូលដ្ឋាននឹងបន្តផ្សព្វផ្សាយគោលដៅអភិវឌ្ឍន៍សេដ្ឋកិច្ច-សង្គមតាមសេចក្ដីសម្រេចរបស់ខេត្ត ទន្ទឹមនិងនោះផ្តោតសំខាន់លើការកសាងបរិយាកាសទេសចរណ៍អារ្យធម៌ សុវត្ថិភាព និងមិត្តភាព ភ្ជាប់នឹងការពារទេសភាពនិងរក្សាអត្តសញ្ញាណវប្បធម៌ប្រពៃណី។
លោក ង្វៀន ហុង គឿង សង្ឃឹមថា ប្រជាជនគ្រប់រូបនៅភ្នំពពាល នឹងបន្តពង្រីកប្រពៃណីរាក់ទាក់ភ្ញៀវ ហើយអង្គការបុគ្គលធ្វើអាជីវកម្មត្រូវលើកកម្ពស់គុណភាពសេវាកម្ម។ ដើម្បីភ្ញៀវទេសចរទាំងអស់ពេលដែលមកទីនេះសុទ្ឋតែ អាចទទួលបានអារម្មណ៍ស្និទ្ធស្នាលពិសេស និងបទពិសោធន៍ល្អៗ មិនអាចបំភ្លេចបាន នៅក្នុងបរិយាកាសពិធីបុណ្យ ដែលជាបរិយាកាសសម្បូរពោពេញទៅដោយអត្តសញ្ញាណជាតិ៕
ប្រែ៖ ណារីពៅ
