យោងតាមផែនការរៀបចំប្រភពទំនិញដើម្បីចូលរួមលំនឹងទីផ្សារនៅលើភូមិសាស្ត្រខេត្តរបស់ មន្ទីរឧស្សាហពាណិជ្ជកម្មអានយ៉ាង នៅក្នុងឆ្នាំ២០២៥ នេះ មានធុរកិច្ចធំៗចំនួន២៣បានចុះបញ្ជីចូលរួមរក្សាលំនឹងទីផ្សារ ស្មើនឹងចំនួនដែលបានចុះបញ្ជីក្នុងឆ្នាំ២០២៤។
គិតចាប់ពីថ្ងៃចេញផ្សាយផែនការដល់ថ្ងៃទី៣១ ខែធ្នូ ឆ្នាំ២០២៥ (ប្រហែលជា១០ខែ) បរិមាណទុនបម្រុងជាសរុបត្រូវបានសន្និដ្ឋានថានឹងមានចំនួនជាង ៤.៧៣៥ពាន់លានដុង កើនឡើងជាង ៣,៧៩% ធៀបនឹងការចុះបញ្ជីនៅឆ្នាំ២០២៤ (ឆ្នាំ២០២៤ ចុះបញ្ជីបម្រុងទុកចំនួន ៤.៥៦២ពាន់លានដុង)។ក្នុងនោះមានក្រុមទំនិញស្បៀង អាហារ គ្រឿងទេស ទំនិញប្រើប្រាស់ គ្រឿងសម្អាងជាដើម គឺចំនួន ១.១៨៧ ពាន់លានដុង។ ប្រេងឥន្ធនៈ និងឧស្ម័នរ៉ែរាវមានចំនួន ៣.៥៤៨ ពាន់លានដុង។
ដោយឡែកចំពោះហាងដែលបានចុះបញ្ជីចូលរួមលំនឹងទីផ្សារមានចំនួន ៤៥២ ហាង បានចុះឈ្មោះចូលរួមលំនឹងទីផ្សារបានរៀបចំទូលំទូលាយនៅក្នុងខេត្តទាំងមូល។ ក្នុងនោះ មានហាងស្បៀងនិងផលិតផលអាហារចំនួន៩៦។ ហាងលក់ប្រេងឥន្ធនៈ និងឧស្ម័នរ៉ែរាវចំនួន ៣៥៦ កើនឡើងជាង ១,៨% បើធៀបនឹងឆ្នាំ ២០២៤។
បានសន្និដ្ឋានថាចាប់ពីពេលនេះរហូតដល់ដំណាច់ឆ្នាំនឹងមានសកម្មភាពជាច្រើនទាក់ទងដល់ការងារលំនឹងទីផ្សារ ដូចជាការរៀបចំសកម្មភាពដើម្បីភ្ជាប់ការប្រើប្រាស់ផលិតផលរវាងក្រុមហ៊ុនផលិត កែច្នៃ នឹងបណ្តាមូលដ្ឋានអាជីវកម្ម ចែកចាយក្នុង និងក្រៅប្រទេស។ រៀបចំ “ទិវាទិញទំនិញអនឡាញវៀតណាមនិង Online Friday ២០២៥”។ រៀបចំសប្តាហ៍ផ្សព្វផ្សាយលក់និងទិញទំនិញតាមអនឡាញដើម្បីអបអរសាទរបុណ្យណូអែលនិងបុណ្យចូលឆាំ្នសកល ២០២៥។ រៀបចំសកម្មភាពអភិវឌ្ឍន៍ទីផ្សារក្នុងប្រទេសភ្ជាប់ជាមួយកិច្ចចលនា“ប្រជាជនវៀតណាមអាទិភាពប្រើប្រាស់ទំនិញវៀតណាម” ជាមួយនឹងជើងទំនិញវៀតចំនួន ៤០ ទៅកាន់តំបន់ជនបទតាមស្រុក ទីរួមខេត្ត ក្រុង និងសម័យផ្សារទំនិញវៀតចំនួន ០១ នៅស្រុកអានភូ។
ធុរកិច្ច មជ្ឈមណ្ឌលពាណិជ្ជកម្ម ផ្សារទំនើប ធុរកិច្ច មូលដ្ឋានផលិតកម្ម អាជីវកម្មនៅលើភូមិសាស្ត្រខេត្ត នឹងបានគាំទ្រ និងបង្កើតលក្ខណៈក្នុងការរៀបចំកម្មវិធីផ្សព្វផ្សាយលក់ទំនិញដូចជា ការបញ្ចុះតម្លៃ កាជូនកាដូ ការចាប់ឆ្នោតត្រូវរង្វាន់ជាដើម។
ទន្ទឹមនិងនោះ នឹងផ្សព្វផ្សាយសកម្មភាពឃោសនាដើម្បីផ្តល់ព័ត៌មានពេញលេញ និងទាន់ពេលវេលាអំពីទីផ្សារ តម្លៃ និងសកម្មភាពលំនឹងទីផ្សារក្នុងទម្រង់ចម្រុះ និងសម្បូរបែបតាមរយៈប្រព័ន្ធផ្សព្វផ្សាយ គេហទំព័រព័ត៌មានអេឡិចត្រូនិកនៅគ្រប់លំដាប់ថ្នាក់។ រៀបចំបែបផែនធ្វើនិយតកម្មទំនិញនៅពេលទីផ្សារប្រែប្រួល ក្នុងករណីខ្វះប្រភពទំនិញសម្រាប់ផ្តត់ផ្គង់ប្រជាជននៅក្នុងមូលដ្ឋាន អាជីវកម្មអាចផ្ទេរទំនិញពីផ្សារទំនើប និងហាងងាយស្រួលរបស់មូលដ្ឋានផ្សេងទៀតដែលរួមប្រព័ន្ធ ដើម្បីគាំទ្រការផ្គត់ផ្គង់ ធានានូវសេវាកម្មល្អសម្រាប់តម្រូវការចាំបាច់របស់ប្រជាជននៅពេលចាំបាច់។ទន្ទឹមនឹងនោះ អាស្រ័យលើស្ថានភាពជាក់ស្តែង នឹងរៀបចំម៉ូតូ ឬយានជំនិះជំនាញដើម្បីដឹកជញ្ជូនទំនិញ។ នៅពេលមានតម្រូវការ បណ្តាក្រុមហ៊ុនប្រើប្រាស់រថយន្តដឹកទំនិញដើម្បីដឹកជញ្ជូនស្បៀងនិងផលិតផលអាហារទៅកាន់ចំណុចប្រមូលផ្ដុំ ដើម្បីចែកចាយដោយផ្ទាល់ដល់ប្រជាជន។ ក្នុងករណីដែលរថយន្តដឹកទំនិញមិនអាចទៅកាន់តំបន់នោះបាន នឹងប្រើប្រាស់ម៉ូតូដើម្បីដឹកជញ្ជូន។
ក្រៅពីការរៀបចំទំនិញក្នុងតម្លៃថេរនោះ នៅត្រីមាសទី៤ នឹងដំណើរការចាត់ចែង និងរៀបចំតំបន់លក់ទំនិញសម្រាប់បម្រើបុណ្យចូលឆាំ្នថ្មីវៀតណាម និងផ្សារផ្កានិទាឃរដូវជាដើម នៅលើភូមិសាស្ត្រខេត្ត ធានាបាននូវការសន្សំសំចៃ និងប្រសិទ្ធភាព។ សហការជាមួយអង្គភាពគ្រប់គ្រងផ្សារឃោសនា តម្រូវឲ្យបណ្តាគ្រួសារអាជីវកម្មក្នុងផ្សាររៀបចំទំនិញឲ្យមានរបៀបរៀបរយ ជៀសវាងស្ថានភាពតូបរំលោភបំពានលើផ្លូវដើរទូទៅ នាំឲ្យមានការរាំងស្ទះ បាត់បង់សោភ័ណភាព និងអារ្យធម៌ផ្សារ។ បង្កើនការងារធានាសុវត្ថិភាពបង្ការ និងពន្លត់អគ្គីភ័យ សន្តិសុខសណ្តាប់ធ្នាប់ អនាម័យបរិស្ថានក្នុង និងក្រៅតំបន់ផ្សារ។ ហាមដុតធូប និងក្រដាសមាសប្រាក់នៅតាមតូប រៀបចំកងកម្លាំងសន្តិសុខប្រចាំការ ២៤/៧ម៉ោង ដើម្បីប្រទះឃើញទាន់ពេល និងមានវិធានការដោះស្រាយនៅពេលដែលមានកាលៈទេសៈមិនល្អកើតឡើង។
រួមនឹងការងារធ្វើនិយតកម្មរៀបចំទំនិញ មន្ទីរឧស្សាហពាណិជ្ជកម្ម ក៏រៀបចំការតាមដាន ត្រួតពិនិត្យ ឃ្លាំមើលការប្រែប្រួលទីផ្សារ ការផ្គត់ផ្គង់ និងតម្រូវការទំនិញ ជាពិសេសគឺទំនិញសំខាន់ៗ ដើម្បីបម្រើតម្រូវការទិញទំនិញរបស់ប្រជាជន ដើម្បីមានបែបផែនយ៉ាងសកម្ម ឬក៏ស្នើទាន់ពេលវេលាជាមួយគណៈកម្មាធិការប្រជាជនខេត្ត ក្រសួង ផ្នែកពាក់ព័ន្ធដើម្បីផ្សព្វផ្សាយវិធានការឆ្លើយតបទាន់ពេលវេលាដើម្បីលំនឹងទីផ្សារនៅពេលចាំបាច់។ មានវិធានការគ្រប់គ្រង និងទប់ស្កាត់ការរត់ពន្ធ ការគៃបន្លំពាណិជ្ជកម្ម។ត្រួតពិនិត្យសម្ភារៈកសិកម្ម ថ្នាំបង្ការនិងព្យាបាលឲ្យមនុស្ស និងអាហារមុខងារ។ ត្រួតពិនិត្យការផលិត ការស្តុកទុក ការដឹកជញ្ជូន និងការជួញដូរផាបជាដើម ត្រួតពិនិត្យការបំពានច្បាប់ស្តីពីតម្លៃ គុណភាពផលិតផល អំពើស្តុកទុកទំនិញ និងការឡើងថ្លៃខុសច្បាប់នៅលើភូមិសាស្ត្រខេត្ត៕
ប្រភព៖ផែនការលេខ ៨៧/KH-SCT ចុះថ្ងៃទី ១២ ខែមីនា ឆ្នាំ ២០២៥ របស់មន្ទីរឧស្សាហពាណិជ្ជកម្ម
ប្រែ៖ណារីពៅ
