ភាពខ្លាំងរបស់ផលិតផល OCOP មិនមែនកើតចេញពីភាពជាបុគ្គលទេ ប៉ុន្តែមកពីខ្សែចង្វាក់រួមគ្នាកសាងមូលដ្ឋានដើម្បីផលិតផលបង្កើនតម្លៃ និងកម្លាំងប្រកួតប្រជែងនៅក្នុងទីផ្សារ។ នេះគឺជាស្មារតីបានសង្កត់ធ្ងន់នៅក្នុងព្រឹត្តិការណ៍ជាច្រើនដែលប្រព្រឹត្តទៅក្នុងរយៈពេល ៤ថ្ងៃនៃវេទិកាតភ្ជាប់ផលិតផល OCOP តំបន់វាលរាបទន្លេគឺវឡុងនៅខេត្តអានយ៉ាង (ថ្ងៃទី ២៥-២៨ ខែកញ្ញា)។ ក្នុងនាមជាខេត្តម្ចាស់ផ្ទះ ខេត្តអានយ៉ាង បានបង្កលក្ខណៈសម្រាប់អាជីវកម្ម សហករណ៍ និងប្រធានកម្ម OCOP នៅលើភូមិសាស្ត្របានចែករំលែក សិក្សាបទពិសោធន៍ ជួបជាមួយអ្នកចែកចាយជាដើម ដើម្បីបើកឱកាសអភិវឌ្ឍន៍ក្នុងដំណាក់កាលថ្មី។
កំណត់ទីតាំងផលិតផលអូខួបរបស់ខេត្ត
លោក ឡេហ៊ូតន ប្រធានមន្ទីរកសិកម្ម និងបរិស្ថាន បានឲ្យដឹងថា វេទិកាតភ្ជាប់ផលិតផល OCOP តំបន់វាលរាបទន្លេគឺវឡុង គឺជាពិធីបុណ្យដ៏សំខាន់បំផុតសម្រាប់ប្រទេសទាំងមូល និងខេត្តអានយ៉ាង។ នេះគឺជាឱកាសដើម្បីកំណត់កន្លែងមើលផលិតផលរបស់ខេត្តកំពុងឈរនៅទីណាលើ "វេទិការួម" នៃប្រទេសទាំងមូល និងតំបន់ទាំងមូល។ ប្រធានចូលរួម ក៏មានការផ្លាស់ប្តូរជាវិជ្ជមានផងដែរនៅពេលផ្គត់ផ្គង់ទៅកាន់ទីផ្សារ។
បន្ទាប់ពី ៥ ឆ្នាំ ខេត្តអានយ៉ាង មានផលិតផល OCOP ជាង ៥៨០មុខ។ លទ្ធផលគួរឲ្យមោទនៈភាពនេះបានឆ្លុះបញ្ចាំងយ៉ាងច្បាស់ពីការតស៊ូរបស់ធុរកិច្ច សហករណ៍ និងអាជីវកម្មនៅលើភូមិសាស្ត្រខេត្ត។ ជំរុញពាណិជ្ជកម្មពីមួយថ្ងៃទៅថ្ងៃកាន់តែបានមើលសំខាន់ ផលិតផលពិសេសជាច្រើន ផលិតផល OCOP របស់ខេត្តបានមានវត្តមាននៅក្នុងផ្សារទំនើបធំៗជាច្រើនដូចជា៖ Co.opmart Big C Lotte ហាងទំនិញងាយស្រួល Winmart ជាដើម និងនៅលើវេទិកាពាណិជ្ជកម្មអេឡិចត្រូនិក។
ខេត្តក៏លើកទឹកចិត្ត និងគាំទ្រដល់ធុរកិច្ច សហករណ៍ និងគ្រួសារផលិតចូលរួមក្នុងផ្សារណាត់ពិព័រណ៍ និងវេទិកាផ្គត់ផ្គង់តម្រូវការ OCOP ក្នុងនិងក្រៅប្រទេសផងដែរ។ តាមរយៈនេះ ផលិតផល OCOP របស់អានយ៉ាង មិនត្រឹមតែពង្រីកទីផ្សារក្នុងប្រទេសប៉ុណ្ណោះទេ ថែមទាំងឈានចូលទីផ្សារអន្តរជាតិដែលមានសក្តានុពលជាបណ្តើរៗផងដែរ។
ក្នុងក្របខ័ណ្ឌនៃវេទិកានេះ សន្និសីទផលិតផល OCOP គំរូមានការចូលរួមពីផលិតផល OCOP លំដាប់ផ្កាយ ៤ ចំនួន ២៥ មកពីខេត្តនានា។ លទ្ធផល មានផលិតផលចំនួន ១៧ ទទួលបានរង្វាន់ខ្ពស់ ដោយឡែកខេត្តអានយ៉ាង ដណ្តើមបានរង្វាន់ចំនួន ៤ ក្នុងចំណោមផលិតផលប្រកួតប្រជែងចំនួន ៦ រួមមាន៖ ទឹកត្រីប្រូតេអ៊ីនគឺមហ្វា ៤៣ ដឺក្រេ អង្ករជីមរើយ នំអាល់ម៉ុន ទឹកកេសរត្នោត។
នេះជាលើកដំបូងហើយដែលវេទិកានេះបានរៀបចំសកម្មភាពផ្សាយផ្ទាល់ដើម្បីលក់ផលិតផលដោយផ្ទាល់នៅលើវេទិកាឌីជីថល គាំទ្រធុរកិច្ចជាង ៩០ ដើម្បីផ្សព្វផ្សាយផលិតផល។ លោក ហ្វិញឡាន ម្ចាស់ហាងអាហារបីញមីញ នៅសង្កាត់ មីធើយចែករំលែកថា៖“មកទីនេះ ខ្ញុំបានកំណត់គោលដៅរបស់ខ្ញុំកាន់តែច្បាស់ ជាដំបូងគឺខិតខំដើម្បីផលិតផលសម្រេចស្តង់ដារ OCOP ក្រៅពីបណ្តាញលក់រាយ និងបណ្តាញសង្គម ការចូលរួមវេទិកាពាណិជ្ជកម្មអេឡិចត្រូនិកគឺចាំបាច់ណាស់”។
នៅក្នុងសន្និសីទតភ្ជាប់ផលិតផល OCOP តំបន់វាលរាបទន្លេគឺវឡុងជាមួយនឹងប្រព័ន្ធពាណិជ្ជកម្មទូទាំងប្រទេស តំណាងហាងលក់ទំនិញ និងប្រព័ន្ធផ្សារទំនើបបានបង្ហាញពីចំណាប់អារម្មណ៍ ចំពោះវិធីសាស្ត្រលក់ទំនិញ OCOP របស់ខេត្តអានយ៉ាង។ លើកជាគំរូ គឺផ្សារទំនើបទឺសឺន (សង្កាត់ចូវដុក) បានច្នៃប្រឌិតទម្រង់ផ្សារទំនើបចល័ត ដោយនាំយកផលិតផល OCOP ឡើងឡានដឹកទៅកាន់តំបន់ជនបទជាច្រើន។ ជាមធ្យមចំណូលសរុបនៃការធ្វើដំណើរនីមួយៗដែលមានរយៈពេលពី២ទៅ៣ថ្ងៃសម្រេចបានប្រមាណពី៣០០-៥០០លានដុង។
លោក Paul Le អនុប្រធានក្រុមហ៊ុន Central Retail Group នៃប្រព័ន្ឋផ្សារទំនើប GO បានចែករំលែកថា “ខ្ញុំពិតជាចូលចិត្តផលិតផល OCOP របស់ខេត្តអានយ៉ាងណាស់ ជាពិសេសគឺទឹកត្រីភូក្វុក។ នាពេលខាងមុខនេះនឹងជាផលិតផលដែលខ្ញុំណែនាំចូលផ្សារទំនើបនៅប្រទេសបារាំង”។
ឱកាសថ្មី គោលដៅថ្មី
យោងតាមលោក ងោកុងធឹក អនុប្រធានគណៈកម្មាធិការប្រជាជនខេត្តអានយ៉ាង បានឲ្យដឹងថា នៅក្នុងវេទិកាឆ្នាំនេះ ធុរកិច្ច សហករណ៍ និងប្រធានកម្មនានាបានមានចក្ខុវិស័យទូទៅអំពីទំនាក់ទំនងតភ្ជាប់ពាណិជ្ជកម្មផលិតផល OCOP។ ទម្រង់ ២២ គឺជាការប្តេជ្ញាចិត្តយ៉ាងមុតមាំរបស់ខេត្តក្នុងការធ្វើឌីជីថល OCOP ផលិតផលពិសេស និងទេសចរណ៍ ដោយភ្ជាប់អានយ៉ាង ជាមួយប្រទេសទាំងមូល និងពិភពលោក។ នេះក៏ជារបត់ដ៏សំខាន់មួយ ដើម្បីជួយសម្រេចបាននូវគោលដៅដោយចីរន្តរភាពនៃការតភ្ជាប់សសរស្តម្ភទាំងបី គឺ កសិកម្ម - ឧស្សាហពាណិជ្ជកម្ម - ទេសចរណ៍។
ឈានចូលដំណាក់កាលថ្មី អានយ៉ាងបានកំណត់ថា ដល់ឆ្នាំ ២០៣០ កម្មវិធី OCOP មិនត្រឹមតែបង្កើនតម្លៃផលិតផលប៉ុណ្ណោះទេ តែថែមទាំងជាកម្លាំងចលករសម្រាប់អភិវឌ្ឍន៍សេដ្ឋកិច្ចជនបទ ដោយភ្ជាប់យ៉ាងជិតស្និទ្ធជាមួយទេសចរណ៍ ពាណិជ្ជកម្ម និងសមាហរណកម្មអន្តរជាតិ។ ខេត្តផ្តោតលើការធ្វើឲ្យដំណើរការផលិតកម្មស្របតាម ស្តង់ដារអន្តរជាតិ អភិវឌ្ឍផលិតផលសរីរាង្គធានាបានការតាមរកដើមប្រភពដោយតម្លាភាព ត្រៀមខ្លួនធ្វើសញ្ជ័យទីផ្សារពិបាក។ ទន្ទឹមនឹងនោះ ខេត្តអភិវឌ្ឍន៍ទម្រង់ OCOP ផ្សារភ្ជាប់នឹងទេសចរណ៍ ក្រឡាផលិតផលពិសេសក្លាយជាអំណោយពិសេសសម្រាប់បម្រើភ្ញៀវទេសចរ។
លោក ឡេហ៊ូតន ប្រធានមន្ទីរកសិកម្ម និងបរិស្ថាន បានកត់សម្គាល់ថា ប្រធានកម្មរបស់ផលិតផល OCOP នៅលើភូមិសាស្ត្រខេត្តចាំបាច់ត្រូវតែកំណត់ច្បាស់លាស់នូវឧត្តមភាព និងការផ្លាស់ថ្មីឥតឈប់ឈរ។ ក្នុងនោះ ផ្តោតលើការបង្កើនគុណភាពខាងក្នុងតាមរយៈការកែច្នៃ និងអនុវត្តបច្ចេកវិជ្ជា ដោយប្រមូលផ្តុំក្នុងការកែលម្អស្លាកសញ្ញា និងការវេចខ្ចប់ផលិតផលដើម្បីមានសញ្ញាសម្គាល់ដោយឡែក គ្រប់កម្លាំងប្រកួតប្រជែង។ វិស័យកសិកម្ម និងបរិស្ថានកំពុងផ្តោតសំខាន់លើការរៀបចំផែនការតំបន់វត្ថុធាតុដើមធំល្មម ដើម្បីប្រធានកម្ម (ជាពិសេសគឺប្រធាកម្មធុរកិច្ច និងសហករណ៍) និងប្រជាជនគ្រប់កម្លាំង និងគ្រប់វត្ថុធាតុដើមផ្គត់ផ្គង់ផលិតផលយូរអង្វែង ចីរភាព និងស្ថិរភាពនៅពេលបានតភ្ជាប់។
បច្ចុប្បន្ននេះ ប្រធានកម្មនានាបានបង្កើតបណ្តាញពាណិជ្ជកម្មអេឡិចត្រូនិកលើវេទិកាឌីជីថល ដើម្បីណែនាំ ផ្សព្វផ្សាយ និងលក់ផលិតផល OCOP។ ខេត្តនឹងបន្តជំរុញខ្លាំងការចែកចាយលើវេទិកាពាណិជ្ជកម្មអេឡិចត្រូនិក ប្រព័ន្ធផ្សារទំនើប និងមជ្ឈមណ្ឌលពាណិជ្ជកម្ម។ទន្ទឹមនិងនោះ បង្កើនការតភ្ជាប់តំបន់ ដើម្បីបង្កើតខ្សែចង្វាក់តម្លៃ OCOP ក្នុងតំបន់ទាំងមូល បើកទូលាយការនាំចេញទៅប្រទេសអាស៊ាននិងទីផ្សារសក្តានុពលផ្សេងទៀត ជាបណ្តើរៗកសាងពាណិជ្ជសញ្ញាOCOP លំដាប់ជាតិនិងអន្តរជាតិ។
វេទិកាតភ្ជាប់ការប្រើប្រាស់ផលិតផល OCOP នៅតំបន់វាលរាបទន្លេគឺវឡុងឆ្នាំ ២០២៥ បានប្រមូលផ្តុំស្តង់ទំនិញចំនួន ២២៦ ជាមួយនឹងផលិតផល OCOP ប្រហែល ៥.៤០០ និងផលិតផលពិសេសរបស់ធុរកិច្ចចំនួន ៨៣ មកពីខេត្តអានយ៉ាង និងខេត្ត-ក្រុងទាំង ១២ ក្នុងទូទាំងប្រទេស។ បន្ទាប់ពីរយៈពេល៤ ថ្ងៃប្រព្រិត្តទៅ បរិយាកាសតាំងបង្ហាញផលិតផល OCOP បានស្វាគមន៍ភ្ញៀវមកពីក្នុង និងក្រៅខេត្តជាង ១០ពាន់នាក់មកទស្សនា និងទិញទំនិញ។ |
ប្រែ៖ ណារីពៅ
