នៅថ្ងៃទី ១៦ មិថុនា គណៈប្រតិភូការងារដឹកនាំដោយលោកស្រី ង្វៀនធីមិញធ្វី អនុប្រធានគណៈកម្មាធិការប្រជាជនខេត្តអានយ៉ាង ប្រធានគណៈកម្មការណែនាំការប្រឡងសញ្ញាបត្រមធ្យមសិក្សាទុតិយភូមិខេត្តអានយ៉ាង បានអញ្ជើញទៅត្រួតពិនិត្យការងារត្រៀមបម្រុងមុនពេលប្រឡងនៅក្រុមប្រឹក្សាប្រឡង និងនៅតាមទីតាំងប្រឡងនៅលើភូមិសាស្ត្រខេត្ត។
ជាក់ស្តែង គណៈប្រតិភូបានត្រួតពិនិត្យការងារត្រៀមបម្រុងការប្រឡងសញ្ញាបត្រមធ្យមសិក្សាទុតិយភូមិនៅទីតាំងប្រឡងនៃវិទ្យាល័យប៊ិញមី (ស្រុកចូវភូ)។ នៅទីនេះ គណនាយកសាលាបានរាយការណ៌ជាមួយគណៈប្រតិភូអំពីការងារត្រៀមបម្រុងដូចជា៖ មូលដ្ឋានសម្ភារៈ កងជួរកម្មាភិបាលដែលបំពេញកាតព្វកិច្ច ការងាររម្លឹកមេរៀន និងការឧបត្ថម្ភសម្រាប់បេក្ខជនចូលរួមប្រឡង។
បន្ទាប់ពីត្រួតពិនិត្យ លោកស្រី ង្វៀនធីមិញធ្វី អនុប្រធានគណៈកម្មាធិការប្រជាជនខេត្តអានយ៉ាង បានទទួលស្គាល់ និងវាយតម្លៃខ្ពស់ចំពោះភាពសកម្ម របស់វិទ្យាល័យប៊ិញមីក្នុងការងារត្រៀមបម្រុង។ ស្នើឲ្យអង្គភាពបន្តពិនិត្យមើលឡើងវិញ និងជម្នះនូវបញ្ហាកកស្ទះ។ បង្កើតបែបផែនត្រៀមជាបន្ទាន់សម្រាប់គ្រប់ស្ថានភាព។ ទន្ទឹមនឹងនោះ លើកទឹកចិត្តប្អូនៗសិស្សថ្នាក់ទី១២ នៃវិទ្យាល័យប៊ិញមី ឲ្យថែរក្សាសុខភាព និងផ្តោតលើការរម្លឹកមេរៀនឡើងវិញសម្រាប់ការប្រឡង ហើយសូមជូនពរប្អូនៗសិស្សឲ្យមានភាពស្ងប់ស្ងាត់ មានទំនុកចិត្ត និងទទួលបានលទ្ធផលខ្ពស់ក្នុងការប្រឡង។ មុននោះ លោកស្រី ង្វៀនធីមិញធ្វី អនុប្រធានគណៈកម្មាធិការប្រជាជនខេត្តអានយ៉ាង បានត្រួតពិនិត្យទីតាំងផ្តិត និងចម្លងសំណួរប្រឡង ហើយស្នើឲ្យមន្ទីរអប់រំ និងបណ្តុះបណ្តាល សហការយ៉ាងជិតស្និទ្ធជាមួយវិស័យ និងអង្គភាពពាក់ព័ន្ធដើម្បីបន្តបំពេញការងារត្រៀមប្រឡង ជាពិសេស គឺការងារធានាសន្តិសុខ សណ្តាប់ធ្នាប់នៅតាមទីតាំងប្រឡង ដើម្បីការប្រឡងប្រព្រឹត្តទៅដោយរលូន ជោគជ័យ និងប្រសិទ្ធភាព។
បេក្ខជនចុះឈ្មោះចូលរួមប្រឡងសញ្ញាបត្រមធ្យមសិក្សាទុតិយភូមិឆ្នាំ២០២៥ ជាសរុបប្រមាណ ២១.២៦១នាក់។ ខេត្តទាំងមូលមានទីតាំងប្រឡងចំនួន ៤៨ កន្លែង និងទីតាំងប្រឡងបម្រុង ១ កន្លែង ជាមួយនឹងបន្ទប់ប្រឡងចំនួន ១.០៥៣ បន្ទប់៕
ប្រែ៖ ណារីពៅ
