នៅថ្ងៃទី៣០ ខែមិថុនា សមាគមធុរជនវ័យក្មេងវៀតណាម បានសហការជាមួយសមាគមធុរកិច្ចវ័យក្មេងខេត្តអានយ៉ាង រៀបចំវេទិកាសន្ទនាថ្នាក់មូលដ្ឋាន និងវេទិកាសេដ្ឋកិច្ចឯកជនវៀតណាម ២០២៦ (VPSF 2026) នៅខេត្តអានយ៉ាង ក្រោមប្រធានបទ៖ “សេដ្ឋកិច្ចឯកជនវៀតណាម៖ មានភាពវាយទម្លុះពីទម្រង់ស្ថាប័ន- រដ្ឋ និងឯកជនរួមគ្នា - ឆ្ពោះទៅយុគសម័យឈានឡើង”។
អញ្ជើញចូលរួមមាន លោក ហូ វ៉ាន់ ម៉ឹង សមាជិកគណៈកម្មាធិការមជ្ឈិមបក្ស អនុលេខាបក្សខេត្ត និងជាប្រធានគណៈកម្មាធិការប្រជាជនខេត្តអានយ៉ាង។ លោក ឡេ មិញ ហ្វ័ន អតីតសមាជិកគណៈកម្មាធិការមជ្ឈិមបក្ស និងជាអតីតអនុប្រធានរដ្ឋសភា។ លោក ឡេ ទ្រុង ហូ អនុប្រធានគណៈកម្មាធិការប្រជាជនខេត្ត ព្រមទាំងតំណាងមន្ទីរ គណៈ ផ្នែកពាក់ព័ន្ឋ។ អ្នកជំនាញការសេដ្ឋកិច្ច អ្នកវិទ្យាសាស្ត្រ តំណាងសហសមាគមធុរកិច្ច ធុរជននិងសហគមន៍ធុរកិច្ចនៅលើភូមិសាស្ត្រខេត្តជាច្រើនកុះករ។
កម្មវិធីនេះជាសកម្មភាពមួយក្នុងក្របខណ្ឌ VPSF ២០២៦ ដែលជាវេទិកាសន្ទនាគោលនយោបាយសំខាន់ រៀបចំដោយសមាគមធុរជនវ័យក្មេងវៀតណាម សំដៅបង្កើតវេទិកាសន្ទនាមានប្រសិទ្ធភាព និងពហុវិមាត្ររវាងសហគមន៍ធុរកិច្ចឯកជន និងអាជ្ញាធរគ្រប់លំដាប់ថ្នាក់។ តាមរយៈនោះ រួមចំណែកកសាងបរិយាកាសវិនិយោគ និងធ្វើអាជីវកម្មមានតម្លាភាព ងាយស្រួល ប្រសិទ្ធភាព និងចីរភាព។
ថ្លែងមតិអបអរសាទរ លោក ហូ វ៉ាន់ ម៉ឹង ប្រធានគណកម្មាធិការប្រជាជនខេត្តបានបញ្ជាក់ថា វិស័យសេដ្ឋកិច្ចឯកជនបានរួមចំណែកយ៉ាងសំខាន់ក្នុងការជំរុញកំណើនសេដ្ឋកិច្ច និងការអភិវឌ្ឍរបស់ខេត្ត តំបន់វាលរាបទន្លេគឺវឡុង និងនៅក្នុងប្រទេសទាំងមូល។ ដូច្នេះ ភាពជោគជ័យរបស់ធុរកិច្ច គឺជាការអភិវឌ្ឍរបស់ខេត្តអានយ៉ាង។ តាមនោះខេត្តអានយ៉ាងបានសន្យាថានឹងប្តេជ្ញាចិត្តស្តាប់យោបល់ រួមដំណើរជាមួយធុរកិច្ចជានិច្ច ដើម្បីដោះស្រាយការលំបាក និងបញ្ហាទាក់ទិនបានទាន់ពេលវេលា។ បង្កើតលក្ខខណ្ឌអំណោយផលបំផុតសម្រាប់ធុរកិច្ចមានទំនុកចិត្តក្នុងការវិនិយោគ ពង្រីកផលិតកម្មអាជីវកម្ម ផ្លាស់ថ្មីច្នៃប្រឌិត និងអភិវឌ្ឍដោយចីរភាព។
តាមរយៈវេទិកានេះ ខេត្តអានយ៉ាងសង្ឃឹមថានឹងទទួលបានយោបល់ និងសំណើល្អៗពីអតីតថ្នាក់ដឹកនាំ អ្នកជំនាញការ និងវាគ្មិន ដើម្បីស្ថាប័នមានភាពវាយទម្លុះបង្កើនកិច្ចសហការរវាងរដ្ឋនិងឯកជន និងជំរុញសេដ្ឋកិច្ចឯកជនអភិវឌ្ឍជាបន្តទៀត។
លោក ហូ វ៉ាន់ ម៉ឹង ប្រធានគណៈកម្មាធិការប្រជាជនខេត្តបានឲ្យដឹងថា រយៈពេលកន្លង ខេត្តបានអនុវត្តវិធានការជាច្រើន ដើម្បីបំពេញបន្ថែមបទប្បញ្ញត្តិ យន្តការ និងគោលនយោបាយ ដើម្បីជំរុញកិច្ចសហការរវាងរដ្ឋ និងឯកជន បើកចំហប្រភពធនធាន និងបង្កើតកម្លាំងជំរុញថ្មីសម្រាប់ការអភិវឌ្ឍសេដ្ឋកិច្ចឯកជន។
នៅឆ្នាំ២០២៥ អានយ៉ាងសម្រេចបានអត្រាកំណើនសេដ្ឋកិច្ច ៨,៣៩% ខ្ពស់ជាងគេនៅតំបន់វាលរាបទន្លេគឺវឡុង។ នៅក្នុងសន្ទស្សន៍សេដ្ឋកិច្ច-សង្គមរបស់ខេត្តអានយ៉ាងសម្រាប់ឆ្នាំ២០២៦ ខេត្តមានសន្ទស្សន៍ប្រមូលទុនវិនិយោគសរុបចំនួន ១១៣ ពាន់ពាន់លានដុង។ ក្នុងនោះ វិនិយោគសាធារណៈស្មើអត្រា ២៨ ពាន់ពាន់លានដុង នៅសល់ប្រមាណ ៨៥ ពាន់ពាន់លានដុង ភាគច្រើនផ្អែកលើសមសភាគសេដ្ឋកិច្ចផ្សេងៗ ជាពិសេសគឺសេដ្ឋកិច្ចឯកជន។
បន្ទាប់ពីការរួមបញ្ចូលគ្នា អានយ៉ាងមានផ្ទៃដីធំជាងគេនៅតំបន់វាលរាបទន្លេគឺវឡុង ប្រមាណ ១០.០០០ គីឡូម៉ែត្រការ៉េ និងមានប្រជាសាស្ត្រឈរលំដាប់ទី៣ទូទាំងប្រទេស ប្រមាណ ៥,៩២ លាននាក់។ ខេត្តបានប្រកាសកែសម្រួលផែនការអភិវឌ្ឍខេត្តអានយ៉ាង សម្រាប់ដំណាក់កាល២០២១-២០៣០ និងចក្ខុវិស័យដល់ឆ្នាំ២០៥០ ដោយមានចំណុចថ្មីជាច្រើន ផ្តោតលើតំបន់សេដ្ឋកិច្ចសំខាន់ៗចំនួន ៥ យកតំបន់ពិសេសភូគ្វឹកជា “ក្បាលនាវា” នាំផ្លូវក្នុងការអភិវឌ្ឍសេដ្ឋកិច្ច។ ជាមួយគ្នានេះដែរ ខេត្តកំពុងជំរុញគម្រោងហេដ្ឋារចនាសម្ព័ន្ធចរាចរណ៍សំខាន់ៗ។ ក្នុងនោះ មានផ្លូវល្បឿនលឿន ចូវដុក-កឹនធើ-សុកត្រាំងផ្លូវ N1 ស្របតាមព្រំដែន ខេត្តកំពុងសហការជាមួយក្រសួង ផ្នែកនានា ដើម្បីស្នើសុំការអនុម័តគម្រោងផ្លូវល្បឿនលឿន ហាទៀន-រ៉ាច់យ៉ា-បាក់លៀវ។
ដើម្បីវិស័យកសិកម្មជាសសរស្តម្ភពិតប្រាកដនៃខឿនសេដ្ឋកិច្ច និងធានានូវគោលដៅកំណើនសេដ្ឋកិច្ច ដូចដែលលោក ហូ វ៉ាន់ ម៉ឹង បានលើកឡើង ខេត្តអានយ៉ាងគួរតែបំបែហេដ្ឋារចនាសម្ព័ន្ធសេដ្ឋកិច្ច និងបង្កើនជាសន្សឹមៗនូវវិស័យឧស្សាហកម្ម ហើយកាត់បន្ថយជាសន្សឹមៗនូវវិស័យកសិកម្ម ដោយភ្ជាប់កសិកម្មជាមួយឧស្សាហកម្មកែច្នៃជ្រៅ ដូចជា ការផលិតកូឡាជែន អូមេហ្គា៣ និងឱសថធម្មជាតិតំបន់បៃនូយជាដើម។ ទន្ទឹមនឹងនេះ ជំរុញខ្លាំងការបំបែសេដ្ឋកិច្ចកសិកម្មពហុតម្លៃដោយរួមបញ្ចូលការផលិតស្រូវអង្ករ កែច្នៃកសិកម្ម ជាមួយវិស័យទេសចរណ៍ និងសេវាកម្មនៅលើវាលស្រែ។
ថ្លែងមតិបើកកម្មវិធី លោក ដាំង ហុង អាញ់ អនុប្រធានសហសមាគមយុវជនវៀតណាម និងជាប្រធានសមាគមធុរជនវ័យក្មេងវៀតណាម បានសង្កត់ធ្ងន់ថា វេទិកាសន្ទនាខេត្តអានយ៉ាង បានប្រព្រឹត្តទៅក្នុងបរិបទដែលមូលដ្ឋានកំពុងមានឱកាសអភិវឌ្ឍធំៗពីបរិយាកាសអភិវឌ្ឍថ្មីបន្ទាប់ពីរួមបញ្ចូលគ្នា។ ជាមួយនឹងប្រៀបខ្លាំងពិសេសពីតំបន់ព្រំដែន តំបន់វាលរាប សមុទ្ទនិងកោះ កសិកម្ម logistics ពាណិជ្ជកម្មតាមព្រំដែន ទេសចរណ៍ និងសេដ្ឋកិច្ចសមុទ្ទ អានយ៉ាងមានសក្តានុពលធំទូលាយដើម្បីបង្កើតកម្លាំងជំរុញថ្មីសម្រាប់តំបន់សេដ្ឋកិច្ចឯកជន។
យោងតាមលោក ដាំង ហុង អាញ់ បញ្ហាសំខាន់គឺ ត្រូវធ្វើយ៉ាងណាដើម្បីប្រែក្លាយសក្តានុពល និងអត្ថប្រយោជន៍ទាំងនេះ ឲ្យក្លាយជាសមត្ថភាពប្រកួតប្រជែង និងជាកម្លាំងជំរុញពិតប្រាកដសម្រាប់ធុរកិច្ច និងប្រជាពលរដ្ឋ។ មិនត្រឹមតែបង្អង់នៅត្រឹមតែការបង្ហាញពីការលំបាកឬទទួលសំណើប៉ុណ្ណោះទេ នេះជាការសន្ទនាពិតប្រាកដរវាងធុរកិច្ច អាជ្ញាធរ អ្នកជំនាញការ និងអ្នកវិទ្យាសាស្ត្រ ដើម្បីរួមគ្នារកឃើញចំណុចស្ទះ ស្នើដំណោះស្រាយ និងជំរុញការកែលម្អគោលនយោបាយ។ សមាគមធុរជនវ័យក្មេងវៀតណាមសង្ឃឹមថានឹងបានរួមដំណើរជាមួយខេត្តអានយ៉ាងនៅក្នុងទិដ្ឋភាពទាំង ៣ ជាបន្តទៀត។ នោះគឺការតភ្ជាប់គោលនយោបាយ ការតភ្ជាប់ទីផ្សារ និងការកសាងស្ថាប័នធុរកិច្ចថ្មី-មានភាពក្លាហានជាង ច្នៃប្រឌិតជាង និងមានការទទួលខុសត្រូវខ្ពស់ជាង។
ក្នុងក្របខ័ណ្ឌកម្មវិធី អ្នកជំនាញការ និងអ្នកវិទ្យាសាស្ត្របានចែករំលែកទស្សនៈស៊ីជម្រៅជាច្រើន និងបង្ហាញពីយុទ្ធសាស្ត្រអភិវឌ្ឍន៍សំខាន់ៗសម្រាប់ខេត្តអានយ៉ាង។ មតិយោបល់ទាំងនេះផ្តោតលើការវិភាគនិន្នាការម៉ាក្រូសេដ្ឋកិច្ច លំហូរវិនិយោគ កម្លាំងជំរុញកំណើនថ្មី ក៏ដូចជាសក្តានុពលអភិវឌ្ឍរបស់មូលដ្ឋានក្នុងបរិកាសអភិវឌ្ឍទូលំទូលាយ។
អ្នកជំនាញការបានបញ្ជាក់ថា អានយ៉ាងកំពុងមានសក្តានុពលពិសេសដែលកម្រ ដោយមានតំបន់វាលរាប មានតំបន់ព្រំដែន មានសមុទ្ទនិងកោះ មានកសិកម្ម ទេសចរណ៍ ភស្តុភារកម្ម និងសេដ្ឋកិច្ចច្រកទ្វារព្រំដែន។ នេះជាគ្រឹះដ៏សំខាន់សម្រាប់មូលដ្ឋានបង្កើតកំណើនថ្មី ប្រសិនបើទាញយកផលមានប្រសិទ្ឋភាពពីឧត្តមភាពប្រៀបធៀប និងលើកកម្ពស់សមត្ថភាពប្រកួតប្រជែង។
បទបង្ហាញពីអ្នកជំនាញការក៏បានសង្កត់ធ្ងន់លើការផ្លាស់ប្តូរទម្រង់អភិវឌ្ឍតាមទិសដៅបៃតង ចីរភាព និងផ្អែកលើនវានុវត្តន៍ផងដែរ។ ក្នុងនោះ កសិកម្មបច្ចេកវិទ្យាខ្ពស់ កែច្នៃជ្រៅ ភស្តុភារកម្ម ទេសចរណ៍គុណភាពខ្ពស់ និងការផ្លាស់ប្តូរឌីជីថល ត្រូវបានកំណត់ថាជាវិស័យមានសក្តានុពលធំមានភាពវាយទម្លុះ៕
ប្រែ៖ ណារីពៅ
