ចាប់ពីថ្ងៃទី ២៥ ខែតុលា ដល់ថ្ងៃទី ៤ ខែវិច្ឆិកា ឆ្នាំ ២០២៥ នៅមជ្ឈមណ្ឌលផ្សារណាត់វៀតណាម (ទីក្រុងហាណូយ) ខេត្តអានយ៉ាង បានចូលរួមផ្សារណាត់រដូវរងារឆ្នាំ ២០២៥ លើកទីមួយ ដើម្បីផ្សព្វផ្សាយសក្តានុភាព និងប្រៀបខ្លាំងទៅអង្គការ និងអាជីវកម្មក្នុងនិងក្រៅប្រទេស។
មកជាមួយនឹងព្រឹត្តិការណ៍នេះ ខេត្តអានយ៉ាង បានចូលរួមដាក់តាំងបង្ហាញនៅតំបន់ចំនួន ៣ រួមមាន៖ តំបន់ស្តង់ទំនិញពាណិជ្ជកម្ម តំបន់ស្តង់ទំនិញទេសចរណ៍ និងស្តង់ទំនិញម្ហូបអាហារ។ ជាក់ស្តែង តំបន់ស្តង់ទំនិញពាណិជ្ជកម្មដាក់តាំងផលិតផលជាង ៣០០មុខ គឺជាផលិតផល OCOP ផលិតផលឧស្សាហកម្ម ផលិតផលពាណិជ្ជកម្ម ទំនិញប្រើប្រាស់ដែលមានសក្តានុភាពនាំចេញរបស់ងាជីវកម្មចំនួន ១៧ ក្នុងខេត្ត។
ជាពិសេស ក្នុងក្របខ័ណ្ឌនៃការពិព័រណ៍រួមដែលដឹកនាំដោយក្រសួងវប្បធម៌ កីឡា និងទេសចរណ៍ ស្តង់ទំនិញទេសចរណ៍អានយ៉ាង ក្រោមប្រធានបទ "អានយ៉ាង - គោលដៅមកកាន់ដោយសុវត្ថិភាព មិត្តភាព និងទាក់ទាញ" បានឧទ្ទេសនាមអំពីសក្តានុភាព ប្រៀបខ្លាំងអំពីធនធានទេសចរណ៍របស់ខេត្តទៅដល់អាជីវកម្ម និងភ្ញៀវទេសចរ។ អមដំណើរជាមួយសកម្មភាពផ្សព្វផ្សាយទេសចរណ៍ខេត្តអានយ៉ាង មានអង្គភាពចូលរួមចំនួន ៤ រួមមាន៖ មជ្ឈមណ្ឌលជំរុញពាណិជ្ជកម្ម និងទេសចរណ៍ហាទៀន ដំណើរកម្សាន្ត Polou trip Victoria និងអង្គភាពភូក្វុកមួយ តាំងបង្ហាញពីផលិតផលបោះពុម្ពផ្សាយផ្សព្វផ្សាយទេសចរណ៍។
ជាមួយនឹងស្តង់ទំនិញម្ហូបអាហារ ភ្ញៀវទេសចរនឹងបានរីករាយជាមួយមុខម្ហូបពិសេសៗរបស់ខេត្តដូចជា៖ បាយស្រូបអង្ករបាក់ឡុងស្វៀន នំបញ្ជុកត្រីអានយ៉ាង បង្អែមត្នោតជាដើម។ តាមរយៈនោះ ជួយផ្សព្វផ្សាយរូបភាពវប្បធម៌ ណែនាំមុខម្ហូបពិសេសរបស់ខេត្តអានយ៉ាង និងភូមិភាគនិរតីទៅដល់ប្រជាជនរដ្ឋធានី និងភ្ញៀវទស្សនាផ្សារណាត់។
ផ្សារណាត់រដូវរងារលើកទីមួយ ឆាំ្ន២០២៥ គឺជាព្រឹត្តិការណ៍ថ្នាក់ជាតិ បើកចេញបរិយាកាសទំនាក់ទំនងពាណិជ្ជកម្ម និងចង្វាក់សមាហរណកម្មនៃពាណិជ្ជសញ្ញាវៀត។ ព្រឹត្តិការណ៍នេះមានទ្រង់ទ្រាយស្តង់ទំនិញជាង ៣ពាន់របស់អាជីវកម្មជិត ២ពាន់ ៥០០ មកពីខេត្ត ក្រុងចំនួន ៣៤ គឺជាចំណុចណាត់សម្រាប់សកម្មភាពផ្សព្វផ្សាយពាណិជ្ជកម្ម ផ្សព្វផ្សាយផលិតផល និងការតភ្ជាប់ទីផ្សាររបស់សហគមន៍អាជីវកម្មក្នុងប្រទេសទាំងមូល៕
ប្រែ៖ ណារីពៅ
