នៅសល់តែជិតពីរខែទៀតប៉ុណ្ណោះ ខេត្តអានយ៉ាង កំពុងកៀរគររាល់ប្រភពធនធាន ឲ្យផ្សព្វផ្សាយព្រមៗគ្នានូវដំណោះស្រាយទម្លុះទម្លាយលើវិស័យសេដ្ឋកិច្ចទាំងអស់ ដោយប្តេជ្ញាចិត្តសម្រេចបានគោលដៅកំណើនសេដ្ឋកិច្ច (GRDP) នៅឆ្នាំ ២០២៥ ក្នុងអត្រាពី ៨,៥% ឡើងទៅ។
ទោះបីជានៅតែមានបញ្ហាប្រឈម និងការលំបាកជាច្រើនក្តី ប៉ុន្តែផ្អែកលើមូលដ្ឋាននៃចំណុចភ្លឺក្នុងរូបភាពសេដ្ឋកិច្ច ១០ ខែដើមឆ្នាំ ២០២៥ ខេត្តអានយ៉ាង កំពុងផ្តោតលើការពន្លឿនល្បឿននៅចុងឆ្នាំ។ ថ្នាក់ដឹកនាំខេត្តអានយ៉ាង បានសង្កត់ធ្ងន់ថា ដោយផ្អែកលើលទ្ធផល ១០ ខែដំបូងនៃឆ្នាំនេះ ខេត្តបានវាយតម្លៃសក្តានុពល និងសក្តានុពល អភិវឌ្ឍកំណើនសេដ្ឋកិច្ចក្នុងត្រីមាសទី ៤ រួមជាមួយនឹងការព្យាករណ៍ស្ថានភាពក្នុងប្រទេស និងពិភពលោក គោលដៅកំណើន ៨,៥% គឺជាភារកិច្ចប្រឈម ចាំបាច់ត្រូវតែប្តេជ្ញាចិត្ត ប្រមូលផ្តុំរាល់ធនធាន ធ្វើសកម្មភាពដ៏ខ្លាំងក្លា និងស៊ីសង្វាក់គ្នា។ ខេត្តប្រមូលផ្តុំផ្សប្វផ្សាយអនុវត្តសេចក្តីសន្និដ្ឋានលេខ ១២៣-KL/TW ចុះថ្ងៃទី ២៤ ខែមករា ឆ្នាំ ២០២៥ របស់គណៈកម្មាធិការមជ្ឈិមបក្ស អត្រាកំណើនត្រីមាសទី ៤ ឆ្នាំ ២០២៥ ត្រូវសម្រេចឲ្យបានពី ១០,៣៩% ឡើងទៅដើម្បីពេញមួយឆ្នាំ សម្រេចបាន ៨,៥%។
យោងតាមនោះ ក្នុងវិស័យបញ្ចេញថវិកាទុនវិនិយោគសាធារណៈ គិតត្រឹមថ្ងៃទី១០ ខែវិច្ឆិកា ឆ្នាំ២០២៥ ខេត្តបានបញ្ចេញថវិកាជាង ១១.១៣៥ ពាន់លានដុង ស្មើនឹង ៦០,១២% ផែនការដែលលោកនាយករដ្ឋមន្ត្រីប្រគល់ឲ្យ និង ៤២,៧១%ផែនការដែលក្រុមប្រឹក្សាប្រជាជនខេត្តប្រគល់។ ចំនួនដើមទុនដែលនៅសេសសល់ចាំបាច់ត្រូវបញ្ចេញថវិកាដល់បំណាច់ខែមករា ឆ្នាំ២០២៦ ជាង ១៤.៩៣៥ពាន់លានដុង ជាមធ្យមជិត ៥.០០០ពាន់លានដុង/ខែ។ ដូច្នេះ ខេត្តផ្តោតខ្លាំងក្លាលើការដោះស្រាយបញ្ហាកក់ស្ទះ ជាពិសេសគឺគម្រោងសំខាន់ៗ ពិសេសជាងទៀតគឺសំណង់បម្រើ APEC ២០២៧។
ដូច្នេះខេត្តត្រូវបង្កើនការទទួលខុសត្រូវក្នុងការងារបញ្ចេញថវិកាផែនការទុនសាធារណៈដោយវិធីសាស្ត្រ “ច្បាស់ ៦” គឺច្បាស់មនុស្ស ច្បាស់ការងារ ច្បាស់ទំនួលខុសត្រូវ ច្បាស់សមត្ថកិច្ច ច្បាស់ពេលវេលា និងច្បាស់លទ្ធផល ធានាថាសម្រេចបាននូវគោលដៅបញ្ចេញថវិកាទុនវិនិយោគសាធារណៈ ១០០% នៅឆ្នាំ២០២៥។ ខេត្តផ្តោតលើការយកចិត្តទុកដាក់ និងប្តេជ្ញាកែតម្រូវយ៉ាងម៉ឺងម៉ាត់ចំពោះកន្លែងដែលផ្សព្វផ្សាយអនុវត្តយឺតយ៉ាវ ស្មារតីមិនទាន់ខ្លាំងក្លា និងមិនសម្រេចគោលដៅបញ្ចេញថវិកាឆ្នាំ ២០២៥ គឺមិនសម្រេចភារកិច្ចនយោបាយ។
បន្ទាប់មកខេត្តផ្សព្វផ្សាយដំណោះស្រាយដើម្បីដោះស្រាយចំណុចកកស្ទះ លំបាក និងបញ្ហាទាក់ទិនសម្រាប់ផលិតកម្មអាជីវកម្ម កែលម្អបរិយាកាសវិនិយោគអាជីវកម្ម បង្កើនការទាក់ទាញវិនិយោគ និងអភិវឌ្ឍន៍ទេសចរណ៍ បង្កើតសន្ទុះដើម្បីសម្រេចបាននូវគោលដៅឆ្នាំ ២០២៥ ដោយជោគជ័យ និងបង្កើតជាមូលដ្ឋានគ្រឹះដ៏រឹងមាំសម្រាប់ដំណាក់កាល ២០២៦ - ២០៣០។
យោងតាមមន្ទីរឧស្សាហពាណិជ្ជកម្មអានយ៉ាង សន្ទស្សន៍ផលិតកម្មឧស្សាហកម្មក្នុងរយៈពេល ១០ ខែដើមឆ្នាំកើនឡើង ១៤,០៤% ធៀបនឹងដំណាលពេលនេះឆាំ្នមុន ក្នុងនោះផ្នែកកែច្នៃ និងផលិតកម្មកើនឡើងជាង ១៤%។ តម្លៃផលិតឧស្សាហកម្មសម្រេចបានជាង ៩៤.១២៦ពាន់លានដុង ជាមួយនឹងផលិតផលស្នូលជាច្រើនរក្សាបាននូវអត្រាកំណើនខ្ពស់ដូចជា៖ ជលផលសីតកម្ម កិនអង្ករ និងស៊ីម៉ងត៍ជាដើម។
លោក ង្វៀនធុងញាត់ នាយកមន្ទីរឧស្សាហពាណិជ្ជកម្មអានយ៉ាងបានចែករំលែកថា ខេត្តបន្តធ្វើសមកាលកម្មដំណោះស្រាយជំរុញផលិតកម្មឧស្សាហកម្ម សំដៅសម្រេចបាននិងលើសផែនការឆ្នាំ ២០២៥ បង្កើតសន្ទុះអភិវឌ្ឍផលិតកម្ម និងអាជីវកម្មនៅឆ្នាំ ២០២៦។ ជាក់ស្តែងគឺដោះស្រាយការលំបាក គាំទ្រអាជីវកម្មជំរុញខ្លាំងផលិតកម្ម អាជីវកម្ម ជ្រើសរើសពលករ ធានានូវប្រភពទព្វសម្ភារៈ មិនធ្វើឲ្យអាក់ខានខ្សែសង្វាក់ផលិតកម្មនិងផ្គត់ផ្គង់។ ជាពិសេសរីកចម្រើនខ្លាំងខាងវិស័យកែច្នៃ និងផលិត ផលិតនូវផលិតផលសំខាន់ៗដូចជា៖ ជលផលសីតកម្ម ត្រីប្រា ត្រីកំប៉ុង អង្ករ សម្លៀកបំពាក់-ស្បែកជើងស្បែក ឈើMDF សំបកខ្ចប់ ស៊ីម៉ងត៍ និងការទាញយកផលរ៉ែជាដើម។ ទន្ទឹមនឹងនោះ ទាក់ទាញការវិនិយោគទៅក្នុងតំបន់និងបណ្តុំឧស្សាហកម្ម បង្កើតលក្ខខណ្ឌអំណោយផលសម្រាប់អាជីវកម្មផលិតកម្ម។
នៅក្នុងវិស័យ "វិស័យឧស្សាហកម្មគ្មានផ្សែង" ចំនួនអ្នកទស្សនាសរុបក្នុងរយៈពេល ១០ ខែសម្រេចបានជាង ២១,៣៧លាននាក់ កើនឡើង ២១,៧% ធៀបនឹងដំណាលពេលនេះឆាំ្នមុន លើសផែនការឆ្នាំ ១,៥% ក្នុងនោះ ភ្ញៀវអន្តរជាតិជាង ១,៣៨ លាននាក់ កើនឡើង ៦៥,៧%។ ជាពិសេស ចំណូលសរុបរបស់វិស័យទេសចរណ៍ជាង ៥៦.០០០ពាន់លានដុង កើន ៧៨,២% ធៀបនឹងដំណាលពេលនេះឆាំ្នមុន និងលើសពីផែនការឆ្នាំ ៤២,៦%។
លោក ប៊ួយក្វុកថៃ នាយកមន្ទីរទេសចរណ៍អានយ៉ាង បានសង្កត់ធ្ងន់ថា ទោះបីជាវិស័យទេសចរណ៍អានយ៉ាង បានសម្រេចលើសផែនការឆ្នាំ ២០២៥ ក្តី ប៉ុន្តែខេត្តនៅតែបន្តជំរុញខ្លាំងសកម្មភាពរក្សាអត្រាកំណើនក្នុងរយៈពេលពីរខែចុងឆ្នាំនេះ ដើម្បីទេសចរណ៍ និងសេវាកម្មកើនឡើងខ្លាំង រួមចំណែកលើកកម្ពស់សេដ្ឋកិច្ចសង្គមនៅមូលដ្ឋាន។
យោងតាមនោះ ខេត្តបន្តជំរុញខ្លាំងការងារឃោសនា បណ្តាសកម្មភាពទេសចរណ៍ រៀបចំព្រឹត្តិការណ៍នានា ដើម្បីទាក់ទាញភ្ញៀវទេសចរ ទន្ទឹមនឹងនោះ ជំរុញការបើកជើងហោះហើរកញ្ចប់ និងផ្លូវហោះហើរថ្មីទាំងក្នុងប្រទេស និងក្រៅប្រទេស ដើម្បីបង្កើតបន្ថែមការជម្រើសសម្រាប់ភ្ញៀវទេសចរមកកាន់ខេត្តអានយ៉ាង។ ម៉្យាងវិញទៀត ជំរុញខ្លាំងការតភ្ជាប់អភិវឌ្ឍទេសចរណ៍នៅទីក្រុងហូជីមិញ និងខេត្ត ក្រុងនៃតំបន់វាលរាបទន្លេគឺវឡុង។ សហការរៀបចំកម្មវិធី Famtrip ដើម្បីណែនាំផលិតផលទេសចរណ៍ទៅកាន់តំបន់ព្រំដែន ក្រោមប្រធានបទ “មោទនភាពលើស្នាមគំនូសនៃតំបន់ព្រំដែន”។
ដើម្បីរក្សាអត្រាកំណើន និងបង្កើតជារបត់ទេសចរណ៍នៅឆ្នាំ ២០២៥ វិស័យទេសចរណ៍អានយ៉ាង បានរៀបចំព្រឹត្តិការណ៍ជំរុញពាណិជ្ជកម្ម និងទេសចរណ៍ ជាពិសេសគឺត្រៀមរៀបចំសម្រាប់រដូវបុណ្យទាននៅចុងឆាំ្ន ក្នុងឱកាសបុណ្យណូអែល - ទទួលឆ្នាំថ្មីសកល ២០២៦ បុណ្យចូលឆ្នាំប្រពៃណីវៀតណាម ២០២៦ជាដើម បានព្យាករណ៍ថានឹងទាក់ទាញភ្ញៀវទេសចរយ៉ាងច្រើនកុះករមកទស្សនា ជាពិសេសទេសចរណ៍ទៅកាន់កោះ ពេជ្យភូក្វុក នឹង "ផ្ទុះឡើង" ក្នុងឱកាសចុងឆ្នាំ។
អំពីផលិតកម្មកសិកម្ម-ដែលជា “សសរស្តម្ភ” នៃសេដ្ឋកិច្ចខេត្ត បរិមាណផលប្រមូលផលស្រូវសរុបចំនួនជាង ៧,៨៨លានតោន សម្រេចបាន ៩០,៦៥% ផែនការ។ បរិមាណជលផលជាង ១,៣៦ លានតោន កើនឡើង ៦,៦៤% ធៀបនឹងពេលនេះឆាំ្នមុន ចាប់តាំងពីពេលនេះរហូតដល់ដំណាច់ឆ្នាំ ខេត្តនឹងផ្តោតលើការយកចិត្តទុកដាក់ លើការប្រមូលផលផ្តាច់ព័ត្រស្រូវរដូវទី៣។ ជំរុញខ្លាំងផ្នែកវារីវប្បកម្ម និងអភិវឌ្ឍសត្វចិញ្ចឹម និងដាំដំណាំជាដើម ដើម្បីផ្គត់ផ្គង់ទីផ្សារចុងឆ្នាំ ដែលតម្រូវការទំនិញកើនឡើងខ្ពស់និងកែច្នៃសម្រាប់ការនាំចេញ។
ថ្នាក់ដឹកនាំមន្ទីរកសិកម្ម និងបរិស្ថានខេត្តអានយ៉ាង បានចែករំលែកថា ខេត្តជំរុញខ្លាំងទម្រង់តភ្ជាប់រវាងកសិករ សហករណ៍ និងអាជីវកម្ម ដើម្បីធានាបាននូវក្បាលចេញស្ថិរភាពសម្រាប់កសិផល ជាពិសេសគឺស្រូវអង្ករ បន្លែ និងជលផល។ បង្កើនអនុវត្តវិទ្យាសាស្ត្របច្ចេកទេស អនុវត្តបច្ចេកវិជ្ជាវប្បកម្មជឿនលឿន និងផ្លាស់ប្តូរឌីជីថលក្នុងការគ្រប់គ្រងផលិតកម្ម ដើម្បីបង្កើនផលិតភាព និងគុណភាពផលិតផល។ ជាពិសេស រក្សាស្ថិរភាពការចិញ្ចឹមសត្វ និងមច្ឆជាតិ រក្សាទម្រង់ហ្វូងបសុសត្វ និងហ្វូងបក្សី និងទំហំចិញ្ចឹមមច្ឆជាតិ ទន្ទឹមនឹងនោះគ្រប់គ្រងជំងឺរាតត្បាតនិងជំនួយបច្ចេកទេសសម្រាប់អ្នកចញ្ចឹម ដើម្បីសម្រេចបានផលិតភាព បរិមាណ និងគុណភាពខ្ពស់ សម្រាប់ផ្គត់ផ្គង់ដល់អ្នកប្រើប្រាស់ និងកែច្នៃនាំចេញ។ តាមរយៈនោះ សង្ឃឹមថានឹងរួមចំណែកដល់កំណើនសេដ្ឋកិច្ចនៃខេត្តទាំងមូល បង្កើតជាគ្រឹះអំណោយផលសម្រាប់ឆ្នាំ ២០២៦ ជាមួយនឹងវិស័យកសិកម្មទំនើប និងប្រសិទ្ធភាពជាងមុន។
ចំណុចសំខាន់ក្នុងការប្តេជ្ញាចិត្តសម្រេចគោលដៅកំណើន GRDP ៨,៥% ខេត្តផ្តោតលើការអនុវត្តមានប្រសិទ្ធភាពនូវសេចក្តីសម្រេចចិត្ត និងគោលការណ៍របស់រដ្ឋាភិបាល និងរបស់គណៈកម្មាធិការបក្សខេត្ត អំពីការរៀបចំអង្គការក្បាលម៉ាស៊ីន “តូច-ខ្លឹម-ខ្លាំង- ផលិតភាព-សុពលភាព-ប្រសិទ្ធភាព” ក្រោមការដឹកនាំរបស់ការិយាល័យនយោបាយ។ រៀបចំ បែងចែក ដោះស្រាយទីស្តីការ មូលដ្ឋានសម្ភារៈបម្រើសកម្មភាពរបស់ស្ថាប័ន អង្គការ អង្គភាពរនានាតាមទម្រង់អាជ្ញាធរមូលដ្ឋាន២ថ្នាក់ ធានាធ្វើសកម្មភាពរលូន និងមិនមានការរំខាន។
ជាមួយនឹងការប្តេជ្ញាចិត្តខ្ពស់ និងការខិតខំប្រឹងប្រែងនៃប្រព័ន្ធនយោបាយទាំងមូល ការរួមដំណើរ ផ្សារភ្ជាប់របស់អាជីវកម្មនិងចូលរួមយ៉ាងសកម្មរបស់ប្រជាជន ខេត្តអានយ៉ាងសង្ឃឹមថា ក្នុងដំណាក់កាលចុងក្រោយនៃឆ្នាំនេះ មិនត្រឹមតែទៅដល់ទីដៅដ៏អស្ចារ្យប៉ុណ្ណោះទេ ប៉ុន្តែថែមទាំងលើសពីកម្រិតកំណើន ៨,៥% ផងដែរ បង្កើតគ្រឹះសម្រាប់ការអភិវឌ្ឍនៅឆ្នាំ ២០២៦ និងកំណើនសេដ្ឋកិច្ចកើនឡើង ២ស្ទង់ក្នុងដំណាក់កាល ២០២៦-២០៣០៕
ប្រែ៖ សំណាង
