នៅរសៀលថ្ងៃទី ២៨ ខែសីហា គណៈប្រតិភូការងាររបស់សកលវិទ្យាល័យជាតិទីក្រុងហូជីមិញ ដឹកនាំដោយ សាស្ត្រាចារ្យរង បណ្ឌិត ឡឹម ក្វាង វិញ (Lâm Quang Vinh) ប្រធានគណៈវិទ្យាសាស្ត្រ និងបច្ចេកវិទ្យា នៃសកលវិទ្យាល័យជាតិទីក្រុងហូជីមិញ បានជួបពិភាក្សាការងារជាមួយថ្នាក់ដឹកនាំ និងតំណាងស្ថាប័នអង្គភាព និងមន្ទីរផ្នែកជំនាញនានារបស់ខេត្តអានយ៉ាង។ លោក វ៉ មីញ ទ្រុង (Võ Minh Trung) នាយកមន្ទីរវិទ្យាសាស្ត្រ និងបច្ចេកវិទ្យាខេត្តអានយ៉ាង បានទទួលស្វាគមន៍គណៈប្រតិភូ។
នៅក្នុងកិច្ចប្រជុំ តំណាងមកពីសកលវិទ្យាល័យនានា និងមន្ទីរ ផ្នែកជំនាញរបស់ខេត្ត បានលើកឡើងនូវសំណើជាច្រើនក្នុងវិស័យពាក់ព័ន្ធនឹងការសហការ ដូចជា៖ ការបណ្តុះបណ្តាលធនធានមនុស្សសម្រាប់ការផ្លាស់ប្តូរឌីជីថល ការបង្កើតតំបន់ដាំដុះរុក្ខជាតិឱសថ ដែលមានលក្ខណៈពិសេស ការកសាងទិន្នន័យកសិកម្មឆ្លាតវៃ ការប្រើប្រាស់អនុផលពីផលិតផលជលផល ដើម្បីអភិវឌ្ឍផលិតផលថ្មី ការអនុវត្តផែនទីឌីជីថលសម្រាប់ការអភិវឌ្ឍវិស័យទេសចរណ៍ និងក្រេឌីតកាបូនដើម្បីឆ្ពោះទៅរកការធ្វើពាណិជ្ជកម្មជាដើម។
លោក វ៉ មីញ ទ្រុង នាយកមន្ទីរវិទ្យាសាស្ត្រ និងបច្ចេកវិទ្យាខេត្តអានយ៉ាង បានឲ្យដឹងថា ខេត្តអានយ៉ាង គឺជាតំបន់យុទ្ធសាស្ត្រមួយ ដែលមានសក្តានុពល និងចំណុចខ្លាំងជាច្រើនក្នុងការអភិវឌ្ឍ សេដ្ឋកិច្ចកសិកម្ម ទេសចរណ៍ជំនឿសាសនា វប្បធម៌ និងសេដ្ឋកិច្ចក្រៅពាណិជ្ជកម្មព្រំដែន។ ទោះបីដូច្នេះ ដើម្បីអនុវត្តសម្រេចបាននូវគោលដៅអភិវឌ្ឍយ៉ាងឆាប់រហ័ស និងប្រកបដោយចីរភាព ក្នុងបរិបទថ្មី មូលដ្ឋានតែងតែយល់ដឹងយ៉ាងស៊ីជម្រៅជានិច្ចអំពី វិទ្យាសាស្ត្រ បច្ចេកវិទ្យា នវានុវត្តន៍ និងធនធានមនុស្សគុណភាព គឺជាកម្លាំងចលករដ៏សំខាន់មួយមានលក្ខណៈសម្រេច។
យោងតាមលោក វ៉ មីញ ទ្រុង នាយកមន្ទីរវិទ្យាសាស្ត្រ និងបច្ចេកវិទ្យាខេត្ត ដើម្បីពង្រីកឲ្យអស់សក្តានុពល និងចំណុចខ្លាំងរបស់ខេត្ត ត្រូវការយ៉ាងខ្លាំងនូវការគាំទ្រ ការផ្តល់ប្រឹក្សា និងសហការផ្សព្វផ្សាយភារកិច្ច និងដំណោះស្រាយនានា សម្រាប់ការអភិវឌ្ឍសេដ្ឋកិច្ច-សង្គម ពីវិទ្យាស្ថាន និងសកលវិទ្យាល័យនៅក្រៅខេត្ត។
មន្ទីរវិទ្យាសាស្ត្រ និងបច្ចេកវិទ្យា បានទទួលយកសំណើ និងមតិយោបល់របស់សាស្ត្រាចារ្យ និងតំណាងសកលវិទ្យាល័យនានា ព្រមទាំងសមាជិកគណៈប្រតិភូការងារ ហើយបញ្ចូលខ្លឹមសារទាំងនេះទៅក្នុងរបាយការណ៍ជូនគណៈអចិន្ត្រៃនិងគណៈកម្មាធិការប្រជាជនខេត្ត។
កិច្ចជួបពិភាក្សាការងាររវាងស្ថាប័ននានា ដើម្បីបង្កើតលក្ខខណ្ឌអំណោយផលសម្រាប់ភាគីទាំងពីរ ក្នុងការផ្លាស់ប្តូរ សហការ ផ្សព្វផ្សាយភារកិច្ចនានា ដែលស្ថិតក្នុងក្របខណ្ឌនៃការអនុវត្ត កិច្ចព្រមព្រៀងសហប្រតិបត្តិការរវាងគណៈកម្មាធិការប្រជាជនខេត្តអានយ៉ាង និងសកលវិទ្យាល័យជាតិទីក្រុងហូជីមីញ សម្រាប់ដំណាក់កាល ២០២៦-២០៣០ ដែលបានចុះហត្ថលេខានៅថ្ងៃទី ១៧ ខែឧសភា ឆ្នាំ ២០២៦ ដោយមានភារកិច្ចចំនួន ១៧ ។
មុននោះ គណៈប្រតិភូការងារបានអញ្ជើញទៅពិនិត្យជាក់ស្តែងនូវទម្រង់ និងគម្រោងសំខាន់ៗមួយចំនួនរបស់ខេត្តអានយ៉ាង ក្នុងវិស័យ វិទ្យាសាស្ត្រ បច្ចេកវិទ្យា នវានុវត្តន៍ ការផ្លាស់ប្តូរឌីជីថល និងការបណ្តុះបណ្តាលធនធានមនុស្សគុណភាពខ្ពស់។
តាមនោះ គណៈប្រតិភូការងារបានដំណើការពិនិត្យជាក់ស្តែង និងធ្វើការជាមួយអង្គការ អាជីវកម្ម និងសហករណ៍ដែលកំពុងធ្វើសកម្មភាពក្នុងវិស័យ ជីវបច្ចេកវិទ្យា ជីវវេជ្ជសាស្ត្រ អាហារ កសិកម្មបច្ចេកវិទ្យាខ្ពស់ ការកែច្នៃអនុផលពីផលិតផលកសិកម្ម និងជលផល ការបណ្តុះបណ្តាលនិងអភិវឌ្ឍធនធានមនុស្ស ដូចជា៖មជ្ឈមណ្ឌលជីវបច្ចេកវិទ្យា គណៈគ្រប់គ្រងតំបន់ទេសចរណ៍ជាតិភ្នំស្វាម (នៅវត្តលោកយាយភ្នំស្វាម)តំបន់ចិញ្ចឹមមច្ឆជាតិទឹកសាបរបស់ក្រុមហ៊ុនភាគហ៊ុនណាមវៀត មជ្ឈមណ្ឌលជីវបច្ចេកវិទ្យាខេត្តអានយ៉ាង កសិដ្ឋានកសិកម្ម ហៀនភឿង (សហករណ៍ តា ដាញ់) ជាដើម ដើម្បីវាយតម្លៃតម្រូវការក្នុងការសហការស្រាវជ្រាវ អនុវត្តបច្ចេកវិទ្យា ស្រាវជ្រាវវិទ្យាសាស្ត្រ និងរៀបចំកម្មវិធីបណ្តុះបណ្តាល និងបំពាក់បំប៉នជំនាញ សំដៅអភិវឌ្ឍធនធានមនុស្សនៅមូលដ្ឋាន៕
ប្រែ៖ ណារីពៅ
