នៅព្រឹកថ្ងៃទី ៦ ខែមេសា លោក ហូ វ៉ាន់ម៉ឹង សមាជិកគណៈកម្មាធិការមជ្ឈិមបក្សវៀតណាម អនុលេខាគណៈកម្មាធិការបក្សខេត្ត និងជាប្រធានគណៈកម្មាធិការប្រជាជនខេត្តអានយ៉ាង បានដឹកនាំគណៈប្រតិភូមួយក្រុមទៅសួរសុខទុក្ខ និងជូនពរឆ្នាំថ្មីដល់ជនរួមជាតិខ្មែរនៅសង្កាត់ជីឡាំង និងឃុំអានគឺ ក្នុងឱកាសបុណ្យចូលឆ្នាំថ្មីប្រពៃណីជាតិ ឆ្នាំ ២០២៦។ ចូលរួមជាមួយគណៈប្រតិភូរួមមានលោក ង្វៀន ម៉ាញ់ហា អនុប្រធានគណៈឃោសនាអប់រំ និងចលនាមហាជននៃគណៈកម្មាធិការបក្សខេត្ត ហើយនិងតំណាងថ្នាក់ដឹកនាំមកពីមន្ទីរផ្នែកពាក់ព័ន្ធ និងថ្នាក់ដឹកនាំមូលដ្ឋាន។
គណៈប្រតិភូបានអញ្ជើញមកសួរសុខទុក្ខនិងជូនពរឆ្នាំថ្មីដល់វត្តចំនួនពីរគឺវត្តធម្មនិមិត្ត និងវត្តប្រឡាយមាស ព្រមទាំងគ្រួសារគោលនយោបាយចំនួន ៤ និងកម្មាភិបាលចូលនិវត្តន៍ចំនួន៤រូប។
នៅកន្លែងនីមួយៗ លោក ហូវ៉ាន់ម៉ឹង ប្រធានគណៈកម្មាធិការប្រជាជនខេត្តអានយ៉ាង តាងនាមថ្នាក់ដឹកនាំខេត្ត បានប្រគេនពរដល់ព្រះតេជគុណ ចៅ ប្រុស សមាជិកបម្រុងក្រុមប្រឹក្សាភិបាលមជ្ឈិមសមាគមពុទ្ធសាសនាវៀតណាម អនុប្រធានគណៈភិបាលសមាគមពុទ្ធសាសនាវៀតណាមខេត្ត អនុប្រធានប្រចាំការសមាគមសាមគ្គីព្រះសង្ឃស្នេហាជាតិខេត្ត ព្រះចៅអធិការវត្តធម្មនិមិត្ត រួមជាមួយអាចារ្យ និងគណៈគ្រប់គ្រងវត្ត ជនរួមជាតិខ្មែរ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ។
ក្នុងឱកាសនេះ លោកប្រធានគណៈកម្មាធិការប្រជាជនខេត្តអានយ៉ាង សូមថ្លែងអំណរគុណយ៉ាងជ្រាលជ្រៅចំពោះព្រះតេជគុណ ចៅ ប្រុស ព្រះចៅអធិការវត្តធម្មនិមិត្ត និងព្រះតេជគុណ ចៅ កាក់ ព្រះចៅអធិការវត្តប្រឡាយមាស ដោយទំនួលខុសត្រូវរបស់ខ្លួនបានរួមជាមួយនឹងអាជ្ញាធរមូលដ្ឋាន ផ្សព្វផ្សាយ និងចលនាប្រជាជនខ្មែរឲ្យរួបរួមជាមួយប្រជាជនក្នុងខេត្តទាំងមូល ដើម្បីកសាងមាតុភូមិអានយ៉ាងឲ្យកាន់តែអភិវឌ្ឍ ជាពិសេស គឺតួនាទីរបស់ព្រះតេជគុណ ក៏បាន ចូលរួមយ៉ាងសកម្មក្នុងកម្មវិធីអភិវឌ្ឍសេដ្ឋកិច្ច-សង្គម ធានាសន្តិសុខ ការពារជាតិ ដើម្បីលើកកម្ពស់ជីវភាពរស់នៅរបស់បងប្អូនជនរួមជាតិខ្មែរ រួមចំណែកធានាសន្តិសុខនយោបាយ និងសណ្តាប់ធ្នាប់សង្គមនៅក្នុងមូលដ្ឋាន បង្កើតលក្ខខណ្ឌសម្រាប់ប្រជាជនរស់នៅ ធ្វើការ និងផលិតដោយស្ងប់ចិត្ត ក្នុងនោះមានទាំងសាជីវកម្មផងដែរ។ ក៏ដូចជា រួមចំណែកទៅក្នុងភាពជោគជ័យនៃការផ្សព្វផ្សាយ និងចលនាបងប្អូនខ្មែរឲ្យចូលរួមបោះឆ្នោតរដ្ឋសភា និងក្រុមប្រឹក្សាប្រជាជនគ្រប់លំដាប់ថ្នាក់នាពេលកន្លងទៅថ្មីៗនេះនៅលើភូមិសាស្ត្រខេត្តអានយ៉ាង។
តាមរយៈនេះ លោកប្រធានគណៈកម្មាធិការប្រជាជនខេត្តអានយ៉ាងបានសង្កត់ធ្ងន់ថា នាពេលខាងមុខ ថ្នាក់ដឹកនាំខេត្តនឹងបន្តយកចិត្តទុកដាក់ចំពោះសកម្មភាពរបស់គណៈភិបាលសមាគមព្រះពុទ្ធសាសនាវៀតណាមខេត្តនិងសមាគមសាមគ្គីភាពព្រះសង្ឃស្នេហាជាតិខេត្ត ដើម្បីធានាបាននូវការអភិវឌ្ឍ និងស្ថិរភាពជាបន្តបន្ទាប់ រួមចំណែកជាវិជ្ជមានក្នុងការរក្សាសាមគ្គីភាពប្រជាជាតិ យកចិត្តទុកដាក់ចំពោះជីវភាពរស់នៅរបស់ជនរួមជាតិខ្មែរថ្ងៃកាន់តែមានភាពរុងរឿង និងសុភមង្គល។ លោកប្រធានបង្ហាញពីការជឿជាក់និងសង្ឃឹមថា ព្រះតេជគុណនឹងយកចិត្តទុកដាក់ជាបន្តទៀតជាមួយនឹងធ្លុងមហាសាមគ្គីជាតិ ឯកភាពប្រជាជាតិ ចលនាឃោសនា បងប្អូនឲ្យគោរពតាមគោលការណ៍ មាគ៌ានិងគោលនយោបាយរបស់បក្ស និងច្បាប់របស់រដ្ឋ ជាពិសេសចូលរួមយ៉ាងសកម្មក្នុងការអភិវឌ្ឍសេដ្ឋកិច្ចសង្គម ដើម្បីបង្កើនសេដ្ឋកិច្ចគ្រួសារ និងសេដ្ឋកិច្ចមូលដ្ឋាន ដើម្បីកសាងខេត្តអានយ៉ាងឲ្យកាន់តែអភិវឌ្ឍរឹងមាំ៕
ប្រែ៖ ណារីពៅ
