នៅព្រឹកថ្ងៃទី ២៧ ខែកុម្ភៈ នៅតំបន់ពិសេសភូក្វឹក លោក ហូ វ៉ាន់ម៉ឹង សមាជិកគណៈកម្មាធិការមជ្ឈិមបក្ស អនុលេខាគណៈកម្មាធិការបក្សខេត្ត និងជាប្រធានគណៈកម្មាធិការប្រជាជនខេត្តអានយ៉ាង បានចូលរួមក្នុងពិធីបើកការដ្ឋានសាងសង់គម្រោងហេដ្ឋារចនាសម្ព័ន្ធសំខាន់ៗចំនួនបី ដែលបម្រើសន្និបាតកំពូល APEC ២០២៧ រួមមាន៖ រោងចក្រទឹកបឹងកួកាន់ តំបន់ដោះស្រាយកាកសំណល់បៃបុន និងរោងចក្រកែច្នៃកាកសំណល់ដោយថាមពលបៃបុន។
ថ្លែងមតិនៅក្នុងពិធីបើកការដ្ឋាន លោក ឡេ ទ្រុង ហូ អនុប្រធានគណៈកម្មាធិការប្រជាជនខេត្តអានយ៉ាង បានមានប្រសាសន៍ថា សន្និបាត APEC ២០២៧ គឺជាព្រឹត្តិការណ៍នយោបាយ និងការទូតដ៏សំខាន់មួយសម្រាប់ប្រទេសជាតិ។ ការដែលមជ្ឈិមជ្រើសរើសភូក្វឹក ខេត្តអានយ៉ាង ជាទីតាំងម្ចាស់ផ្ទះ បានបង្ហាញពីទំនុកចិត្តយ៉ាងធំ ហើយព្រមជាមួយនោះដាក់ចេញឲ្យខេត្តអានយ៉ាងនិងតំបន់ពិសេសភូក្វឹកនៅបន្ទុកមួយយ៉ាងធ្ងន់ធ្ងរ ក្នុងការរៀបចំលក្ខខណ្ឌចាំបាច់សម្រាប់សន្និបាត។
បណ្តាគម្រោងដែលបានចាប់ផ្តើមសសង់នៅថ្ងៃនេះមានសារៈសំខាន់បំផុត មិនត្រឹមតែធានាបាននូវហេដ្ឋារចនាសម្ព័ន្ធសំខាន់ៗសម្រាប់សន្និបាត APEC ២០២៧ ប៉ុណ្ណោះទេ ប៉ុន្តែថែមទាំងបង្កើតមូលដ្ឋានគ្រឹះយូរអង្វែងសម្រាប់ការអភិវឌ្ឍប្រកបដោយចីរភាពរបស់តំបន់ភូក្វឹកនិយាយដោយឡែក និងខេត្តអានយ៉ាងនិយាយរួមផងដែរ។
យោងតាមសេចក្តីសម្រេចចិត្តដែលបានអនុម័ត តំបន់ដោះស្រាយកាកសំណល់បៃបុន (ហាមនិញ) មានទ្រង់ទ្រាយ ១៥ ហិកតា មានពលានុភាពផលិត ២៥០ តោន/ថ្ងៃ និងមានទុនវិនិយោគសរុបប្រមាណ ៣៨២ ពាន់លានដុង។ រោងចក្រកែច្នៃកាកសំណល់ដោយថាមពលបៃបុន (ហាមនិញ) មានទ្រង់ទ្រាយប្រហែល ១០ ហិកតា មានពលានុភាពពី ២០០-៣០០ តោន/ថ្ងៃ ពលានុភាពបញ្ចេញថាមពល ៤ មេហ្គាវ៉ាត់ និងទុនវិនិយោគសរុបប្រមាណ ៣០០ ពាន់លានដុង។
រោងចក្រទឹកស្អាតបឹងកួកាន់មានពលានុភាពផលិតទឹកបាន ៤៩.៥០០ ម៉ែត្រគូប/ថ្ងៃយប់ ជាមួយនឹងទុនវិនិយោគសរុបប្រមាណ ៥៥៦ ពាន់លានដុង។ គម្រោងទាំងអស់ត្រូវតែបញ្ចប់មុនថ្ងៃទី ៣០ ខែមិថុនា ឆ្នាំ ២០២៧។ នេះគឺជាកាលកំណត់ចាំបាច់ ដែលភ្ជាប់នឹងភារកិច្ចនយោបាយរបស់ខេត្ត។
សមមិត្ត ឡេ ទ្រុងហូ បានសង្កត់ធ្ងន់ថា ពិធីបើកការដ្ឋានសាងសង់នៅថ្ងៃនេះ គ្រាន់តែជាការចាប់ផ្តើមប៉ុណ្ណោះ។ បរិមាណការងារនាពេលខាងមុខគឺធំធេងណាស់ ដែលទាមទារឲ្យមានវឌ្ឍនភាពខ្ពស់។ ក្នុងខណនោះ នីតិវិធីពាក់ព័ន្ធមួយចំនួននៅតែត្រូវបន្តបញ្ចប់ស្របគ្នាជាមួយនឹងដំណើរការសាងសង់។ ដូច្នេះទាមទារឲ្យមានការខិតខំប្រឹងប្រែងយ៉ាងខ្លាំងក្លា ស្របគ្នា និងមានវិន័យយ៉ាងតឹងរ៉ឹងរបស់ប្រព័ន្ធទាំងមូល។
លោកអនុប្រធានគណៈកម្មាធិការប្រជាជនខេត្តអានយ៉ាង បានស្នើឲ្យគណៈគ្រប់គ្រងតំបន់សេដ្ឋកិច្ចភូក្វឹកពង្រីកតួនាទីនាំមុខនាំផ្លូវដោយសម្របសម្រួលយ៉ាងជិតស្និទ្ធតាមកាលវិភាគប្រចាំថ្ងៃ/ប្រចាំសប្តាហ៍/ប្រចាំខែ គ្រប់គ្រងយ៉ាងពេញលេញនូវលក្ខខណ្ឌផ្លូវច្បាប់ បង្កើនត្រួតពិនិត្យកន្លែងជាក់ស្តែង ធ្វើការសំយោគ និងផ្តល់យោបល់ជាបន្ទាន់អំពីការដោះស្រាយការលំបាកដែលកើតឡើងភ្លាមៗ ទទួលខុសត្រូវចំពោះគណៈកម្មាធិការប្រជាជនខេត្តអំពីល្បឿន និងគុណភាពគម្រោង ធានាបញ្ចប់មុនកាលកំណត់ថ្ងៃទី ៣០ ខែមិថុនា ឆ្នាំ ២០២៧ ដើម្បីមានពេលវេលាដំណើរការសាកល្បង និងដោះស្រាយបញ្ហាណាមួយដែលកើតឡើង។
បណ្តាមន្ទីរ គណៈ ផ្នែករបស់ខេត្តគួរតែបន្តរក្សាស្មារតីទទួលខុសត្រូវ សហការយ៉ាងជិតស្និទ្ធ និងដោះស្រាយនីតិវិធីរដ្ឋបាលក្នុងដែនសមត្ថកិច្ចបានឆាប់រហ័ស ផ្តល់យោបល់ដល់គណៈកម្មាធិការប្រជាជនខេត្តឲ្យដោះស្រាយខ្លឹមសារដែលហួសពីសមត្ថកិច្ច ដោយមិនទុកឲ្យកើតមានករណីយឺតយ៉ាវដែលបណ្តាលមកពីហេតុផលដោយអត្តនោម័ត្នជាដាច់ខាត។
តំបន់ពិសេសភូក្វឹកកំពុងផ្តោតយ៉ាងខ្លាំងទៅលើការងារសងសំណង និងរំដោះផ្ទៃរាប បង្កើនការឃោសនា និងចលនាដើម្បីបង្កើតការឯកភាពគ្នាពីប្រជាជន ដោយធានាការប្រគល់ដីតាមកាលវិភាគដែលបានសន្យា។
“ការវិនិយោគលើគម្រោងហេដ្ឋារចនាសម្ព័ន្ធបរិស្ថាន ការផ្គត់ផ្គង់ទឹក និងថាមពលលើកនេះ មិនត្រឹមតែបម្រើសន្និបាត APEC ២០២៧ ប៉ុណ្ណោះទេ ថែមទាំងរួមចំណែកដល់ការដោះស្រាយបញ្ហាសន្តិសុខបរិស្ថាន ថាមពល និងទឹកសម្រាប់ភូក្វឹក ក្នុងរយៈពេលវែងទៀតផង។តាមរយនេះកសាងរូបភាពភូក្វឹក - អានយ៉ាង អភិវឌ្ឍបៃតង ទំនើប ចីរភាព និងរួសរាយរាក់ទាក់ ក្នុងក្រសែភ្នែករបស់សហគមន៍អន្តរជាតិ” សមមិត្ត ឡេ ទ្រុង ហូ បានមានប្រសាសន៍។
លោក ត្រាន់ ជៀន កុង អគ្គនាយកក្រុមហ៊ុន BIWASE ដែលជាវិនិយោគគិនលើគម្រោងទាំងបី បានមានប្រសាសន៍ថា គម្រោងទាំងបីនេះ មានទុនវិនិយោគសរុបជាង ១.២៣៨ ពាន់លានដុង វិនិយោគព្រមៗគ្នាលើប្រព័ន្ធទឹកស្អាត និងកាកសំណល់ ព្រមទាំងការការពារបរិស្ថាន។ នេះមិនត្រឹមតែជាសំណង់ហេដ្ឋារចនាសម្ព័ន្ធបច្ចេកទេសប៉ុណ្ណោះទេ ប៉ុន្តែជាមូលដ្ឋានគ្រឹះសម្រាប់ការអភិវឌ្ឍប្រកបដោយចីរភាពរបស់ភូក្វឹកនាពេលខាងមុខផងដែរ៕
ប្រែ៖ សំណាង
