នៅថ្ងៃទី១៩ ខែមីនា លោកស្រី ផាម ធីថាញ់ត្រា លេខាមជ្ឈិមបក្ស និងជាឧបនាយករដ្ឋមន្ត្រីនៃរដ្ឋាភិបាល បានចូលរួមក្នុងពិធីបើកការដ្ឋានសាងសង់សាលាអន្តេវាសិកដ្ឋានបឋមសិក្សា និងអនុវិទ្យាល័យបាជុក (ឃុំបាជុក ខេត្តអានយ៉ាង)។
ចូលរួមជាមួយផងដែរមានលោក ដាំង ស្វឺនផុង សមាជិកគណៈកម្មាធិការមជ្ឈិមបក្ស និងជាអនុប្រធានប្រចាំការនៃខុទ្ទកាល័យរដ្ឋាភិបាល។ អ្នកស្រី ង្វៀន ធី ក្វៀន ថាញ អនុរដ្ឋមន្ត្រីក្រសួងអប់រំ និងបណ្តុះបណ្តាល។ លោកឧត្តមសេនីយ៍ឯក ផាម ទ្រឿង សឺន អនុប្រធានអគ្គសេនាធិការកងទ័ពប្រជាជនវៀតណាម។រួមជាមួយតំណាងថ្នាក់ដឹកនាំមកពីនាយកដ្ឋាន និងការិយាល័យនានាក្រោមឱវ៉ាទក្រសួង និងផ្នែកមជ្ឈិមផងដែរ។
ខាងភាគីខេត្តអានយ៉ាងរួមមាន៖ លោក ង្វៀន ទៀនហៃ សមាជិកគណៈកម្មាធិការមជ្ឈិមបក្ស លេខាគណៈកម្មាធិការបក្សខេត្ត។លោក ហូ វ៉ាន់ ម៉ឹង សមាជិកគណៈកម្មាធិការមជ្ឈិមបក្ស អនុលេខាគណៈកម្មាធិការបក្សខេត្ត ប្រធានគណៈកម្មាធិការប្រជាជនខេត្ត។ អ្នកស្រី ត្រាន់ ធី ថាញ់ ហឿង អនុលេខាគណៈកម្មាធិការបក្សខេត្ត ប្រធានគណៈប្រតិភូរដ្ឋសភាខេត្ត ប្រធានគណៈកម្មាធិការរណសិរ្សមាតុភូមិវៀតណាមខេត្តអានយ៉ាង។ អតីតថ្នាក់ដឹកនាំគ្រប់ជំនាន់។ បណ្តាសមមិត្តក្នុងគណៈអចិន្ត្រៃយ៍បក្សខេត្ត។ ថ្នាក់ដឹកនាំមន្ទីរ គណៈ ផ្នែក អង្គការមហាជនខេត្ត ព្រមទាំងបក្ខភាគគ្រប់ថ្នាក់និងអាជ្ញាធរមូលដ្ឋានផងដែរ។
សាលាអន្តេវាសិកដ្ឋានបឋមសិក្សា និងអនុវិទ្យាល័យបាជុក កំពុងបានសាងសង់លើផ្ទៃដីប្រមាណ ៤៤.៤៣៣ ម៉ែត្រការ៉េ មានទ្រង់ទ្រាយវិនិយោគតាមការគ្រោងទុកចំនួន ៤៥ ថ្នាក់រៀន (ថ្នាក់បឋមសិក្សា ១៣ និងថ្នាក់អនុវិទ្យាល័យ ៣២) ជាមួយសិស្ស ១.៥០០ នាក់ ក្នុងនោះអន្តេវាសិកដ្ឋាន ៣០០ នាក់។
គម្រោងសាងសង់អគារថ្មីៗដូចជា៖ ប្លុកអគារសិក្សាចំនួន ៤៦ និងបន្ទប់មុខវិជ្ជាសិក្សា បន្ទប់ស្នាក់នៅលោកគ្រូអ្នកគ្រូបុគ្គលិក អន្តេវាសិកដ្ឋានបុរស និងនារី អគារពហុវិជ្ជា អាហារដ្ឋាន យានដ្ឋានចតយានយន្ត កន្លែងដោះស្រាយទឹកសំណល់ ប្រព័ន្ធបង្ការពន្លត់អគ្គីភ័យ ភ្លើងបំភ្លឺខាងក្រៅ និងប្រព័ន្ធទូរគមនាគមន៍។ ទន្ទឹមនិងនោះ ជួសជុលឡើងវិញអគារចាស់ៗដែលមានស្រាប់ដូចជា អគាររដ្ឋបាល បណ្ណាល័យ អគារថ្នាក់រៀន ឆាកខាងក្រៅ និងបន្ទប់ទឹក។ ការវិនិយោគសរុបតាមការសន្និដ្ឋានចំនួនជិត ១៩០ ពាន់លានដុង និងសាងសង់បញ្ចប់នៅខែសីហា ឆ្នាំ២០២៧ តាមការសន្និដ្ឋាន។
ក្រៅពីសាលាអន្តេវាសិកដ្ឋានបឋមសិក្សា និងអនុវិទ្យាល័យបាជុក ខេត្តអានយ៉ាងក៏បាន ចាប់ផ្តើមសាងសង់គម្រោងពីរផ្សេងទៀត ក្នុងពេលតែមួយផងដែរ គឺសាលាអន្តេវាសិកដ្ឋានបឋមសិក្សា និងអនុវិទ្យាល័យវិញឌៀវ និងសាលាអន្តេវាសិកដ្ឋានបឋមសិក្សា និងអនុវិទ្យាល័យវិញស៊ឿង។
ថ្លែងមតិនៅក្នុងពិធី អ្នកស្រី ង្វៀន ធីមិញ ធ្វី អនុប្រធានគណៈកម្មាធិការប្រជាជនខេត្ត បានសង្កត់ធ្ងន់ថា ខេត្តអានយ៉ាង ចាត់ទុកការវិនិយោគលើការសាងសង់សាលាអន្តេវាសិដ្ឋានអន្តរកម្រិតនៅតាមឃុំព្រំដែន ស្របតាមសេចក្តីប្រកាសសន្និដ្ឋានលេខ ៨១ របស់ការិយាល័យនយោបាយ គឺជាភារកិច្ចនយោបាយសំខាន់ បន្ទាន់ មានអត្ថន័យយុទ្ធសាស្ត្រយូរអង្វែង ក្នុងការអភិវឌ្ឍសេដ្ឋកិច្ចសង្គម អនុវត្តគោលនយោបាយជនជាតិ លើកកម្ពស់កម្រិតបញ្ញារបស់ប្រជាជន បណ្តុះបណ្តាលធនធានមនុស្សនៅក្នុងមូលដ្ឋាន ទន្ទឹមនិងនោះរួមចំណែករក្សារឹងមាំសន្តិសុខនិងការពារជាតិនៅតាមតំបន់ព្រំដែន។
ដោយអនុវត្តតាមការណែនាំរបស់មជ្ឈិម នៅថ្ងៃទី ៩ ខែវិច្ឆិកា ឆ្នាំ ២០២៥ រួមជាមួយមូលដ្ឋានក្នុងប្រទេសទាំងមូល ខេត្តអានយ៉ាងបានចាប់ផ្តើមសាងសង់គម្រោងសាលាអន្តេវាសិកដ្ឋានអន្តរកម្រិតចំនួនបីនៅតាមឃុំព្រំដែនដីគោក៖ វិញយ៉ា យ៉ាងថាញ់ និងខាញ់ប៊ិញ។ រហូតមកដល់បច្ចុប្បន្ននេះ គម្រោងទាំងនេះបានចាប់ផ្តើមសាងសង់សម្រេចបានជាង ៥០% ជាមួយនឹងគុណភាពល្អ ដោយធានាថានឹងបញ្ចប់មុនថ្ងៃទី ៣០ ខែសីហា ឆ្នាំ ២០២៦ និងដាក់ដំណើរការក្នុងឆ្នាំសិក្សា ២០២៦-២០២៧។
ទៅទន្ទឹមនិងការសាងសង់សំណង់ទាំងនេះ ខេត្តក៏សកម្មត្រៀបបម្រុងនិងរៀបចំនូវលក្ខខណ្ឌសម្រាប់ដាក់ឲ្យដំណើរការគម្រោងភ្លាមបន្ទាប់ពីការសាងសង់បញ្ចប់ មុនពេលបើកឆ្នាំសិក្សាថ្មី រួមមានការរៀបចំអង្គការក្បាលម៉ាស៊ីន កម្មវិធីបង្រៀន ថវិកាប្រតិបត្តិការ និងលក្ខខណ្ឌចាំបាច់ផ្សេងទៀតតាមការកំណត់។
យោងតាមប្រសាសន៍អ្នកស្រី ង្វៀន ធី មិញធ្វី អនុប្រធានគណៈកម្មាធិការប្រជាជនខេត្ត បានឲ្យដឹងថា នៅដំណាក់កាលបន្ទាប់ ខេត្តអានយ៉ាងនឹងផ្សព្វផ្សាយសាងសង់សាលារៀនចំនួន ៦ ទៀត នៅក្នុងឃុំព្រំដែនដីគោកចំនួន ៦ ដែលនៅសល់។ មូលដ្ឋាននឹងបន្តជ្រួតជ្រាបយ៉ាងពេញលេញនូវសេចក្តីណែនាំរបស់មជ្ឈិមស្តីពីការវិនិយោគសាងសង់សាលាអន្តេវាសិកដ្ឋានអន្តរកម្រិតនៅតាមឃុំព្រំដែនដីគោក ជាមួយនឹងបាវចនាផ្សព្វផ្សាយអនុវត្ត "បន្ទាន់ - ខ្លាំងក្លា - ប្រាកដ - ប្រសិទ្ធភាព" ដោយធានាបាននូវគោលការណ៍ច្បាស់លាស់ចំនួន៦។
ផ្អែកលើមូលដ្ឋាននោះ គណៈកម្មាធិការប្រជាជនខេត្ត បន្តដឹកនាំមន្ទីរ ផ្នែក និងមូលដ្ឋានពាក់ព័ន្ធ ឲ្យសហការយ៉ាងជិតស្និទ្ធ និងផ្តល់ការគាំទ្រជាអតិបរមាដល់អ្នកវិនិយោគ និងអង្គភាពពាក់ព័ន្ធពេញមួយដំណើរការអនុវត្តគម្រោង ដោយធានាបាននូវល្បឿន និងគុណភាព។ ទន្ទឹមនិងនោះ បង្កើនការងារត្រួតពិនិត្យ និងឃ្លាំមើលការអនុវត្ត មិនទុកឲ្យកើតមានការខាតបង់ ការខ្ជះខ្ជាយ និងអវិជ្ជមាន។
អ្នកស្រី ង្វៀន ធីមិញធ្វី អនុប្រធានគណៈកម្មាធិការប្រជាជនខេត្ត បានមានប្រសាសន៍ថា “យើងខ្ញុំជឿជាក់ថា អគារសិក្សានីមួយៗដែលសាងសង់នៅតាមតំបន់ព្រំដែននៃមាតុភូមិ នឹងក្លាយជាសាលារៀននៃជំនឿ នៃចំណេះដឹង និងតាំងប្រាថ្នាឈានឡើងរបស់កូនចៅជនរួមជាតិនៅតំបន់ព្រំដែនយ៉ាងពិតប្រាកដ”។
ដើម្បីលើកទឹកចិត្ត និងជំរុញស្មារតីសិស្សានុសិស្សឲ្យជម្នះការលំបាក ឈានឡើងក្នុងការសិក្សា និងលត់ដំ ក្នុងឱកាសនេះ អ្នកស្រីឧបនាយករដ្ឋមន្ត្រី ផាម ធីថាញត្រា បានប្រគល់អំណោយ និងអាហារូបករណ៍ចំនួន ២០ ចំណែក ដល់សិស្សពូកែ ដែលមានជីវភាពខ្វះខាត និងប្រគល់អំណោយចំនួន ១០ចំណែក ដល់លោកគ្រូអ្នកគ្រូដែលមានស្ថានភាពលំបាកផងដែរ៕
ប្រែ៖ ណារីពៅ
