នៅរសៀលថ្ងៃទី១១ ខែមិថុនា គណៈកម្មាធិការប្រជាជនខេត្តបានរៀបចំកិច្ចប្រជុំឯកទេសកម្មដើម្បីឆ្លងសមាជិកគណៈកម្មាធិការប្រជាជនខេត្តអំពីខ្លឹមសារស្ថិតក្នុងសមត្ថកិច្ចនៃសេចក្តីសម្រេចរបស់គណៈកម្មាធិការប្រជាជនខេត្ត និងឆ្លងតាមរយៈគណៈអចិន្ត្រៃយ៍បក្ខភាគគណៈកម្មាធិការបក្សខេត្ត។លោក ហូវ៉ាន់ម៉ឹង សមាជិកបម្រុងនៃគណៈកម្មាធិការមជ្ឈិមបក្ស អនុលេខាបក្ខភាគខេត្ត ប្រធានគណៈកម្មាធិការប្រជាជនខេត្តអានយ៉ាង ធ្វើអធិបតីភាពក្នុងកិច្ចប្រជុំ។លោក ឡេវ៉ាន់ភឿក និងលោក ងោកុងធឹក អនុប្រធានគណៈកម្មាធិការប្រជាជនខេត្តអានយ៉ាង ព្រមទាំងថ្នាក់ដឹកនាំមន្ទីរ ផ្នែក និងមូលដ្ឋានបានចូលរួម។
នៅក្នុងកិច្ចប្រជុំ មន្ទីរ ផ្នែកនិងមូលដ្ឋានបានបង្ហាញសេចក្តីព្រាង៖ បទជម្រាបរបស់គណៈកម្មាធិការប្រជាជនខេត្ត និងសេចក្តីព្រាងសេចក្តីសម្រេចចិត្តរបស់ក្រុមប្រឹក្សាប្រជាជនខេត្ត កំណត់កម្រិតចំណាយលើការទទួលភ្ញៀវ សួរសុខទុក្ខនិងអបអរសាទរចំពោះមុខសញ្ញាមួយចំនួនដែលអាស្រ័យដោយគណៈកម្មាធិការរណសិរ្សមាតុភូមិវៀតណាមគ្រប់លំដាប់ថ្នាក់អនុវត្តនៅខេត្តអានយ៉ាង។បទជម្រាបស្តីពីការចេញសេចក្តីសម្រេចចិត្ត វិសោធនកម្ម និងបំពេញបន្ថែមមាត្រាមួយចំនួននៃបទប្បញ្ញត្តិស្តីពីវិមជ្ឈការប្រភពចំណូល និងការចំណាយក្នុងដំណាក់កាលស្ថិរភាពថវិកាឆ្នាំ ២០២២ - ២០២៥ នៃថវិកាគ្រប់លំដាប់ថ្នាក់របស់ខេត្តអានយ៉ាង ដែលចេញអមដោយសេចក្តីសម្រេចចិត្តលេខ ១៥/២០២១/NQ-HDND។ បទជម្រាបស្តីពីការចេញសេចក្តីសម្រេចចិត្តកែសម្រួលការគ្រោងចំណូលថវិការដ្ឋ ចំណូល និងចំណាយថវិកាមូលដ្ឋាន និងបែបផែនបែងចែកថវិកាមូលដ្ឋានខេត្តអានយ៉ាងឆ្នាំ២០២៥។ សេចក្តីសម្រេចចិត្តរបស់ក្រុមប្រឹក្សាប្រជាជនខេត្តកំណត់កម្រិតនៃការចំណាយសម្រាប់ការទូទាត់ជំនួយសង្គមសម្រាប់មុខសញ្ញាគាំពារសង្គមតាមរយៈអង្គការសេវាកម្មទូទាត់នៅក្នុងខេត្តអានយ៉ាង។សេចក្តីសម្រេចរបស់ ក្រុមប្រឹក្សាប្រជាជនខេត្តកំណត់ការលើកលែងថ្លៃពន្ឋនិងថ្លៃអាករនៅពេលផ្តល់សេវាសាធារណៈតាមអនឡាញនៅលើភូមិសាស្ត្រខេត្តអានយ៉ាង។ សេចក្តីសម្រេចចិត្តកែសម្រួល និងបំពេញបន្ថែមការបែងចែកលម្អិតផែនការវិនិយោគសាធារណៈរយៈពេលមធ្យមដំណាក់កាល ២០២១ - ២០២៥ ពីប្រភពថវិកាមូលដ្ឋាន។សេចក្តីសម្រេចចិត្តបានមានបទប្បញ្ញត្តិស្តីពីវិមជ្ឈការសមត្ថកិច្ចនៃសេចក្តីសម្រេចអនុម័តលើភារកិច្ចនិងថវិកាអនុវត្តសម្រាប់ការកែលម្អនិងលើកកម្ពស់ បើកទូលាយ កសាងថ្មីសំណង់តូចធំនៅក្នុងគម្រោងដែលបានវិនិយោគ និងសាងសង់របស់ស្ថាប័ន អង្គភាពដែលប្រើប្រាស់ថវិកាចំណាយជាប្រចាំ ក្រោមការគ្រប់គ្រងរបស់ខេត្តអានយ៉ាង។
បទជម្រាបស្តីពិការពន្យាពេលវេលារៀបចំដើមទុនអនុវត្តគម្រោងរហូតដល់ដំណាច់ឆ្នាំ២០២៥ សម្រាប់គម្រោងប្រើប្រាស់ទុនថវិកាមូលដ្ឋាន។ កែសម្រួលផែនការប្រើប្រាស់ដីដំណាក់កាល ២០២១ - ២០៣០ នៃទីក្រុងឡុងស្វៀន ខេត្តអានយ៉ាង ចេញសេចក្តីសម្រេចបញ្ចប់គម្រោង៖ “តំបន់វារីវប្បកម្មរួមផ្សំនឹងដើមឈើហូបផ្លែ” នៅឃុំ លឿងអានត្រា (ស្រុកទ្រីតូន ខេត្តអានយ៉ាង) របស់វិនិយោគិនត្រាន់ថាញវៀន។ ចេញសេចក្តីសម្រេចបញ្ចប់សកម្មភាពនៃគម្រោង “កន្លែងឈប់សម្រាកអេកូឡូហ្ស៊ីហាយ៉ា”នៅភូមិវិញខាញ់(ឃុំ វិញតេ ទីក្រុងចូវដុក ខេត្តអានយ៉ាង) ចេញសេចក្តីសម្រេចបញ្ចប់សកម្មភាពនៃគម្រោង “តំបន់ទេសចរណ៍អេកូឡូស៊ីយឿងខាងមីលួង” នៅទីរួមស្រុកមីលួង(ស្រុកចើម៉ើយ) សុំយោបល់ពីសមាជិកគណៈកម្មាធិការប្រជាជនខេត្ត លើករណីស្នើសុំដំឡើងកូតារដ្ឋការដោយសារមានស្នាដៃក្នុងសកម្មភាពការងារសាធារណៈ និងស្នើសុំដំឡើងកូតារដ្ឋការនៅពេលដែលបានតែងតាំងមុខតំណែងថ្នាក់ដឹកនាំ និងគ្រប់គ្រងជាដើម។ បន្ទាប់ពីពិនិត្យរួចមក សមាជិកគណៈកម្មាធិការប្រជាជនខេត្ត មន្ទីរ ផ្នែក និងមូលដ្ឋានបានចូលរួមមតិយោបល់ និងឯកភាពឆ្លងបណ្តាខ្លឹមសារនៅក្នុងសេចក្តីព្រាង។
ថ្លែងមតិបញ្ចប់ទៅតាមខ្លឹមសារនីមួយៗ លោក ហូវ៉ាន់ម៉ឹង ប្រធានគណៈកម្មាធិការប្រជាជនខេត្តអានយ៉ាង បានស្នើឲ្យមន្ទីរផ្នែកមូលដ្ឋាននានាដែលបានគណៈកម្មាធិការប្រជាជនខេត្តចាត់តាំងឲ្យទទួលបន្ទុកចងក្រង ខ្លឹមសារ កត់ត្រាទទួលស្គាល់ និងស្រូបយកទាំងស្រុងនូវមតិយោបល់ក្នុងកិច្ចប្រជុំ កែសម្រួល បំពេញបន្ថែមឲ្យបានទាន់ពេលវេលា និងបន្តដាក់ជូនគណៈកម្មាធិការប្រជាជនខេត្តដើម្បីពិនិត្យ និងចេញឯកសារស្របទៅតាមបទបញ្ញតិ។ តាមរយៈនោះ រួមចំណែកឲ្យខេត្តប្រតិបត្តិការ និងអនុវត្តភារកិច្ចអភិវឌ្ឍន៍សេដ្ឋកិច្ច-សង្គមនៅលើភូមិសាស្ត្រនាពេលខាងមុខ៕
ប្រែ៖ ណារីពៅ
