នៅថ្ងៃទី១៥ ខែឧសភា លោក ហូ វ៉ាន់ម៉ឹង សមាជិកគណៈកម្មាធិការមជ្ឈិមបក្ស អនុលេខាគណៈកម្មាធិការបក្សខេត្ត និងជាប្រធានគណៈកម្មាធិការប្រជាជនខេត្ត បានចូលរួម និងធ្វើជាអធិបតីក្នុងកិច្ចប្រជុំពិគ្រោះយោបល់អំពីគម្រោងផ្លាស់ប្តូរបៃតងនៃតំបន់ពិសេសភូក្វឹកដំណាក់កាល២០២៦-២០៣៥ និងចក្ខុវិស័យដល់ឆ្នាំ២០៥០។
ការអភិវឌ្ឍប្រកបដោយចីរភាពនៃ "កោះពេជ្រ"
ថ្លែងមតិនៅក្នុងសន្និបាត លោក ហូ វ៉ាន់ម៉ឹង ប្រធានគណៈកម្មាធិការប្រជាជនខេត្ត បានសង្កត់ធ្ងន់ថា ការអនុវត្តការផ្លាស់ប្តូរបៃតងមិនត្រឹមតែជានិន្នាការសកលប៉ុណ្ណោះទេ ប៉ុន្តែវាក៏ជាតម្រូវការចាំបាច់ និងបន្ទាន់ផងដែរ ដើម្បីការពារ និងលើកកម្ពស់តម្លៃរបស់ “កោះពេជ្រ”។ គម្រោងការផ្លាស់ប្តូរបៃតងបង្ហាញពីការប្តេជ្ញាចិត្តយ៉ាងមុតមាំក្នុងការបង្កើតតម្លៃពិសេស យូរអង្វែង និងការអភិវឌ្ឍប្រកបដោយចីរភាពសម្រាប់ភូក្វឹក។
យោងតាមលោក ហូ វ៉ាន់ម៉ឹង ប្រធានគណៈកម្មាធិការប្រជាជនខេត្ត ភូក្វឹក ត្រូវបានគេស្គាល់ជាយូរមកហើយថាជា “កោះពេជ្រ” ហើយភារកិច្ចរបស់រដ្ឋាភិបាល និងប្រជាជនគឺត្រូវថែរក្សា និងធ្វើឲ្យ គ្រាប់ពេជ្រ” នេះកាន់តែភ្លឺចែងចាំងជាងមុន ដោយមិនទុកឲ្យវាព្រិលទៅនៅក្នុងពេលដំណើរការអភិវឌ្ឍ។ គម្រោងផ្លាស់ប្តូរបៃតងតំបន់ពិសេសភូក្វឹកមិនត្រឹមតែជាចលនា ឬកម្មវិធីសកម្មភាពរបស់ខេត្តនោះទេ ថែមទាំងមានសារសំខាន់សម្រាប់ផ្នែកច្បាប់សម្រាប់ការតម្រង់ទិសនិងការកែសម្រួលផែនការអភិវឌ្ឍភូក្វឹកទៅអនាគតផងដែរ។
លោក ហូ វ៉ាន់ ម៉ឹង ប្រធានគណៈកម្មាធិការប្រជាជនខេត្ត បានស្នើឲ្យតំបន់ពិសេសភូក្វឹក សហការជាមួយអង្គភាពប្រឹក្សាយោបល់ អនុវត្តបញ្ចប់គម្រោង និងទទួលយកមតិយោបល់ កែសម្រួលដោយស្មារតី "ច្បាស់ ៦" តាមផែនទីបង្ហាញផ្លូវជាក់លាក់។ ខិតខំបញ្ចប់គម្រោងនៅក្នុងខែឧសភា និងក្នុងខែមិថុនា គណៈកម្មាធិការប្រជាជនតំបន់ពិសេសភូក្វឹក នឹងបញ្ចប់នីតិវិធី និងដាក់ជូនគណៈកម្មាធិការប្រជាជនខេត្តអនុម័ត។
លោកប្រធានគណៈកម្មាធិការប្រជាជនខេត្ត បានឯកភាពលើដំណោះស្រាយទាំងប្រាំពីរដែលបានកំណត់។ ប៉ុន្តែ ទោះបីដូច្នេះក្តី គម្រោងត្រូវតែបញ្ជាក់ឲ្យបានច្បាស់អំពីធនធាន យន្តការគោលនយោបាយ វាយតម្លៃតម្រូវការថាមពលប្រើប្រាស់ជាសរុប និងធ្វើឲ្យបទប្បញ្ញត្តិច្បាប់មានលក្ខណៈជាក់ស្តែង ដើម្បីធ្វើឲ្យការផ្លាស់ប្តូរបៃតងកាន់តែច្បាស់លាស់ ជាពិសេសគឺគោលនយោបាយស្តីពីបរិស្ថាន និងសាងសង់។
ប្រគល់ឲ្យក្រសួងសំណង់ និងតំបន់ពិសេសភូក្វឹក សហការធ្វើបច្ចុប្បន្នភាពផែនការកំណត់តំបន់ជាបន្ទាន់ បង្កើតបទប្បញ្ញត្តិគ្រប់គ្រងស្ថាបត្យកម្ម និងដោះស្រាយបញ្ហាបរិស្ថាន និងសណ្តាប់ធ្នាប់ទីក្រុងជាបន្ទាន់។ នៅក្នុងខែមិថុនា ក្រសួងសំណង់ និងក្រសួងកសិកម្ម ហើយនិងបរិស្ថាន ធ្វើសេនាធិការដល់គណៈកម្មាធិការប្រជាជនខេត្ត អំពីការចេញបទប្បញ្ញត្តិសំណង់ និងបទប្បញ្ញត្តិបរិស្ថានសម្រាប់តំបន់ពិសេសភូក្វឹក។
ទន្ទឹមនិងនេះ ជំរុញខ្លាំងការអនុវត្តវិញ្ញាបនបត្របៃតង និងការដឹកជញ្ជូនបៃតង។ គណៈកម្មាធិការប្រជាជនតំបន់ពិសេសភូក្វឹករៀបចំផែនការដើម្បីដំណើរការអនុវត្តគម្រោង។
យោងតាមអង្គភាពប្រឹក្សាយោបល់ គម្រោងផ្លាស់ប្តូរបៃតងតំបន់ពិសេសភូក្វឹក ដំណាក់កាល ២០២៦-២០៣៥ ជាមួយនឹងចក្ខុវិស័យដល់ឆ្នាំ ២០៥០ កសាងភូក្វឹកក្លាយជាកោះបៃតង ទីក្រុងកោះឆ្លាតវៃ គួរឲ្យរស់នៅ ជាមជ្ឈមណ្ឌលទេសចរណ៍អេកូឡូស៊ី រមណីយដ្ឋាន និងសេដ្ឋកិច្ចសមុទ្ទគុណភាពខ្ពស់ មានលំដាប់តំបន់ និងអន្តរជាតិ។
ភូក្វឹកឆ្ពោះទៅរកទម្រង់អភិវឌ្ឍដោយផ្អែកលើសេដ្ឋកិច្ចបៃតង សេដ្ឋកិច្ចរង្វង់ បំភាយឧស្ម័នទាប អភិរក្សប្រព័ន្ធអេកូឡូស៊ីព្រៃឈើ-សមុទ្ទ-ឆ្នេរសមុទ្ទ សម្របខ្លួនទៅនឹងការប្រែប្រួលអាកាសធាតុ និងប្រតិបត្តិការទីក្រុងដែលផ្អែកលើទិន្នន័យ។
គោលដៅជាក់លាក់ដល់ឆ្នាំ ២០៣៥ ភូក្វឹកខិតខំកាត់បន្ថយប្រពលភាពនៃការបំភាយឧស្ម័នផ្ទះកញ្ចក់យ៉ាងហោចណាស់ ៣០% បើប្រៀបធៀបទៅនឹងឆ្នាំ ២០២៦។ ទន្ទឹមនិងនោះ អត្រាស្រូបយកកាបូនធម្មជាតិត្រូវបានតម្រង់ទិសសម្រេចបានពី ៤០-៥០%។
សសរស្តម្ភដំណោះស្រាយស្នូលចំនួន ៧
ដើម្បីសម្រេចចក្ខុវិស័យនេះ គម្រោងបានបង្កើតក្របខ័ណ្ឌយុទ្ធសាស្ត្រដោយផ្អែកលើដំណោះស្រាយផ្លាស់ប្តូរបៃតងសម្រាប់ភូក្វឹក ដោយផ្អែកលើសសរស្តម្ភសំខាន់ៗចំនួន ៧ ដែលមានគម្រោងអាទិភាពចំនួន ៣៧។
ខិតខំសម្រេចឲ្យបានមធ្យោបាយដឹកជញ្ជូនអ្នកដំណើរសាធារណៈ និងយានយន្តផ្លូវគោកប្រើប្រាសថាមពលបៃតងទាំង ១០០% នៅឆាំ្ន ២០៣៥។ បណ្តាគម្រោងលេចធ្លោរួមមានប្រព័ន្ធតាក់ស៊ីទឹកឆ្នេរសមុទ្ទ និងឡានក្រុងអគ្គិសនី។
ហេដ្ឋារចនាសម្ព័ន្ធទីក្រុងបៃតង និងធន់ ដែលអនុវត្តទម្រង់ "ទីក្រុង Sponge" ដើម្បីទប់ស្កាត់ការជនលិច និងបង្កើនទំហំរុក្ខជាតិបៃតងសាធារណៈឡើងដល់ ១២ ម៉ែត្រការ៉េ/មនុស្សម្នាក់ នៅឆ្នាំ ២០៣៥។
ទេសចរណ៍បៃតងឆ្លាតវៃ និងកសាងប្រព័ន្ធស្លាកបៃតងសម្រាប់មូលដ្ខានទេសចរណ៍ ឆ្ពោះទៅគោលដៅមូលដ្ឋានបែងចែកប្រភេទសំរាមនៅតាមប្រភព ១០០% និងនិយាយថាទេចំពោះផ្លាស្ទិចប្រើតែម្តងនៅឆ្នាំ ២០៣៥។
ថាមពលបៃតងឆ្លាតវៃ បង្កើនអត្រាអគ្គិសនីពីប្រភពថាមពលកកើតឡើងវិញឡើងដល់ ៥០% នៃការប្រើប្រាស់សរុប។ គម្រោងនេះផ្តល់អាទិភាពដល់ការដំឡើងប្រព័ន្ធថាមពលពន្លឺព្រះអាទិត្យនៅលើដំបូលជាមួយនឹងថ្មផ្ទុកថាមពលសម្រាប់រមណីយដ្ឋាន និងសណ្ឋាគារ។
ការអភិរក្សធនធានធម្មជាតិ និងជីវៈចម្រុះពាក់ព័ន្ធនឹងការផ្លាស់ប្តូរពីការអភិរក្សអកម្ម ទៅជាការស្តារឡើងវិញយ៉ាងសកម្មនៃប្រព័ន្ធអេកូឡូស៊ីផ្កាថ្ម ស្មៅសមុទ្ទ និងព្រៃកោងកាងដែលត្រូវរេចរឹល។
ឥរិយាបថ អភិបាលកិច្ច និងធនធានមនុស្សបៃតង និងបង្កើនអត្រាការងារបៃតងនឹងឡើងដល់ ២៥% នៅឆ្នាំ ២០៣៥ និងអនុវត្តការបែងចែកសំរាមនៅប្រភពទូទៅសម្រាប់ គ្រួសារចាប់ពីឆ្នាំ ២០២៧ ទាំង ១០០%។
វិទ្យាសាស្ត្រ និងបច្ចេកវិជ្ជា ការផ្លាស់ប្តូរឌីជីថល និង MRV ការកសាងហេដ្ឋារចនាសម្ព័ន្ធទិន្នន័យបៃតង និងប្រព័ន្ធឌីជីថល MRV (វាស់វែង - រាយការណ៍ - ពិនិត្យបញ្ជាក់) ដើម្បីឃ្លាំមើលផែនទីបង្ហាញផ្លូវនៃការកាត់បន្ថយការបំភាយឧស្ម័នដោយតម្លាភាព។
ផែនទីបង្ហាញផ្លូវត្រូវបានផ្សព្វផ្សាយចែកចេញជាបីដំណាក់កាល ក្នុងនោះដំណាក់កាល ២០២៦-២០២៧ គឺជា “ដំណាក់កាលបង្កើនល្បឿន” ដើម្បីបម្រើព្រឹត្តិការណ៍ APEC ២០២៧។ គម្រោងនេះបានសង្កត់ធ្ងន់លើការកៀរគរធនធានចម្រុះ ចាប់ពីថវិការដ្ឋរហូតដល់ប្រភពទុនសង្គមូបនីយកម្មពីធុរកិច្ច និងហិរញ្ញវត្ថុអាកាសធាតុអន្តរជាតិ។
ការផ្សព្វផ្សាយគម្រោងដោយជោគជ័យមិនត្រឹមតែជួយឲ្យភូក្វឹកអភិរក្សបាន “ទុនធម្មជាតិ” ដ៏មានតម្លៃរបស់ខ្លួនប៉ុណ្ណោះទេ ថែមទាំងបង្កើតអត្ថប្រយោជន៍ជាក់ស្តែងសម្រាប់សហគមន៍ និងការកំណត់ទីតាំងឡើងវិញនៃពាណិជ្ជសញ្ញា “កោះពេជ្រ” នៅលើផែនទីទេសចរណ៍បៃតងសកលលោកផងដែរ៕
ប្រែ៖ ណារីពៅ
