នៅព្រឹកថ្ងៃទី ០៥ ខែកញ្ញា ឆ្នាំ២០២៦ រួមជាមួយមូលដ្ឋាននានាទូទាំងប្រទេស មូលដ្ឋានអប់រំនានានៅលើភូមិសាស្ត្រខេត្តអានយ៉ាង បានរៀបចំពិធីបើកបវេសនកាលឆ្នាំសិក្សាថ្មី ២០២៦-២០២៧ ក្នុងពេលតែមួយ។
នៅទីតាំងសាលាបឋមសិក្សា និងអនុវិទ្យាល័យអន្តេវាសិកជនជាតិយ៉ាងថាញ់ ពិធីបើកបវេសនកាល និងពិធីសម្ពោធដាក់ឲ្យប្រើប្រាស់សាលា សម្រាប់ឆ្នាំសិក្សាថ្មី ២០២៦-២០២៧ ត្រូវបានរៀបចំឡើង ដោយមានការអញ្ជើញចូលរួមពីលោក ហូ វ៉ាន់ ម៉ឹង សមាជិកគណៈកម្មាធិការមជ្ឈិមបក្ស អនុលេខាបក្សខេត្ត និងជាប្រធានគណៈកម្មាធិការប្រជាជនខេត្តអានយ៉ាង។ អ្នកស្រី ង្វៀន ធី មីញ ធ្វី អនុប្រធានគណៈកម្មាធិការប្រជាជនខេត្ត អនុប្រធានគណកម្មាធិការប្រជាជនខេត្តនិង អតីតថ្នាក់ដឹកនាំខេត្តគ្រប់សម័យកាល តំណាងថ្នាក់ដឹកនាំមន្ទីរ គណៈ ផ្នែក និងមូលដ្ឋាន ក្រុមហ៊ុន អាជីវកម្មនានា លោកគ្រូ អ្នកគ្រូ និងសិស្សានុសិស្សអញ្ជើញចូលរួមផងដែរ។
ក្នុងប៉ុន្មានឆ្នាំកន្លងទៅ បក្ស និងរដ្ឋ តែងតែយកចិត្តទុកដាក់ជាពិសេសចំពោះវិស័យអប់រំ និងបណ្តុះបណ្តាល ជាពិសេសគឺការអប់រំនៅតំបន់ជនជាតិភាគតិច តំបន់ភ្នំ និងតំបន់ព្រំដែន ការវិនិយោគសាងសង់សាលាបឋមសិក្សា និងអនុវិទ្យាល័យអន្តេវាសិកជនជាតិយ៉ាងថាញ់ មានអត្ថន័យសំខាន់ រួមចំណែកបង្កើតលក្ខខណ្ឌសិក្សា និងការប្រជុំជីវភាពសម្រាប់សិស្សានុសិស្សនៅតំបន់ព្រំដែន លើកកម្ពស់គុណភាពអប់រំ និងអភិវឌ្ឍធនធានមនុស្ស ព្រមទាំងរួមចំណែកដល់ការអភិវឌ្ឍសេដ្ឋកិច្ច-សង្គម ការពង្រឹងការពារជាតិ សន្តិសុខ និងកសាងតំបន់ព្រំដែនឲ្យកាន់តែរឹងមាំ។
នេះគឺជាគម្រោងមួយក្នុងចំណោមគម្រោងសាលាអន្តេវាសិកជនជាតិអន្តរកម្រិតបឋមសិក្សា និងអនុវិទ្យាល័យចំនួន ០៣ នៅតាមឃុំតំបន់ព្រំដែន គឺជា ជំហានជាក់ស្តែង ដើម្បីអនុវត្តគោលការណ៍របស់ការិយាល័យនយោបាយស្តីពីការអភិវឌ្ឍវិស័យអប់រំនៅតំបន់ព្រំដែន។
ក្នុងដំណាក់កាលទី១ ខេត្តអានយ៉ាងបានបញ្ចប់គម្រោងចំនួន ៣ ស្តីពីសាលាអន្តេវាសិកជនជាតិនៅតាមឃុំ យ៉ាងថាញ់ វីញយ៉ា និងខាញ់ប៊ីញ ដោយមានទុនវិនិយោគសរុបជាង ៣៨៨ ពាន់លានដុង ពីប្រភពថវិកាមជ្ឈិម។ បច្ចុប្បន្ន សាលាទាំងនេះបានរៀបចំបុគ្គលិកពេញលេញ រួមមាន អ្នកគ្រប់គ្រងចំនួន ១២ នាក់ គ្រូបង្រៀនចំនួន ១៥៩ នាក់ និងបុគ្គលិកចំនួន ២០ នាក់។ គិតត្រឹមថ្ងៃទី ៣១ ខែសីហា ឆ្នាំ២០២៦ មានសិស្សចំនួន ៣.៧៨២ នាក់ ក្នុងចំណោមសិស្សសរុប ៤.១៧២ នាក់ បានចុះឈ្មោះចូលរៀន ស្មើនឹងអត្រា ៩២,៨%។ ក្នុងនោះ មានសិស្សចំនួន ៤៧៧ នាក់ បានចុះឈ្មោះស្នាក់នៅអន្តេវាសិកដ្ឋាន និងសិស្សចំនួន ៣.៣០៥ នាក់ បានចុះឈ្មោះស្នាក់នៅពាក់កណ្តាលអន្តេវាសិក។
លទ្ធផលសឲ្យឃើញថា តម្រូវការសិក្សាមានកម្រិតខ្ពស់ និងមានការគាំទ្រជាមូលដ្ឋានពីមាតាបិតា និងអាណាព្យាបាល។ ទន្ទឹមនឹងនេះ ក៏បានដាក់ចេញនូវតម្រូវការឲ្យមានការពិនិត្យឡើងវិញយ៉ាងហ្មតចត់អំពីមុខសញ្ញា ទ្រង់ទ្រាយថ្នាក់ សមត្ថភាពទទួលសិស្ស និងរៀបចំការបម្រើសេវាកម្មជាក់ស្តែងរបស់សាលានីមួយៗ។ មូលដ្ឋានក៏បានបែងចែកថវិកាគ្រប់គ្រាន់សម្រាប់ការប្រតិបត្តិការ សម្ភារៈប្រើប្រាស់ផ្ទាល់ខ្លួន។ បានបញ្ចប់ផែនការសុវត្ថិភាពអគ្គិភ័យ និងការពារអគ្គិភ័យ ព្រមទាំងសុខាភិបាលសាលារៀន ដើម្បីធានាឲ្យសាលាទាំងនេះអាចដំណើរការបានយ៉ាងមានស្ថិរភាព។
ទន្ទឹមនឹងនេះ ខេត្តអានយ៉ាងក៏កំពុងពន្លឿនការអនុវត្តដំណាក់កាលទី២ ជាមួយនឹងគម្រោងសាលាអន្តេវាសិកជនជាតិនៅតំបន់ព្រំដែនចំនួន ០៦ ផ្សេងទៀត នៅតាមឃុំ បាជុក ភូហ៊ូវ ញឹនហូយ វីញឌៀវ អានភូ និងវីញសឿង ដោយមានទុនវិនិយោគសរុបចំនួន ១៨៦.០៦៥ ពាន់លានដុង ហើយគ្រោងនឹងបញ្ចប់ និងដាក់ឲ្យប្រើប្រាស់មុនថ្ងៃទី ៣០ ខែសីហា ឆ្នាំ២០២៧ ដើម្បីឲ្យទាន់ពេលបម្រើឆ្នាំសិក្សា ២០២៧-២០២៨។
ក្នុងឱកាសនេះ លោក តូឡឹម អគ្គលេខាបក្ស និងជាប្រធានរដ្ឋ បានប្រគល់បាល់បាល់ទាត់ចំនួន ២០ គ្រាប់ដល់សាលាបឋមសិក្សា និងអនុវិទ្យាល័យយ៉ាងថាញ់ ដើម្បីលើកទឹកចិត្តដល់ការហាត់ប្រាណ និងការកម្សាន្តដែលមានសុខភាពល្អបន្ទាប់ពីចេញពីសាលារៀន ព្រមទាំងលើកទឹកចិត្តសិស្សានុសិស្សឲ្យទទួលបានជោគជ័យក្នុងការសិក្សាក្នុងឆ្នាំសិក្សាថ្មី បានផ្តល់អាហារូបករណ៍ចំនួន ៥០ ចំណែកដល់សិស្សដែលមានជីវភាពខ្វះខាត ផ្តល់ជូនកង់ចំនួន ១០ គ្រឿងដល់សាលា បញ្ជាការដ្ឋានកងទ័ពការពារព្រំដែនខេត្តបានប្រគល់ថវិកាចំនួន ១០ លានដុង។ ក្រុមហ៊ុនឆ្នោតជាតិគៀនយ៉ាង បានប្រគល់ជូនសៀវភៅកត់ត្រាចំនួន ៣ ពាន់ក្បាល និងបាឡូចំនួន ១០០ ដល់សិស្សក្រីក្រនៅសាលា រួមជាមួយនឹងថវិកាចំនួន ៥០ លានដុង។ ក្រុមហ៊ុនភាគហ៊ុនរ៉ែ ធ្វឺនផុង ប្រគល់ជូនថវិកាចំនួន ៥០ លានដុងដល់មូលនិធិអាហារូបករណ៍របស់សាលាបឋមសិក្សា និងអនុវិទ្យាល័យយ៉ាងថាញ់។ ក្រុមហ៊ុន VNPT ក្រុមហ៊ុន CIC និងគណៈគ្រប់គ្រងគម្រោងវិនិយោគសំណង់ និងដឹកជញ្ជូនខេត្ត (ម្ចាស់វិនិយោគ) បានរួមដំណើរ និងគាំទ្រសកម្មភាពរបស់សាលាក្នុងឱកាសដើមឆ្នាំសិក្សាថ្មី។
ប្រែ៖ ណារីពៅ
