រសៀលថ្ងៃទី ០៤ ខែសីហា នៅសង្កាត់ ហា ទៀន លោក ហូ វ៉ាន់ ម៉ឹង សមាជិកគណៈកម្មាធិការមជ្ឈិមបក្ស អនុលេខាបក្សខេត្ត ប្រធានគណៈកម្មាធិការប្រជាជនខេត្តអានយ៉ាង បានដឹកនាំគណៈប្រតិភូអញ្ជើញចូលរួមកិច្ចប្រជុំស្តីពីស្ថានភាពសេដ្ឋកិច្ច-សង្គមរយៈពេល ០៧ ខែ ឆ្នាំ២០២៦ និងទិសដៅ ភារកិច្ចសំខាន់ៗក្នុងពេលខាងមុខ របស់ឃុំ សង្កាត់នានា នៅក្នុងអនុតំបន់ភាគខាងលិចខេត្តអានយ៉ាង។
អញ្ជើញចូលរួមក៏មាន លោក ង្វៀន ថាញ់ ផុង សមាជិកគណៈអចិន្ត្រៃយ៍គណៈបក្សខេត្ត អនុប្រធានប្រចាំការគណៈកម្មាធិការប្រជាជនខេត្តនិងបណ្តាលោកអ្នក ង៉ោ កុងធឹក ង្វៀនធីមិញធ្វី លេទ្រុងហូ អនុប្រធានគណៈកម្មាធិការប្រជាជនខេត្ត ហើយនឹងតំណាងថ្នាក់ដឹកនាំមន្ទីរ គណ ផ្នែកពាក់ព័ន្ធ។ ថ្នាក់ដឹកនាំឃុំ សង្កាត់នានា នៅអនុតំបន់ភាគខាងលិចខេត្តអានយ៉ាង រួមមាន៖ វិញ យ៉ា បាជុក យ៉ាងថាញ់ វិញឌៀវ ហនដឹត ប៊ិញយ៉ាង ប៊ិញសឹន ហ្វាឌៀន គៀនលឿង ហនងែ សឹនហាយ ហាទៀន តូចូវ ទៀនហាយ តភ្ជាប់ទៅឃុំ សង្កាត់ចំណុះអនុតំបន់ភាគខាងលិចខេត្តអានយ៉ាង។
ក្នុងរយៈពេល ០៧ ខែ ឆ្នាំ២០២៦ ឃុំ សង្កាត់នានា នៅអនុតំបន់ភាគខាងលិច បានផ្សព្វផ្សាយមានប្រសិទ្ធិភាពនូវសេចក្តីសម្រេចចិត្តនិងកម្មវិធីរបស់ថ្នាក់លើ។ សេដ្ឋកិច្ច-សង្គមរក្សាស្ថិរភាព ការផលិត និងធ្វើអាជីវកម្មមានការស្តារឡើងវិញ ហើយរៀបចំការបោះឆ្នោតជ្រើសតាំងតំណាងរាស្ត្រនីតិកាលទី១៦ និងតំណាងក្រុមប្រឹក្សាប្រជាជនគ្រប់លំដាប់ថ្នាក់ អាណត្តិ ២០២៦-២០៣១ ប្រកបដោយជោគជ័យ ធានាសុវត្ថិភាព និងត្រឹមត្រូវតាមបទប្បញ្ញត្តិ។ ការងារសន្តិសុខសង្គម សុខាភិបាល កំណែទម្រង់រដ្ឋបាល ការផ្លាស់ប្តូរឌីជីថល និងការរៀបចំស្ថាប័ន ត្រូវបានអនុវត្តយ៉ាងល្អ។ សន្តិសុខការពារជាតិ និងសណ្តាប់ធ្នាប់សុវត្ថិភាពសង្គម បានរក្សាយ៉ាងរឹងមាំ។
អនុតំបន់ភាគខាងលិច មានផ្ទៃដីធម្មជាតិ ១.៨៦៨,៦៤/៩.៨៨៨,៩១គីឡូម៉ែត្រការ៉េ ស្មើនឹង ១៨,៩% នៃផ្ទៃដីទូទាំងខេត្ត។ មានប្រជាជនប្រមាណ ២៧២.៧៣៨/៣.៦៩៤.៥៩៦ នាក់ ស្មើនឹង ៧,៣៨% នៃប្រជាជនទូទាំងខេត្ត រួមមាន៖ សង្កាត់ចំនួន ០២ គឺ ហាទៀន និង តូចូវ និងឃុំចំនួន ១២ គឺ វិញយ៉ា បាជុក យ៉ាងថាញ់ វិញឌៀវ ហនដឹត ប៊ិញយ៉ាង ប៊ិញសឹន ហ្វា ឌៀន គៀនលឿង ហនងែ សឹនហាយ និង ទៀន ហាយ។ លំហអភិវឌ្ឍបានរៀបចំតាមអ័ក្សតំបន់ឆ្នេរសមុទ្ទ ភ្ជាប់ជាមួយច្រករបៀងព្រំដែន ដោយយកក្រុមទីក្រុង ហាទៀន - គៀនលឿង - ហនដឹត ជាស្នូលកំណើន ភ្ជាប់យ៉ាងជិតស្និទ្ធជាមួយមជ្ឈមណ្ឌលសេដ្ឋកិច្ចសមុទ្ទ ច្រកទ្វារព្រំដែន និងប្រព័ន្ធដឹកជញ្ជូនអន្តរតំបន់ បង្កើតកម្លាំងចលករសាយភាយអភិវឌ្ឍសម្រាប់អនុតំបន់ទាំងមូល។
ផ្តោតលើការអភិវឌ្ឍច្រករបៀងបច្ចេកវិទ្យាបៃតង នៅតំបន់ ហា ទៀន - គៀន លឿង - ហនដឹត ដោយផ្តល់អាទិភាពដល់ការទាក់ទាញគម្រោងថាមពលខ្យល់ ថាមពលព្រះអាទិត្យ ស្រាវជ្រាវ និងអនុវត្តទម្រង់ថាមពលថ្មីៗ។ ទន្ទឹមនឹងនេះ អភិវឌ្ឍឧស្សាហកម្មគាំទ្រ ការផលិតឧបករណ៍ និងសេវាកម្មបម្រើវិស័យថាមពល។ ជំរុញការអភិវឌ្ឍសេដ្ឋកិច្ចសមុទ្ទ ភ្ជាប់ជាមួយការការពារធនធាន បរិស្ថាន និងការសម្របខ្លួនទៅនឹងការប្រែប្រួលអាកាសធាតុ។ អភិវឌ្ឍទេសចរណ៍សមុទ្ទ កោះ អេកូទេសចរណ៍ និងវប្បធម៌។ ពង្រីកពាណិជ្ជកម្មព្រំដែន សេដ្ឋកិច្ចច្រកទ្វារព្រំដែន និងសេវាភស្តុភារកម្ម។ អភិវឌ្ឍការចិញ្ចឹមមច្ឆជាតិសមុទ្ទបច្ចេកវិទ្យាខ្ពស់ កសិកម្មតំបន់ឆ្នេរសមុទ្ទក្នុងទិសដៅទំនើប និងចីរភាព។
តាមរបាយការណ៍ ការបញ្ចេញទុនវិនិយោគសាធារណៈរបស់ឃុំនានា គិតត្រឹមថ្ងៃទី៣១ ខែកក្កដា ឆ្នាំ២០២៦ បើប្រៀបធៀបនឹងផែនការទុន៖ គៀន លឿង សម្រេចបាន ៧៣% និង បា ជុក សម្រេចបាន ៧២% ឈានមុខគេក្នុងតំបន់រង។ បន្ទាប់មកគឺ ប៊ិញ សឹន ៥៣%។ ហន ដឹត ៤៨%។ វិញ យ៉ា ៤៧%។ យ៉ាង ថាញ់ ៤២% និង វិញ ឌៀវ ៤១%។ បើប្រៀបធៀបនឹងទិន្នន័យបូកសរុបដល់ថ្ងៃទី៣០ ខែមិថុនា ឆ្នាំ២០២៦ មូលដ្ឋានមួយចំនួនមានកំណើនគួរឲ្យកត់សម្គាល់ ដូចជា បា ជុក កើន ២៣ ពិន្ទុភាគរយ។ យ៉ាង ថាញ់ កើន ១៩ ពិន្ទុភាគរយ និង គៀន លឿង កើន ១៨ ពិន្ទុភាគរយ។
អំពីស្ថានភាពប្រមូលចំណូលថវិការដ្ឋ មានមូលដ្ឋានចំនួន ១១ សម្រេចបានលើសល្បឿនជាមធ្យម បើប្រៀបធៀបនឹងការសន្និដ្ឋានប្រមាណ ៥៨,៣% ដូចជា៖ តូ ចូវ ៨៧,៦៤%។ ប៊ិញ យ៉ាង ៧៥,៥២%។ ប៊ិញ សឹន ៣៧៦,០៧%។ យ៉ាង ថាញ់ ៦៧,៨៨%។ ហ្វា ឌៀន ៩០,២៩%។ ហន ងែ ៤៤៩,១៤%។ គៀន លឿង ១០១,៤២%។សឹន ហាយ ៨១,៣៣%។ ទៀន ហាយ ១២៥,៧៦%។ វិញ ឌៀវ ៨៦,៨៩%។ វិញ យ៉ា ៩៤,៦៧% ជាដើម។ នេះជាមូលដ្ឋានដែលមានល្បឿនប្រមូលថវិការរដ្ឋបានល្អ បង្ហាញពីប្រសិទ្ធភាពក្នុងការគ្រប់គ្រងការប្រមូលចំថវិការដ្ឋ និងការទាញយកផលពីប្រភពចំណូលលើភូមិសាស្ត្រ។ល។
តាមរយៈរបាយការណ៍ និងការពិភាក្សារបស់ប្រតិភូ លោក ហូ វ៉ាន់ ម៉ឹង ប្រធានគណៈកម្មាធិការប្រជាជនខេត្តអានយ៉ាង បានទាមទារឲ្យមន្ទីរ ផ្នែក និងមូលដ្ឋាននានា ផ្តោតលើការអនុវត្តភារកិច្ចសំខាន់ៗមួយចំនួនដូចខាងក្រោម៖
ទីមួយ ស្តីពីការដឹកនាំ និងគ្រប់គ្រង ខេត្តនឹងបង្កើតគណៈណែនាំការអភិវឌ្ឍអនុតំបន់ចំនួន ៥។ អនុប្រធានគណៈកម្មាធិការប្រជាជនខេត្តម្នាក់ៗ នឹងទទួលបន្ទុកដោយផ្ទាល់លើអនុតំបន់មួយ ដើម្បីដឹកនាំ តាមដាន និងដោះស្រាយការលំបាកបានទាន់ពេលវេលា ដើម្បីលើកកម្ពស់ប្រសិទ្ធភាពនៃការសហការ បង្កើនភាពសកម្ម និងការទទួលខុសត្រូវក្នុងការរៀបចំអនុវត្ត។
ទីពីរ មូលដ្ឋាននានា ត្រូវផ្តោតលើការសម្រេចឲ្យបាននូវសន្ទស្សន៍អភិវឌ្ឍសេដ្ឋកិច្ច - សង្គមឆ្នាំ២០២៦ ជាពិសេសល្បឿនកំណើនGRDP ការបញ្ចេញទុនវិនិយោគសាធារណៈ និងការប្រមូលថវិការដ្ឋ។ នេះគឺជាសន្ទស្សន៍ត្រូវតែសម្រេចឲ្យបាន ដើម្បីវាយតម្លៃកម្រិតបំពេញភារកិច្ចរបស់សមូហភាព និងអ្នកដឹកនាំ។ មូលដ្ឋានណាដែលមិនសម្រេចបាននូវសន្ទស្សន៍ដែលបានប្រគល់ជូន គឺអ្នកដឹកនាំមូលដ្ឋាននោះ នឹងមិនត្រូវបានចាត់ថ្នាក់ សម្រេចភារកិច្ចបានល្អឡើយ។
ទីបី ស្តីពីការទាក់ទាញការវិនិយោគ មូលដ្ឋាននានា ត្រូវផ្លាស់ប្តូរការគិតគូរ សកម្មក្នុងការចូលរួម និងអញ្ជើញវិនិយោគិន តាមទិសដៅផែនការរៀបចំដែលបានកំណត់។ មិនរង់ចាំ មិនពឹងផ្អែកលើមន្ទីរ និងផ្នែកនានាឡើយ។ ត្រូវផ្តល់អាទិភាពដល់គម្រោងផលិតកម្ម ធ្វើអាជីវកម្ម ពាណិជ្ជកម្ម និងសេវាកម្ម ដែលមានសមត្ថភាពបង្កើតការងារ បង្កើនថវិការដ្ឋ និងរួមចំណែកយូរអង្វែងដល់ការអភិវឌ្ឍសេដ្ឋកិច្ចរបស់មូលដ្ឋាន។
ទីបួន បន្តពង្រឹងការគ្រប់គ្រងធនធាន ដីធ្លី សណ្តាប់ធ្នាប់សំណង់ និងការអភិវឌ្ឍទីក្រុង។ ត្រួតពិនិត្យយ៉ាងតឹងរ៉ឹងលើការប្រើប្រាស់ដី ការចេញវិញ្ញាបនបត្រសិទ្ធិប្រើប្រាស់ដីធ្លី មិនអនុញ្ញាតឲ្យកើតមានការទន្ទ្រានកាន់កាប់ ការសាងសង់ខុសច្បាប់ ឬការរំលោភច្បាប់ក្នុងការគ្រប់គ្រងដីធ្លីឡើយ។ ទន្ទឹមនឹងនេះ ត្រូវជំរុញខ្លាំងការផ្លាស់ប្តូរបច្ចេកវិទ្យាក្នុងការកែច្នៃសំណល់ ដោយខិតខំដល់ឆ្នាំ២០៣១ នៅក្នុងខេត្តទាំងមូលលែងមានទម្រង់ដោះស្រាយសំរាមដោយការកប់ចោលទៀត ហើយជំនួសដោយបច្ចេកវិទ្យាទំនើប ដែលមិនប៉ះពាល់ដល់បរិស្ថាន។
ទីប្រាំ បន្តធានាឲ្យបានរឹងមាំនូវសន្តិសុខការពារជាតិ រក្សាសន្តិសុខព្រំដែន បង្កើនការតស៊ូ បង្ការទប់ស្កាត់បទល្មើស គ្រឿងញៀន និងអំពើអបាយមុខសង្គមគ្រប់ប្រភេទ។ ដោយឡែក ចំពោះវិស័យជលផល មូលដ្ឋាននានាដែលនៅតាមឆ្នេរត្រូវផ្តោតអនុវត្តយ៉ាងម៉ឺងម៉ាត់នូវដំណោះស្រាយបង្ការទប់ស្កាត់ការនេសាទខុសច្បាប់ មិនបានរាយការណ៍ និងមិនអនុវត្តតាមបទប្បញ្ញត្តិ (IUU) ដោយប្តេជ្ញាចិត្តរួមជាមួយប្រទេសទាំងមូល ដើម្បីបានដកការព្រមាន “កាតលឿង” របស់ EC ឲ្យបានឆាប់។
ទីប្រាំមួយ ទាមទារឲ្យអ្នកដឹកនាំមូលដ្ឋាននានា អនុវត្តយ៉ាងម៉ឺងម៉ាត់នូវការងារទទួលប្រជាពលរដ្ឋ ដោះស្រាយបណ្តឹង និងការប្តឹងបរិហារ ចាប់ពីមូលដ្ឋាន ហើយដោះស្រាយទាន់ពេលវេលានូវការលំបាក និងបញ្ហាទាក់ទិនដែលកើតឡើង មិនទុកឲ្យកើតជាចំណុចក្តៅឡើយ រួមចំណែករក្សាស្ថិរភាពនយោបាយ សណ្តាប់ធ្នាប់ និងសុវត្ថិភាពសង្គម បង្កើតបរិយាកាសអំណោយផលសម្រាប់ការអភិវឌ្ឍសេដ្ឋកិច្ច-សង្គម។
លោកប្រធានគណៈកម្មាធិការប្រជាជនខេត្ត បានសង្កត់ធ្ងន់ និងតម្រូវឲ្យមន្ទីរ គណៈ ផ្នែក និងមូលដ្ឋាននានា បន្ទាប់ពីកិច្ចប្រជុំ ត្រូវប្រញាប់ធ្វើឲ្យមានភាពជាក់លាក់នូវភារកិច្ចដែលបានប្រគល់ជូន ក្លាយជាផែនការសកម្មភាព ដោយមានល្បឿន ពេលវេលា និងការទទួលខុសត្រូវច្បាស់លាស់។ សកម្មក្នុងការសហការ ប្តេជ្ញាចិត្តទាញយកអត្ថប្រយោជន៍មានប្រសិទ្ធភាពពីសក្តានុពល និងគុណសម្បត្តិរបស់អនុតំបន់ភាគខាងលិច រួមចំណែកអនុវត្តដោយជោគជ័យ នូវគោលដៅអភិវឌ្ឍរបស់ខេត្ត ក្នុងដំណាក់កាលខាងមុខ៕
ប្រែ៖ ណារីពៅ
