រសៀលថ្ងៃទី០៦ ខែសីហា លោក ហូ វ៉ាន់ ម៉ឹង សមាជិកគណៈកម្មាធិការមជ្ឈិមបក្ស អនុប្រធានគណៈកម្មាធិការបក្សខេត្ត និងជាប្រធានគណៈកម្មាធិការប្រជាជនខេត្ត អានយ៉ាង បានអញ្ជើញជាអធិបតីក្នុងកិច្ចប្រជុំជាមួយធនាគាររដ្ឋវៀតណាម សាខាតំបន់ទី១៥ និងស្ថាប័នឥណទាននានា ស្តីពីស្ថានភាពកំណើនឥណទានបម្រើការអភិវឌ្ឍសេដ្ឋកិច្ច-សង្គមរបស់ខេត្ត។ អញ្ជើញចូលរួមក្នុងកិច្ចប្រជុំមានលោក ឡេ ទ្រុង ហូ អនុប្រធានគណៈកម្មាធិការប្រជាជនខេត្ត ផងដែរ។
នៅក្នុងកិច្ចប្រជុំ ធនាគាររដ្ឋវៀតណាម សាខាតំបន់ទី១៥ បានឲ្យដឹងថា បច្ចុប្បន្ននៅក្នុងខេត្ត អានយ៉ាងទាំងមូល មានធនាគារចំនួន ៣៥ មូលនិធិឥណទានប្រជាជនចំនួន ៤២ និងស្ថាប័នហិរញ្ញវត្ថុចំនួន ០១ ដោយមានបណ្តាញសាខា និងមូលដ្ឋានប្រតិបត្តិការសរុបចំនួន ៤១៧ កន្លែង។ បណ្តាញនេះបានរួមចំណែកឆ្លើយតបតម្រូវការទុន ការទូទាត់ និងសេវាធនាគាររបស់ប្រជាពលរដ្ឋ និងអាជីវកម្មនៅលើភូមិសាស្ត្រ។គិតដល់ចុងខែមិថុនា ឆ្នាំ២០២៦ សមតុល្យឥណទានសរុបនៅលើភូមិសាស្ត្រខេត្តសម្រេចបាន ២៨២.០០១ ពាន់លានដុង កើនឡើង ៤,៥៣% បើធៀបនឹងចុងឆ្នាំ២០២៥។ ក្នុងនោះ ៨២% នៃសមតុល្យឥណទានត្រូវបានប្រើប្រាស់សម្រាប់សកម្មភាពផលិតកម្ម និងអាជីវកម្ម។
បើពិនិត្យតាមវិស័យសេដ្ឋកិច្ចចំនួន ០៣៖ ឥណទានសម្រាប់វិស័យកសិកម្ម ព្រៃឈើ និងនេសាទ សម្រេចបាន ៦០.៩៩៧ ពាន់លានដុង កើនឡើង ៦,១៥%។ ឥណទានសម្រាប់វិស័យឧស្សាហកម្ម និងសំណង់ សម្រេចបាន ៣៣.៣៩៣ ពាន់លានដុង កើនឡើង ៣,៦៩%។ ឥណទានសម្រាប់វិស័យពាណិជ្ជកម្ម និងសេវាកម្ម សម្រេចបាន ១៨៧.៦១១ ពាន់លានដុង ស្មើនឹង ៦៦,៥% នៃសមតុល្យឥណទានសរុប។ ឥណទានបម្រើការអភិវឌ្ឍកសិកម្ម និងជនបទ បន្តដើរតួនាទីជាកម្លាំងនាំមុខ ដោយសម្រេចបាន ១៦០.៨៦៥ ពាន់លានដុង ស្មើនឹង ៥៧,១% នៃសមតុល្យឥណទានសរុប។ ឥណទានសម្រាប់ការនាំចេញសម្រេចបាន ៤.៨២៣ ពាន់លានដុង កើនឡើង ២១,៤៥%។ សមតុល្យឥណទានសម្រាប់អាជីវកម្មខ្នាតតូច និងមធ្យម សម្រេចបាន ៣៩.១៦០ ពាន់លានដុង។ ឥណទានគោលនយោបាយសង្គមសម្រេចបាន ១៥.១០០ ពាន់លានដុង កើនឡើង ១២,០៣% បើធៀបនឹងដើមឆ្នាំ។
គិតដល់ចុងខែមិថុនា ឆ្នាំ២០២៦ កំណើនឥណទានបន្តភ្ជាប់ជាមួយការគ្រប់គ្រងគុណភាព និងសុវត្ថិភាពនៃសកម្មភាពធនាគារ។ ការប្រមូលទុនកើនឡើង ៨,០១% ដោយអាចឆ្លើយតបបានប្រមាណ ៧០% នៃប្រភពទុនសម្រាប់ផ្តល់ឥណទាន បម្រើការអភិវឌ្ឍសេដ្ឋកិច្ច-សង្គមនៅមូលដ្ឋាន។ល។
ថ្លែងសុន្ទរកថាបូកសរុបកិច្ចប្រជុំ លោក ហូ វ៉ាន់ ម៉ឹង ប្រធានគណៈកម្មាធិការប្រជាជនខេត្ត បានស្នើឲ្យមន្ទីរ គណៈ ផ្នែក ស្ថាប័ន និងអង្គភាពនានា ជាពិសេសមន្ទីរហិរញ្ញវត្ថុ និងសមាគមនានា យកចិត្តទុកដាក់ និងអនុវត្តយ៉ាងម៉ឺងម៉ាត់នូវការឃោសនា និងផ្សព្វផ្សាយគោលនយោបាយគាំទ្រសម្រាប់អាជីវកម្ម។ ត្រូវធ្វើពិពិធកម្មទម្រង់ផ្សព្វផ្សាយ និងធ្វើបច្ចុប្បន្នភាពឲ្យបានពេញលេញនូវគោលនយោបាយដែលមានប្រយោជន៍ មានប្រសិទ្ធភាព និងស្របតាមស្ថានភាពជាក់ស្តែង ព្រមទាំងគាំទ្រ និងផ្តល់ប្រឹក្សាអំពីផែនការផលិតកម្ម និងអាជីវកម្ម ការច្នៃប្រឌិតថ្មី។ ជាមួយគ្នានេះ ត្រូវប្រើប្រាស់ឲ្យបានអតិបរមានូវបច្ចេកវិទ្យាឌីជីថល សារព័ត៌មាន និងបណ្តាញសង្គម ដើម្បីនាំគោលនយោបាយឲ្យកាន់តែជិតស្និទ្ធជាមួយអាជីវកម្ម។
លោកប្រធានគណៈកម្មាធិការប្រជាជនខេត្ត បានតម្រូវឲ្យធនាគាររដ្ឋវៀតណាម សាខាតំបន់ទី១៥ រាយការណ៍ជូនធនាគាររដ្ឋវៀតណាមឲ្យបានជាក់លាក់អំពីស្ថានភាពកំណើនឥណទាន និងលទ្ធភាពក្នុងការដោះស្រាយទុន។ ត្រូវធ្វើឲ្យមានតុល្យភាពរវាងការគ្រប់គ្រងហានិភ័យ ដើម្បីជៀសវាងបំណុលអាក្រក់ ដើម្បីជំរុញសេដ្ឋកិច្ចឲ្យមានការអភិវឌ្ឍ។ ព្រមជាមួយនេះ លោកបានតម្រូវឲ្យធនាគារពាណិជ្ជកម្មនានាពិនិត្យ និងធ្វើឲ្យសាមញ្ញនូវនីតិវិធីរដ្ឋបាល ដើម្បីបង្កលក្ខណៈងាយស្រួលដល់អតិថិជនក្នុងការទទួលបានប្រភពទុន ជាពិសេសក្រុមអតិថិជនថ្មី។បណ្តាធនាគារពាណិជ្ជកម្មត្រូវសកម្មក្នុងការគាំទ្រអាជីវកម្មរៀបចំផែនការខ្ចីទុនដែលមានលទ្ធភាពអនុវត្តបាន និងផ្តល់អាទិភាពដល់ប្រភពទុនសម្រាប់វិស័យសំខាន់ៗរបស់ខេត្ត អានយ៉ាង ដូចជា កសិកម្មបច្ចេកវិទ្យាខ្ពស់ សេដ្ឋកិច្ចសមុទ្ទ និងការផលិតស្រូវមានគុណភាពខ្ពស់ជាដើម។
លោកប្រធានគណៈកម្មាធិការប្រជាជនខេត្ត បានតម្រូវឲ្យសមាគមអាជីវកម្មខេត្ត លើកកម្ពស់តួនាទីរបស់ខ្លួន និងសកម្មក្នុងការគាំទ្រសមាជិកឲ្យទទួលបានប្រភពទុន និងលើកកម្ពស់សមត្ថភាពផលិតកម្ម អាជីវកម្ម តាមរយៈការសហការរៀបចំវគ្គបណ្តុះបណ្តាល អញ្ជើញអ្នកជំនាញមកផ្តល់ប្រឹក្សា និងរៀបចំផែនការដែលមានលទ្ធភាពអនុវត្តបានសម្រាប់អាជីវកម្ម និងការចាប់ផ្តើមអាជីវកម្ម។ ត្រូវផ្លាស់ប្តូរថ្មីនូវកិច្ចជំនួបពិភាក្សា និងកម្មវិធី “កាហ្វេអាជីវកម្ម” ដើម្បីផ្សព្វផ្សាយគោលនយោបាយគាំទ្រឲ្យបានជាក់ស្តែង។ល។ ព្រមជាមួយគ្នានេះ លោកប្រធានគណៈកម្មាធិការប្រជាជនខេត្ត បានស្នើឲ្យមន្ទីរកិច្ចការផ្ទៃក្នុង ណែនាំសមាគមអាជីវកម្មខេត្ត ប្រញាប់បញ្ចប់នីតិវិធី ដើម្បីឯកភាពលើការរៀបចំរចនាសម្ព័ន្ធ និងយន្តការរបស់សមាគម ដើម្បីលើកកម្ពស់ប្រសិទ្ធភាពប្រតិបត្តិការរបស់សមាគម។
លោក ហូ វ៉ាន់ ម៉ឹង ប្រធានគណៈកម្មាធិការប្រជាជនខេត្ត បានតម្រូវឲ្យមន្ទីរហិរញ្ញវត្ថុធ្វើជាអធិបតី និងសហការជាមួយការិយាល័យគណៈកម្មាធិការប្រជាជនខេត្ត ប្រមូលផ្តុំមតិណែនាំ និងសំណើទាំងអស់របស់មន្ទីរ និងផ្នែននានា ដើម្បីផ្តល់យោបល់រៀបចំឯកសារបូកសរុបលទ្ធផលកិច្ចប្រជុំឲ្យបានពេញលេញ និងកំណត់ការបែងចែកភារកិច្ចជាក់លាក់ជូនអង្គភាពនីមួយៗ។ ទន្ទឹមនិងនេះ មន្ទីរហិរញ្ញវត្ថុមានភារកិច្ចអនុវត្តរបបរាយការណ៍ជាប្រចាំអំពីលទ្ធផលនៃការអនុវត្តឥណទាន និងការគាំទ្រអាជីវកម្ម ដើម្បីអាចដោះស្រាយបានទាន់ពេលវេលានូវការលំបាក និងបញ្ហាទាក់ទិនដែលកើតមានក្រៅផែនការ៕
ប្រែ៖ណារីពៅ
