នៅព្រឹកថ្ងៃទី ២៣ ខែកុម្ភៈ លោក ហូ វ៉ាន់ ម៉ឹង សមាជិកគណៈកម្មាធិការមជ្ឈិមបក្ស អនុលេខាគណៈកម្មាធិការបក្សខេត្ត និងជាប្រធានគណៈកម្មាធិការប្រជាជនខេត្ត ធ្វើអធិបតីភាពកិច្ចប្រជុំផ្សព្វផ្សាយភារកិច្ចសំខាន់ៗមួយចំនួនសម្រាប់មន្ទីរ គណៈ ផ្នែក និងគណៈកម្មាធិការប្រជាជនឃុំ សង្កាត់ និងតំបន់ពិសេស។ អញ្ជើញចូលរួមផងដែរ មានលោក ង្វៀន ថាញ់ផុង លោក ឡេ វ៉ាន់ភឿក និងលោក ឡេ ទ្រុងហូ អនុប្រធានគណៈកម្មាធិការប្រជាជនខេត្ត។
ថ្លែងមតិណែនាំក្នុងកិច្ចប្រជុំ លោក ហូ វ៉ាន់ ម៉ឺង ប្រធានគណៈកម្មាធិការប្រជាជនខេត្ត បានណែនាំប្រព័ន្ធរដ្ឋាភិបាលទាំងមូលឲ្យដំណើរការក្នុងល្បឿនខ្ពស់បំផុតចាប់ពីថ្ងៃដំបូងនៃឆ្នាំ ដោយមិនទុកឲ្យ “កាលវិភាគទំនេ” មិនទុកឲ្យការងារកក់ស្ទះ។
វាយតម្លៃស្ថានភាពបុណ្យចូលឆ្នាំវៀតណាម ឆ្នាំមមី ២០២៦ លោក ហូ វ៉ាន់ ម៉ឺង ប្រធានគណៈកម្មាធិការប្រជាជនខេត្ត បានមានប្រសាសន៍ថា ប្រជាជនបានរៀបចំពេញលេញ ហ្មត់ចត់និងសុវត្ថិភាព។ នេះជាឆ្នាំដំបូងហើយដែលខេត្តអនុវត្តទម្រង់អាជ្ញាធរមូលដ្ឋានពីរថ្នាក់ (ដោយគ្មានថ្នាក់ស្រុក) បន្ទាប់ពីការរួមបញ្ចូលគ្នា។ ទោះបីជាបរិមាណការងារច្រើន សន្តិសុខ និងសណ្តាប់ធ្នាប់ ក៏ដូចជាការថែទាំសុខភាពប្រជាជននៅតែបានធានា។ វិស័យទេសចរណ៍បានកត់ត្រាទទួលស្គាល់កំណើនបង្គួរអំពីចំនួនភ្ញៀវទេសចរស្នាក់នៅយប់ និងប្រាក់ចំណូលបើប្រៀបធៀបទៅនឹងរយៈពេលនេះឆ្នាំមុន។ លទ្ធផលនេះទទួលបានគឺអាស្រ័យដោយការខិតខំប្រឹងប្រែងរបស់គ្រប់កម្រិត គ្រប់មន្ទីរ គណៈ ផ្នែក និងមូលដ្ឋាននានា។ ព្រមជាមួយនោះផ្នែកជាច្រើនបានធ្វើការឆ្លងឆាំ្នផងដែរ។
អំពីភារកិច្ចសំខាន់ៗសម្រាប់ត្រីមាសទីមួយ និងឆ្នាំ២០២៦ លោក ហូ វ៉ាន់ ម៉ឺង ប្រធានគណៈកម្មាធិការប្រជាជនខេត្ត បានស្នើអង្គភាពទាំងអស់ឲ្យចាប់ផ្តើមការងារជាបន្ទាន់តាមដែលអាចធ្វើទៅបាន ដើម្បីសម្រេច គោលដៅសម្រាប់ត្រីមាសទីមួយ។ ជាពិសេស ចាប់ពីឆ្នាំនេះតទៅ យោងតាមបទបញ្ញតិរបស់ការិយាល័យនយោបាយ ការវាយតម្លៃកម្មាភិបាលនឹងធ្វើឡើងជារៀងរាល់ត្រីមាសទៅតាមឆ្នាំ ជាពិសេសលើកកម្ពស់ទំនួលខុសត្រូវរបស់អ្នកជាប្រមុខ។
ក្នុងការណែនាំ លោក ហូ វ៉ាន់ ម៉ឹង ប្រធានគណៈកម្មាធិការប្រជាជនខេត្ត បានស្នើមន្ទីរ ស្ថាប័ន និងឃុំ សង្កាត់ និងតំបន់ពិសេសទាំង ១០២ ឲ្យបង្កើតផែនការជាក់លាក់ ដោយមិនទុកឲ្យ "កាលវិភាគទំនេ" ដោះស្រាយឯកសារ និងធ្វើការជាប្រចាំក្នុងបរិយាកាសអេឡិចត្រូនិក។ អ្នកជាប្រមុខត្រូវពង្រីកតួនាទីនាំមុខ ដោយធានាបាននូវក្បាលម៉ាស៊ីនប្រតិបត្តិការរលូន និងមានប្រសិទ្ធភាព។
ចំពោះភារកិច្ចសំខាន់ៗ ខេត្តកំពុងផ្តោតពន្លឿនល្បឿននៃគម្រោងវិនិយោគសាធារណៈ ដោយបញ្ចេញថវិកាយ៉ាងខ្លាំងក្លាចាប់ពីដើមឆ្នាំ ដោយមិនទុកឲ្យកកស្ទះរហូតដល់ចុងឆ្នាំ និងដោះស្រាយការលំបាកទាក់ទងនឹងការរំដោះផ្ទៃរាបសម្រាប់គម្រោងសំខាន់ៗរបស់ APEC។
អំពីការងារបោះឆ្នោត ខេត្តទាំងមូលបានផ្តោតលើការរៀបចំយ៉ាងហ្មត់ចត់សម្រាប់ការបោះឆ្នោតជ្រើសរើសតំណាងរាស្ត្រនីតិកាលទី១៦ និងតំណាងក្រុមប្រឹក្សាប្រជាជនគ្រប់លំដាប់ថ្នាក់សម្រាប់អាណត្តិឆ្នាំ២០២៦-២០៣១ ទន្ទឹមនិងនោះរៀបចំបានល្អទិវាបញ្ជូនទ័ពចូលបម្រើកងទ័ពក្នុងថ្ងៃទី៥ ខែមីនា នៅទីតាំងប្រគល់ទ័ពចំនួន៩កន្លែង។
ក្នុងវិស័យសេដ្ឋកិច្ច-សង្គម ខេត្តខិតខំសម្រេចឲ្យបានគោលដៅចំណូលថវិកា ដោយអនុវត្តវិធានការយ៉ាងតឹងរ៉ឹងដើម្បីប្រយុទ្ធប្រឆាំងនឹងការនេសាទខុសច្បាប់ មិនរាយការណ៍ និងមិនតាមបទបញ្ញតិ (IUU) ត្រៀមខ្លួនសម្រាប់ការងារជាមួយក្រុមត្រួតពិនិត្យរបស់គណៈកម្មការអឺរ៉ុប ជំរុញគម្រោងលំនៅដ្ឋានសង្គម ដើម្បីបំពេញតម្រូវការរបស់កម្មាភិបាល និងប្រជាពលរដ្ឋ និងចុះហត្ថលេខាលើការ អនុម័តផែនការរបស់ខេត្តឲ្យបានឆាប់រហ័ស ដើម្បីរៀបចំសេចក្តីប្រកាសរួមបញ្ចូលជាមួយគ្នាក្នុងការជំរុញការវិនិយោគ។
លោក ហូ វ៉ាន់ ម៉ឺង ប្រធានគណៈកម្មាធិការប្រជាជនខេត្ត បានអំពាវនាវដល់គ្រប់ថ្នាក់ គ្រប់ផ្នែក ស្រុះចិត្តប្តេជ្ញា ដើម្បីការអភិវឌ្ឍរបស់ខេត្ត និងការលើកកម្ពស់ជីវភាពរស់នៅរបស់ប្រជាជន ដោយខិតខំបំពេញឆ្នើមភារកិច្ចសម្រាប់ឆ្នាំ ២០២៦៕
ប្រែ៖ ណារីពៅ
