យប់ថ្ងៃទី ២៨ ខែមិថុនា នៅទីលានទី ១៦ មេសា (សង្កាត់ដុងហៃ ខេត្តខាញ់ហ្វា) ក្រសួងវប្បធម៌ កីឡា និងទេសចរណ៍ សហការជាមួយគណៈកម្មាធិការប្រជាជនខេត្តខាញ់ហ្វារៀបចំពិធីបិទពិធីបុណ្យវប្បធម៌ជនជាតិចាមលើកទី ៦ ឆ្នាំ ២០២៦។
អញ្ជើញចូលរួមក្នុងពិធីនេះរួមមាន អ្នកស្រី ទ្រីញធីធ្វី អនុរដ្ឋមន្ត្រីក្រសួងវប្បធម៌ កីឡា និងទេសចរណ៍ ប្រធានគណៈណែនាំពិធីបុណ្យវប្បធម៌ជនជាតិចាមលើកទី៦ ឆ្នាំ២០២៦។ លោក ឡឹមដុង អនុលេខាគណៈកម្មាធិការបក្សខេត្ត និងជាប្រធានក្រុមប្រឹក្សាប្រជាជនខេត្តខាញ់ហ្វា។លោក ង្វៀនឡុងបៀន សមាជិកគណៈអចិន្ត្រៃយ៍នៃគណៈកម្មាធិការបក្សខេត្ត និងជាអនុប្រធានប្រចាំការនៃគណៈកម្មាធិការប្រជាជនខេត្តខាញ់ហ្វា។ លោក ឡេ វ៉ាន់ភឿក សមាជិកគណៈកម្មាធិការបក្សខេត្ត និងជាអនុប្រធានគណៈកម្មាធិការប្រជាជនខេត្តអានយ៉ាង។
ថ្លែងមតិបិទពិធីបុណ្យ លោក ង្វៀន ឡុងបៀន អនុប្រធានប្រចាំការនៃគណៈកម្មាធិការប្រជាជនខេត្តខាញ់ហ្វា បានសង្កត់ធ្ងន់ថា ភាពជោគជ័យនៃពិធីបុណ្យវប្បធម៌ជនជាតិចាមលើកទី ៦ នៅខេត្តខាញ់ហ្វា ក្នុងឆ្នាំ ២០២៦ មិនត្រឹមតែទាក់ទាញសិប្បករ សិល្បករ តារាសម្តែង និងអត្តពលិកមួយចំនួនធំចូលរួមប៉ុណ្ណោះទេ តែថែមទាំងជាឱកាសដើម្បីផ្សព្វផ្សាយតម្លៃវប្បធម៌ និងបេតិកភណ្ឌដ៏គួរឲ្យគោរព និងដើម្បីផ្សព្វផ្សាយសារយ៉ាងទូលំទូលាយអំពីការអភិរក្ស និងលើកកម្ពស់អត្តសញ្ញាណវប្បធម៌ជនជាតិដល់ប្រជាជន និងអ្នកទេសចរផងដែរ។
ពិធីបុណ្យឆ្នាំនេះមានការចូលរួមពីខេត្ត និងក្រុងចំនួន ៧ គឺខេត្តខាញ់ហ្វារ ខេត្តយ៉ាឡាយ ខេត្តដាក់ឡាក់ ខេត្តឡាំដុង ខេត្តអានយ៉ាង ខេត្តតៃនិញ និងទីក្រុងហូជីមិញ ដោយមានសិប្បករ សិល្បករ តារាសម្តែង អត្តពលិក និងសាធារណជនជាង ១.០០០ នាក់ចូលរួមសម្តែង បង្ហាញពីតម្លៃវប្បធម៌ប្រពៃណី និងខ្លឹមសារនៃវប្បធម៌ចាមតាមរយៈកម្មវិធីសិល្បៈ និងកីឡាប្លែកៗពីតំបន់នីមួយៗ ដូចជា មហោស្រពសិល្បះមហាជន ការសម្តែងសម្លៀកបំពាក់ជនជាតិចាម ការប្រកួតប្រជែងកីឡា និងល្បែងប្រពៃណី សកម្មភាពទេសចរណ៍ និងការតាំងពិព័រណ៍ផលិតផលសិប្បកម្មប្រពៃណីទទួលបានជោគជ័យយ៉ាងល្អប្រសើរ។
តាមរយៈបណ្តាថ្ងៃដែលប្រព្រឹត្តទៅយ៉ាងផុលផុសដោយសកម្មភាពវប្បធម៌ សិល្បៈ កីឡា និងទេសចរណ៍ គណៈប្រតិភូដែលចូលរួមបានបន្សល់ទុកនូវចំណាប់អារម្មណ៍វិជ្ជមានជាច្រើន ដែលរួមចំណែកសាយភាយនូវតម្លៃវប្បធម៌ប្រពៃណីរបស់ប្រជាជនចាម និងបង្កើនការផ្លាស់ប្តូរ សាមគ្គីភាពរវាងមូលដ្ឋាននានា។ ដើម្បីទទួលស្គាល់សមិទ្ធផលលេចធ្លោរបស់គណៈប្រតិភូ គណៈកម្មការបានផ្តល់រង្វាន់ A ចំនួន ១៩ រង្វាន់ B ចំនួន ១៩ និងរង្វាន់ C ចំនួន ២០ ដល់ទស្សនីយភាព និងខ្លឹមសារលេចធ្លោនៅក្នុងពិធីបុណ្យ។
ទៅទន្ទឹមនិងសកម្មភាពវប្បធម៌ សិល្បៈ បណ្តាវិញ្ញាសាប្រកួតកីឡា និងល្បែងប្រជាប្រិយរបស់ជនជាតិចាមក៏បាន ប្រព្រឹត្តទៅយ៉ាងផុលផុស និងទាក់ទាញ រួមចំណែកដល់ការពង្រឹងសាមគ្គីភាព និងផ្លាស់ប្ដូររវាងមូលដ្ឋានដែលមានជនរួមជាតិចាមរស់នៅ។ គណៈកម្មការរៀបចំពិធីបុណ្យ បានផ្តល់មេដាយមាសចំនួន ១១៧ មេដាយប្រាក់ចំនួន ១១៧ និងមេដាយសំរិទ្ធចំនួន ២៣៤ សម្រាប់សកម្មភាពកីឡា។
តាមរយៈពិធីបុណ្យ បណ្តាតម្លៃពិសេសៗនៃវប្បធម៌ចាមនៅតែបន្តបានណែនាំ និងផ្សព្វផ្សាយយ៉ាងទូលំទូលាយដល់ទស្សនិកជនក្នុងប្រទេស និងអន្តរជាតិ រួមចំណែកបង្កើនការយល់ដឹងរបស់បណ្តាថ្នាក់ បណ្តាផ្នែក និងសហគមន៍អំពីទំនួលខុសត្រូវក្នុងការអភិរក្ស និងលើកកម្ពស់តម្លៃបេតិកភណ្ឌវប្បធម៌។ តាមរយៈនោះ បង្កើតសន្ទុះដើម្បីជំរុញការអភិវឌ្ឍទេសចរណ៍វប្បធម៌ ឧស្សាហកម្មវប្បធម៌ និងសិប្បកម្មប្រពៃណីដែលភ្ជាប់នឹងជីវិតរបស់សហគមន៍ចាមក្នុងយុគសម័យថ្មី។
លោក ឡេ វ៉ាន់ភឿក អនុប្រធានគណៈកម្មាធិការប្រជាជនខេត្តអានយ៉ាង បានសង្កត់ធ្ងន់ថា ការដែលបានធ្វើជាម្ចាស់ផ្ទះនៃពិធីបុណ្យវប្បធម៌ជនជាតិចាមលើកទី ៧ នៅឆ្នាំ ២០៣០ គឺជាកិត្តិយសដ៏ធំធេងមួយ ប៉ុន្តែក៏ជា ទំនួលខុសត្រូវដ៏ធ្ងន់មួយសម្រាប់ខេត្តផងដែរ។ នេះមិនត្រឹមតែជាឱកាសដើម្បីបង្ហាញពីតម្លៃវប្បធម៌ដ៏ពិសេសរបស់ជនជាតិចាម និងរូបភាពខេត្តអានយ៉ាងពោពេញទៅដោយអត្តសញ្ញាណ ជិតស្និត មេត្រីភាពប៉ុណ្ណោះទេ ប៉ុន្តែក៏ជាឱកាសដើម្បីពង្រឹងការផ្លាស់ប្តូរ និងការតភ្ជាប់រវាងតំបន់ដែលជនជាតិចាមរស់នៅ រួមចំណែកពង្រឹងធ្លុងមហាសាមគ្គីជាតិ និងលើកកម្ពស់ការអភិវឌ្ឍវប្បធម៌ ទេសចរណ៍យចីរភាព។
ខេត្តអានយ៉ាងនឹងសហការយ៉ាងជិតស្និទ្ធជាមួយក្រសួងវប្បធម៌ កីឡា និងទេសចរណ៍ វិស័យ និងមូលដ្ឋានពាក់ព័ន្ធ ដោយប្តេជ្ញារៀបចំ ពិធីបុណ្យវប្បធម៌ជនជាតិចាមលើកទី ៧ ក្នុងឆ្នាំ ២០៣០ ដោយស្មារតីឧឡារិក និងពោពេញទៅដោយអត្តសញ្ញាណវប្បធម៌ជនជាតិ៕
ប្រែ៖ ណារីពៅ
