ដើម្បីបង្កើនការផ្សព្វផ្សាយផលិតផលពិសេសរបស់តំបន់ ដើម្បីបម្រើប្រជាពលរដ្ឋ និងភ្ញៀវទេសចរ មជ្ឈមណ្ឌលជំរុញវិនិយោគ ពាណិជ្ជកម្ម និងទេសចរណ៍ខេត្តអានយ៉ាង បានសហការជាមួយគណៈកម្មាធិការប្រជាជនសង្កាត់ឡុងស្វៀន រៀបចំ ពិធីបុណ្យនំប្រពៃណីតំបន់ណាមបូ-អានយ៉ាង លើកទី៣ រួមបញ្ចូលជាមួយ ពិព័រណ៍ជំរុញទេសចរណ៍ ពាណិជ្ជកម្ម និងផលិតផល OCOP លើកទី៣ ឆ្នាំ២០២៦ ។
ព្រឹត្តិការណ៍នេះមានទ្រង់ទ្រាយប្រមាណ ៣០០ ស្តង់ ដោយសន្និដ្ឋានថានឹងប្រព្រឹត្តទៅចាប់ពីថ្ងៃទី ៣១ ខែកក្កដា ដល់ថ្ងៃទី ០៨ ខែសីហា ឆ្នាំ២០២៦ នៅតំបន់ទីក្រុង Golden City សង្កាត់ឡុងស្វៀន ខេត្តអានយ៉ាង។ ពិធីបើកនឹងប្រារព្ធធ្វើឡើងនៅយប់ថ្ងៃទី ៣១ ខែកក្កដា។ស្តង់ទំនិញទាំងនអស់នឹងបើកដំណើរការពីម៉ោង ០៨ ព្រឹក ដល់ម៉ោង ១០ យប់ ជារៀងរាល់ថ្ងៃ ដោយមិនមានលក់សំបុត្រទេ ក្រៅពីនេះក៏មានកម្មវិធីសម្តែងសិល្បៈចាប់ពីម៉ោង ០៧ ដល់ម៉ោង ១០ យប់ រៀងរាល់រាត្រីផងដែរ។
បរិយាកាសនៃពិធីបុណ្យត្រូវបានបែងចែកជា ៥ តំបន់ រួមមាន៖តំបន់សម្តែង និងតាំងបង្ហាញនំប្រពៃណី (ប្រមាណ ៦០ ស្តង់)។ តំបន់ពិព័រណ៍ និងផ្សព្វផ្សាយទេសចរណ៍ ព្រមទាំងផលិតផល OCOP របស់ខេត្តអានយ៉ាង (ផ្ទះរួម)។ តំបន់តាំងបង្ហាញ និងផ្សព្វផ្សាយទេសចរណ៍របស់បណ្តាខេត្តក្រុង និងក្រុមហ៊ុនទេសចរណ៍ក្នុង និងក្រៅខេត្ត (ប្រមាណ ៣០ ស្តង់)។ តំបន់ផលិតផល OCOP និងផលិតផលពិសេសរបស់ខេត្តក្រុងនានា (ប្រមាណ ៤០ ស្តង់)។តំបន់សម្តែងការចម្អិនម្ហូបអាហារពិសេសតាមតំបន់នីមួយៗ (ប្រមាណ ៣០ ស្តង់)។ តំបន់ពាណិជ្ជកម្មចម្រុះ (ប្រមាណ ១៤០ ស្តង់)។
ជាពិសេស នៅវេលាម៉ោង ៤រសៀល រៀងរាល់ថ្ងៃ ចាប់ពីថ្ងៃទី ០១ ខែសីហា ដល់ថ្ងៃទី ០៧ ខែសីហា នឹងមានកម្មវិធីសម្តែងការចម្អិនម្ហូបពិសេស នំប្រពៃណី និងចែកជូនដោយឥតគិតថ្លៃនៅស្តង់ទំនិញផ្ទះរួម នៃព្រឹត្តិការណ៍។ នៅទីនេះ សិប្បករមកពីតាមឃុំ សង្កាត់ និងតំបន់ពិសេសនានានៅលើភូមិសាស្ត្រខេត្ត នឹងសម្តែងការធ្វើនំនិងម្ហូបឆ្ងាញ់ពិសេសរបស់អានយ៉ាង ក្នុងបរិមាណច្រើន ដើម្បីបម្រើជូនដោយឥតគិតថ្លៃដល់ប្រជាពលរដ្ឋ និងភ្ញៀវទេសចរដែលមកទស្សនាពិធីបុណ្យ។
បានដឹងថា ពិធីបុណ្យនំប្រពៃណីតំបន់ណាមបូ-អានយ៉ាង រួមបញ្ចូលជាមួយ ផ្សារណាត់ពិព័រណ៍ជំរុញទេសចរណ៍ ពាណិជ្ជកម្ម និងផលិតផល OCOP គឺជាកម្មវិធីមួយបានមជ្ឈមណ្ឌលជំរុញការវិនិយោគ ពាណិជ្ជកម្ម និងទេសចរណ៍ រៀបចំឡើងដោយជោគជ័យនៅក្នុងឆ្នាំ ២០២៤ និង ២០២៥។ តាមរយៈនោះ មិនត្រឹមតែរួមចំណែកក្នុងការអភិរក្ស លើកតម្កើង និងផ្សព្វផ្សាយតម្លៃវប្បធម៌ម្ហូបអាហារ និងនំប្រពៃណីរបស់តំបន់ប៉ុណ្ណោះទេ ប៉ុន្តែថែមទាំងបង្កើតឱកាសឲ្យអ្នកប្រើប្រាស់បានប្រើប្រាស់ផលិតផលប្រពៃណី ពង្រីកទីផ្សារលក់ចេញជាបណ្តើរៗ និងបង្កើនតម្លៃសេដ្ឋកិច្ចផងដែរ។
នេះក៏ជាឱកាសដ៏សំខាន់មួយក្នុងការផ្សព្វផ្សាយអំពីភាពស្រស់ស្អាតនៃទឹកដី និងមនុស្សអានយ៉ាង រមនីយដ្ឋានធម្មជាតិ ធនធានទេសចរណ៍ និងផលិតផលពិសេសរបស់ខេត្តជាដើម ទៅកាន់ភ្ញៀវទេសចរយ៉ាងទូលំទូលាយ ព្រមទាំងរួមចំណែកបន្តជំរុញខ្លាំងកម្មវិធីទេសចរណ៍រដូវវិស្សមកាល ឆ្នាំ២០២៦ របស់ខេត្ត៕
ប្រែ៖ ណារីពៅ
