ដើម្បីបង្កើនការងារគ្រប់គ្រងការពារព្រៃឈើ និងបង្ការពន្លត់ភ្លើងឆេះនៅរដូវប្រាំងឆ្នាំ ២០២៥ នៅថ្ងៃទី ១១ ខែកុម្ភៈ ក្រុមរុក្ខបាលចល័ត និងបង្ការពន្លត់ភ្លើងឆេះព្រៃ ស្ថិតក្រោមសាខានាយកដ្ឋានការពារព្រៃឈើខេត្តអានយ៉ាង បានបង្កើតក្រុមការងារចុះទៅពិនិត្យដីជាក់ស្តែងនិងត្រួតពិនិត្យមធ្យោបាយ ឧបករណ៍បង្ការ និងពន្លត់ភ្លើងឆេះព្រៃនៅឃុំអានណុង ទីរួមខេត្តទិញបៀន។
នៅកន្លែងនីមួយៗ ក្រុមការងារបានត្រួតពិនិត្យមធ្យោបាយនិងឧបករណ៍បង្ការ និងពន្លត់ភ្លើងឆេះព្រៃ។ ការប្រើប្រាស់ម៉ាស៊ីនពន្លត់អគ្គិភ័យ ម៉ាស៊ីនផ្លុំខ្យល់ ស្ថានភាពស្តុកទឹកក្នុងអាងផ្ទុកទឹក ធុងប្លាស្ទិចនិងត្រួតពិនិត្យប្រភពទឹកនៅតាមស្រះធម្មជាតិជាដើម។ ទន្ទឹមនិងនោះក្រុមការងារក៏ត្រួតពិនិត្យជាក់ស្តែងតំបន់មានហានីភ័យនិងសំខាន់ដែលអាចមានលទ្ឋភាពឆេះខ្ពស់ បណ្តាគ្រួសាររស់នៅប្របតាមព្រៃនិងស្តាប់របាយការណ៍ការងារម្ចាស់ការរៀបចំកម្លាំងយាមល្បាតជាប្រចាំត្រៀមខ្លួនជាស្រេចដើម្បីឆ្លើយតបទាន់ពេលវេលានៅពេលដែលមានករណីភ្លើងឆេះកើតឡើង។
តាមរយៈនោះក្រុមការងារបានកត់ត្រាទទួលស្គាល់ទិដ្ឋភាពនៃការបង្ការទប់ស្កាត់ និងពន្លត់ភ្លើងឆេះព្រៃយ៉ាងសកម្ម និងស្នើដល់មូលដ្ឋានឲ្យបង្កើនប្រសិទ្ធភាពនៃការគ្រប់គ្រងព្រៃឈើរបស់រដ្ឋ លើកកម្ពស់តួនាទី និងភារទទួលខុសត្រូវរបស់បណ្តាថ្នាក់ បណ្តាផ្នែក ជាពិសេសគឺម្ចាស់ព្រៃឈើក្នុងការគ្រប់គ្រង ការពារ អភិវឌ្ឍន៍ និងប្រើប្រាស់ព្រៃឈើ។ រួមជាមួយនោះ ជំរុញខ្លាំងការផ្តល់ព័ត៌មានអំពីកម្រិតអគ្គិភ័យ ផ្សព្វផ្សាយឃោសនាច្បាប់ និងណែនាំដល់អង្គការបុគ្គល ឲ្យលើកកម្ពស់ការយល់ដឹង ការទទួលខុសត្រូវ អនុវត្តឲ្យបានត្រឹមត្រូវនូវបទបញ្ញត្តិច្បាប់ស្តីពីការគ្រប់គ្រងឧបករណ៍ និងមធ្យោបាយបង្ការពន្លត់អគ្គិភ័យ ត្រៀមជាស្រេចក្នុងការបង្ការពន្លត់ភ្លើងឆេះព្រៃឲ្យបានទាន់ពេលវេលា និងមានប្រសិទ្ធភាព៕
ប្រែ៖ ណារីពៅ
