នារសៀលថ្ងៃទី ១៦ មករា លោក លឿងគឿង ប្រធានរដ្ឋសាធារណរដ្ឋសង្គមនិយមវៀតណាម និងគណប្រតិភូការងារមជ្ឈិមបានអញ្ជើញទៅសួរសុខទុក្ខ និងជូនពរឆ្នាំថ្មីដល់បក្ខភាគ អាជ្ញាធរ កងកម្លាំងប្រដាប់អាវុធ និងប្រជាជនខេត្តអានយ៉ាង ក្នុងឱកាសបុណ្យចូលឆ្នាំប្រពៃណីជាតិវៀតណាមឆ្នាំម្សាញ់ ២០២៥ និងឆ្ពោះទៅដល់គោលដៅប្រារព្ធខួបលើកទី ៩៥ឆាំ្ន បង្កើតបក្សកុម្មុយនិស្តវៀតណាម។
ចូលរួមជាមួយគណប្រតិភូការងារមានលោក ម៉ៃវ៉ាន់ជិញ សមាជិកគណៈកម្មាធិការមជ្ឈិមបក្ស ប្រធានគណៈចលនាមហាជនមជ្ឈិម។ លោក ឡេខាញ់ហៃ សមាជិកគណៈកម្មាធិការមជ្ឈិមបក្ស ប្រធានខុទ្ទកាល័យប្រធានរដ្ឋ។ លោកឧត្តមសេនីយ៍ឯក ផាមហ្វាយណាម សមាជិកគណៈកម្មាធិការមជ្ឈិមបក្ស អនុរដ្ឋមន្ត្រីក្រសួងការពារជាតិ រួមនិងថ្នាក់ដឹកនាំបណ្តាក្រសួង ផ្នែកមជ្ឈិម។
លោក ឡេហុងក្វាង សមាជិកគណៈកម្មាធិការមជ្ឈិមបក្ស លេខាបក្ខភាគខេត្តអានយ៉ាង។ លោក ហូវ៉ាន់ម៉ឹង សមាជិកបម្រុងនៃគណៈកម្មាធិការមជ្ឈិមបក្ស អនុលេខាបក្ខភាគខេត្ត ប្រធានគណៈកម្មាធិការប្រជាជនខេត្តអានយ៉ាង។ លោក ឡេវ៉ាន់នឹង អនុលេខាប្រចាំការបក្ខភាគខេត្ត ប្រធានក្រុមប្រឹក្សាប្រជាជនខេត្តអានយ៉ាង បានទទួលជួប និងធ្វើការជាមួយគណៈប្រតិភូ។
រាយការណ៍ជូនលោកប្រធានរដ្ឋ និងគណប្រតិភូមជ្ឈិម លោក ឡេហុងក្វាង លេខាបក្ខភាគខេត្តអានយ៉ាង បានឲ្យដឹងថា ជាមួយនឹងគោលដៅបន្តជំរុញកំណើនសេដ្ឋកិច្ច និងពន្លឿនការអនុវត្តន៍នូវភារកិច្ចមានភាពវាយទម្លុះនិងសំខាន់ៗក្នុងឆ្នាំ ២០២៤ ខេត្តអានយ៉ាង បានអនុវត្តខ្លាំងក្លាបណ្តាដំណោះស្រាយគ្រប់គ្រងសេដ្ឋកិច្ចសង្គម។ ចាប់តាំងពីពេលនោះមក ស្ថានភាពសេដ្ឋកិច្ចសង្គមរបស់ខេត្តអានយ៉ាង បានរីកចម្រើន បង្កើតបរិយាកាសថ្មី និងកម្លាំងជំរុញថ្មីក្នុងកំណើន និងអភិវឌ្ឍន៍។ មានគោលការណ៍និងគោលនយោបាយសំខាន់ៗជាច្រើនបានចេញផ្សាយមានប្រសិទ្ធភាព និងជះឥទ្ធិពលជាវិជ្ជមានដល់ការអភិវឌ្ឍន៍រួមរបស់ខេត្តទាំងមូល។
នៅឆ្នាំ ២០២៤ ខេត្តអានយ៉ាង អនុវត្តសម្រេចបាន និងលើសពីសន្ទស្សន៍ ១៣/១៥ ដែលសេចក្តីសម្រេចចិត្តក្រុមប្រឹក្សាប្រជាជនខេត្តកំណត់។ អត្រាកំណើនសេដ្ឋកិច្ច (GRDP) ក្នុងឆ្នាំ ២០២៤ ត្រូវបានសន្និដ្ឋានថាសម្រេចបាន ៧,១៦% និងGRDP ជាមធ្យមភាគសម្រាប់មនុស្សម្នាក់សម្រេចបាន ៦៦,២៤ លានដុងក្នុងមួយឆ្នាំ។ រចនាសម្ព័ន្ធសេដ្ឋកិច្ចកំពុងផ្លាស់ប្តូរជាវិជ្ជមាន បណ្តាវិស័យប្រៀបខ្លាំងដូចជា កសិកម្ម ពាណិជ្ជកម្ម និងទេសចរណ៍បន្តទទួលបានលទ្ធផលល្អ។ ហេដ្ឋារចនាសម្ព័ន្ធសេដ្ឋកិច្ចសង្គមបាប្រមូលផ្តុំវិនិយោគនិងលើកកម្ពស់។ របបសន្តិសុខសង្គមបានធានា ជីវភាពរស់នៅរបស់ប្រជាជនបានកែចម្រើនឥតឈប់ឈរ។ ស្ថានភាពជនជាតិ សាសនាមានស្ថិរភាព។ សន្តិសុខការពារជាតិ ព្រំដែនដែនដី និងអធិបតេយ្យភាពជាតិបានរក្សារឹងមាំជាដើម។
តាងនាមថ្នាក់ដឹកនាំបក្ស និងរដ្ឋ លោកប្រធានរដ្ឋ លឿងគឿង បានកោតសរសើរចំពោះកិច្ចខិតខំប្រឹងប្រែង ស្នាដៃ និងលទ្ធផលដែលបក្ខភាគ អាជ្ញាធរ និងប្រជាជនគ្រប់ជនជាតិក្នុងខេត្តអានយ៉ាង បានសាមគ្គី និងខិតខំពុះពារជម្នះរាល់ការលំបាកនានា ដើម្បីបំពេញភារកិច្ចឆ្នាំ២០២៤បានល្អ។ តាមរយៈនោះ ស្នើថ្នាក់បក្ខភាគ និងអាជ្ញាធរខេត្តអានយ៉ាង ឲ្យបន្តយល់ជ្រួតជ្រាប និងផ្សព្វផ្សាយអនុវត្តដោយប្រសិទ្ធភាពចំពោះគោលការណ៍រួមរបស់មជ្ឈិម ស្របតាមលក្ខណៈជាក់ស្តែងរបស់ខេត្ត។ ទន្ទឹមនឹងនោះ លោកបានសង្កត់ធ្ងន់ថា ខេត្តអានយ៉ាង នៅមានសក្ដានុពល និងលក្ខណៈជាច្រើនសម្រាប់ការអភិវឌ្ឍន៍ ដូច្នេះ មូលដ្ឋានចាំបាច់ត្រូវបន្តជំរុញសមិទ្ធិផលដែលខ្លួនសម្រេចបាន និងខិតខំបំពេញល្អភារកិច្ចសំខាន់ៗក្នុងឆ្នាំ ២០២៥។ តាមរយៈនោះ រួមចំណែកមានប្រសិទ្ឋភាពជាងទៀតទៅក្នុងការអភិវឌ្ឍន៍រួមរបស់តំបន់វាលទំនាបទន្លេគឺវឡុងនិងប្រទេស។
ក្នុងឱកាសនេះ លោកប្រធានរដ្ឋ លឿងគឿង បានប្រគល់អំណោយបុណ្យចូលឆាំ្នថ្មី ជាច្រើនដើម្បីលើកទឹកចិត្តគ្រួសារដែលមានសគុណចំពោះបដិវត្តន៍ និងគ្រួសារគោលនយោបាយគំរូ គ្រួសារក្រីក្រ និងកម្មករខេត្តអានយ៉ាង។
នូវថ្ងៃដដែល លោកប្រធានរដ្ឋ លឿងគឿង និងគណៈប្រតិភូបានអញ្ជើញទៅសួរសុខទុក្ខគ្រួសារលោក វ៉ដាយញ៉ាន និងលោកស្រី វ៉ធីវ៉ាន់ ដែលជាគ្រួសារជើងចាស់បដិវត្តន៍គំរូនៅលើភូមិសាស្ត្រទីក្រុងឡុងស្វៀន។ អញ្ជើញទៅសួរសុខទុក្ខគ្រួសារលោកឧត្តមសេនីយ៍ឯក ប៊ុយវ៉ាន់ហ្វុន អតីតនាយករងនៃអគ្គនាយកដ្ឋាននយោបាយកងទ័ពប្រជាជនវៀតណាម។
ប្រែ៖ ណារីពៅ
