នារសៀលថ្ងៃទី ២ ធ្នូ លោក ហូវ៉ាន់ម៉ឹង សមាជិកបម្រុងនៃគណៈកម្មាធិការមជ្ឈិមបក្ស អនុលេខាបក្ខភាគខេត្ត ប្រធានគណៈកម្មាធិការប្រជាជនខេត្តអានយ៉ាង បានធ្វើអធិបតីភាពសម័យប្រជុំដើម្បីស្តាប់របាយការណ៍ស្តីពីការរៀបចំ “វេទិកាមេគង្គ Connect ឆ្នាំ២០២៤” នៅខេត្តអានយ៉ាង។លោកស្រី ង្វៀនធីមិញធ្វី អនុប្រធានគណៈកម្មាធិការប្រជាជនខេត្តអានយ៉ាង រួមជាមួយនិងថ្នាក់ដឹកនាំអង្គភាព មន្ទីរ ផ្នែកបានចូលរួម។
ដោយមានប្រធានបទសំខាន់ “Mekong Connect ២០២៤ - វេទិកាជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងបច្ចេកវិជ្ជានៅតំបន់វាលទំនាបទន្លេគឺវឡុង-ទីក្រុងហូជីមិញ និងប្រទេសទាំងមូលឆ្ពោះទៅរកការអភិវឌ្ឍន៍ប្រកបដោយចីរភាពក្នុងបរិបទប្រកួតប្រជែងថ្មី” វេទិកាមេគង្គ Connect ឆ្នាំ ២០២៤ នឹងប្រព្រឹត្តទៅនៅថ្ងៃទី១៧ -១៨ ឆ្នាំ ២០២៤ នៅសកលវិទ្យាល័យអានយ៉ាង អាស្រ័យដោយគណៈកម្មាធិការប្រជាជនខេត្តអានយ៉ាងនិងគណៈកម្មាធិការប្រជាជនទីក្រុងហូជីមិញធ្វើអធិបតីភាពរួមគ្នា។
វេទិកាមេគង្គ Connect ឆ្នាំ ២០២៤ នឹងមានព្រឹត្តិការណ៍សំខាន់ៗជាច្រើនដូចជា៖ ពិធីបើកដំណើរការមេគង្គ Connect ឆ្នាំ ២០២៤។ ថ្ងៃបុណ្យផ្តើមអាជីពបៃតង អន្តរជាតិ ការផ្សាយផ្ទាល់លក់ទំនិញ។ សិក្ខាសាលាក្រោមប្រធានបទ “អភិវឌ្ឍន៍ធនធានរបស់ជនជាតិដើមភាគតិច និងសេដ្ឋកិច្ចមូលដ្ឋានតាមរយៈតភ្ជាប់តំបន់ក្នុងបរិបទប្រកួតប្រជែងថ្មី”។ ទៅទន្ទឹមនិងព្រឹត្តិការណ៍សំខាន់ៗ គឺជាសកម្មភាពតាំងពិព័រណ៌ជាមួយប្រធានបទ “ទីក្រុងហូជីមិញ និងតំបន់វាលទំនាបទន្លេគឺវឡុង បង្កើនតភ្ជាប់និងពង្រីកកម្លាំងផ្ទៃក្នុងឆ្ពោះទៅរកការអភិវឌ្ឍន៍ដោយចីរភាព”។ តាមរយៈនោះដើម្បីផ្សព្វផ្សាយ រូបភាពទេសចរណ៍ វិនិយោគ ឌីជីថលូបនីយកម្ម ការផ្លាស់ប្តូរឌីជីថល ផលិតផលពិសេស ផលិតផល OCOP រួមជាមួយនឹងសមិទ្ធិផល គំនិតច្នៃប្រឌិត ដំណោះស្រាយ ទម្រង់អាជីវកម្ម និងផលិតផលថ្មីតាមនិន្នាការសេដ្ឋកិច្ចបៃតង អាជីវកម្មឌីជីថលរបស់ខេត្តអានយ៉ាង ទីក្រុងហូជីមិញ និងនៅតាមខេត្តតំបន់វាលទំនាបទន្លេគឺវឡុង។
ជាពិសេស សម័យប្រជុំពេញអង្គនៃវេទិកាមេគង្គ Connect ឆ្នាំ ២០២៤ ក្រោមប្រធានបទ “ប្រភពទុនវិនិយោគ និងប្រភពធនធានមនុស្សសម្រាប់តភ្ជាប់ជានិរន្តរភាព” នឹងប្រព្រឹត្តទៅនៅម៉ោង ៨ និង០០នាទី ព្រឹក ថ្ងៃទី ១៨ ខែធ្នូ ឆ្នាំ ២០២៤ អាស្រ័យដោយថ្នាក់ដឹកនាំក្រសួងកសិកម្ម និងអភិវឌ្ឍន៍ជនបទ ក្រសួងវិទ្យាសាស្ត្រ និងបច្ចេកវិជ្ជា គណៈកម្មាធិការប្រជាជនទីក្រុងហូជីមិញ បក្ខភាគខេត្ត គណៈកម្មាធិការប្រជាជនខេត្តអានយ៉ាង និងគណៈកម្មាធិការប្រជាជននៅតាមខេត្ត ក្រុងនានានៅតំបន់វាលទំនាបទន្លេគឺវឡុងបានធ្វើជាអធិបតីជាមួយគណៈប្រតិភូចំនួន ៦០០ នាក់ចូលរួម។
ថ្លែងមតិបញ្ចប់នៃកិច្ចប្រជុំ លោក ហូវ៉ាន់ម៉ឹង ប្រធានគណៈកម្មាធិការប្រជាជនខេត្តអានយ៉ាង បានស្នើឲ្យអង្គភាព មន្ទីរ ផ្នែកពាក់ព័ន្ធបន្តសហការ ត្រួតពិនិត្យឡើងវិញជាបន្ទាន់នូវខ្លឹមសារការងារតាមផែនការ។ទន្ទឹមនឹងនោះ ត្រូវបំពេញបញ្ជីរាយនាមភ្ញៀវ និងប្រតិភូទាំងក្នុង និងក្រៅខេត្តឲ្យបានលឿន និងច្បាស់លាស់។ បណ្តាអនុគណៈកម្មការភស្តុភារ និងពិធីទទួលប្រតិភូត្រូវរៀបចំឲ្យបានហ្មត់ចត់។ បណ្តាអនុគណៈកម្មការដែលនៅសេសសល់ត្រូវសហការចាត់ការងារជាក់លាក់។បណ្តាកម្លាំងសមត្ថកិច្ច និងជំនាញបង្កើតផែនការដើម្បីធានាការថែរក្សាសន្តិសុខ សណ្តាប់ធ្នាប់ និងលំហូរចរាចរណ៍។ការពារសុខភាព និងសុវត្ថិភាពអនាម័យចំណីអាហារជាដើម ដើម្បីវេទិកាមេគង្គ Connect ឆ្នាំ ២០២៤ ប្រព្រឹត្តឡើងដោយជោគជ័យ៕
ប្រែ៖ណារីពៅ
