ព្រឹកថ្ងៃទី១១ ខែកុម្ភៈ គណៈអចិន្ត្រៃយ៍បក្ខភាគខេត្តអានយ៉ាង បានរៀបចំសន្និបាតគណៈកម្មាធិការបក្ខភាគខេត្តឯកទេសបទ។សមមិត្ត ឡេហុងក្វាង សមាជិកគណៈកម្មាធិការមជ្ឈិមបក្ស លេខាបក្ខភាគខេត្តអានយ៉ាងធ្វើអធិបតីភាពសន្និបាត។សមមិត្ត ឡេវ៉ាន់នឹង អនុលេខាប្រចាំការបក្ខភាគខេត្ត ប្រធានក្រុមប្រឹក្សាប្រជាជនខេត្តអានយ៉ាង។សមមិត្ត ហូវ៉ាន់ម៉ឹង សមាជិកបម្រុងនៃគណៈកម្មាធិការមជ្ឈិមបក្ស ប្រធានគណៈកម្មាធិការប្រជាជនខេត្តអានយ៉ាង។ បណ្តាសមមិត្តសមាជិកគណៈកម្មាធិការបក្ខភាគខេត្ត។ ថ្នាក់ដឹកនាំមូលដ្ឋាន និងអង្គភាពពាក់ព័ន្ធបានអញ្ជើញចូលរួមផងដែរ។
នៅក្នុងសន្និបាត សមមិត្ត ឡេហុងក្វាង សមាជិកគណៈកម្មាធិការមជ្ឈិមបក្ស លេខាបក្ខភាគខេត្ត អានយ៉ាង បានបង្ហាញនូវសេចក្តីសម្រេចរបស់គណលេខាបក្សដែលកំណត់តែងតាំងសមមិត្តនារី ង្វៀនធីមិញគីវ លេខាបក្ខភាគស្រុកចើម៉ើយ។ សមមិត្ត ក្វ័តតូយ៉ាង លេខាបក្ខភាគស្រុកអានភូ ចូលរួមគណៈកម្មាធិការបក្ខភាគខេត្តអានយ៉ាងអាណត្តិ ២០២០-២០២៥។
ប្រគល់សេចក្តីសម្រេចរបស់គណលេខាបក្សអនុម័តឲ្យសមមិត្ត ងោហុងអៀន សមាជិកគណៈអចិន្ត្រៃយ៍បក្ខភាគខេត្ត ប្រធានគណៈចាត់តាំងបក្ខភាគខេត្ត។ សមមិត្ត ដាំងវៀតចូវ ប្រធានការិយាល័យត្រួតពិនិត្យ ឃ្លាំមើល និងវិន័យរបស់បក្ស ស្ថាប័នគណៈកម្មាធិការត្រួតពិនិត្យបក្ខភាគខេត្តអានយ៉ាងចូលរួមគណៈកម្មាធិការត្រួតពិនិត្យបក្ខភាគខេត្តអានយ៉ាង សម្រាប់អាណត្តិ ២០២០-២០២៥។ ប្រគល់សេចក្តីសម្រេចរបស់គណលេខាបក្សអនុម័តឲ្យសមមិត្ត ង្វៀនវៀតប៊ិញ សមាជិកគណៈកម្មាធិការត្រួតពិនិត្យបក្ខភាគខេត្តកាន់តំណែងជាអនុប្រធានគណៈកម្មាធិការត្រួតពិនិត្យបក្ខភាគខេត្តអានយ៉ាងអាណត្តិ ២០២០-២០២៥។
ថ្លែងមតិក្នុងពិធីប្រគល់ភារកិច្ច សមមិត្ត ឡេហុងក្វាង សមាជិកគណៈកម្មាធិការមជ្ឈិមបក្ស លេខាបក្ខភាគខេត្តអានយ៉ាង បានអបអរសាទរចំពោះសមមិត្តទាំង ៥ រូបដែលទើបតែទទួលបានសេចក្តីសម្រេច ហើយបញ្ជាក់ថា នេះជាកិត្តិយសដ៏ធំធេង ហើយក៏ជា ការទទួលខុសត្រូវដ៏ធ្ងន់ធ្ងផងដែរ។ លោកលេខាបក្ខភាគខេត្ត ឡេហុងក្វាង បានស្នើឲ្យសមមិត្តទាំងនេះ រក្សាឲ្យបានរឹងមាំនូវគុណធម៌នយោបាយ និងបន្តសិក្សាលត់ដំ និងពង្រីកនូវសមត្ថភាព ចំណង់ចំណូលចិត្ត សាមគ្គីជាមួយសមូហភាពខិតខំសម្រេចភារកិច្ចនយោបាយដែលបានប្រគល់ជូនបានល្អ។
សមមិត្តបានសង្កត់ធ្ងន់ថា ភារកិច្ចដែលបានកំណត់សម្រាប់ខេត្តនាពេលខាងមុខគឺធ្ងន់ណាស់ ហើយសង្ឃឹមថាគ្រប់ថ្នាក់ គ្រប់វិស័យ គ្រប់មូលដ្ឋាន និងប្រជាជនគ្រប់ស្រទាប់បន្តសាមគ្គី ខិតខំពុះពារជម្នះការលំបាក ចាប់យកឱកាស ទាញយកផលពីសក្តានុភាព ប្រៀបខ្លាំង បំពេញគោលដៅភារកិច្ចអភិវឌ្ឍន៍សេដ្ឋកិច្ចសង្គម កសាងមាតុភូមិអានយ៉ាង កាន់តែអារ្យធម៌ សម្បូរបែបស្រស់ស្អាតនិងជីវភាពរស់នៅរបស់ប្រជាជនកាន់តែបានលើកកម្ពស់ពីមួយថ្ងៃទៅមួយថ្ងៃ។
នៅក្នុងសន្និបាត គណៈកម្មាធិការបក្ខភាគខេត្តអានយ៉ាង បានផ្តល់យោបល់ចំពោះបទជម្រាបស្តីពីសេចក្តីព្រាងគ្រោងខ្លឹមសារលម្អិតរបាយការណ៍នយោបាយរបស់គណៈកម្មាធិការបក្ខភាគខេត្តលើកទី ១១ ដាក់ជូនមហាសន្និបាតបក្ខភាគខេត្តលើកទី ១២។ សេចក្តីព្រាងលម្អិតនៃរបាយការណ៍ពិនិត្យឡើងវិញរបស់គណៈកម្មាធិការបក្ខភាគខេត្តលើកទី ១១។ បទជម្រាបស្តីពីការដកគោលការណ៍វិនិយោគសម្រាប់គម្រោង “តំបន់ទីក្រុងភាគខាងលិចទីក្រុងឡុងស្វៀន”។ ផ្តល់យោបល់លើសេចក្តីព្រាងគម្រោង៖ បញ្ចប់សកម្មភាពរបស់បក្ខភាគផែនស្ថាប័ន និងធុរកិច្ចខេត្ត។ បញ្ចប់សកម្មភាពប្រតិភូបក្ស និងគណៈកម្មាធិការកិច្ចការបក្សក្រោមឱវ៉ាទបក្ខភាគខេត្ត។ បង្កើតបក្ខភាគស្ថាប័នបក្សខេត្ត។ បង្កើតបក្ខភាគគណៈកម្មាធិការប្រជាជនខេត្ត។រួមបញ្ចូលគណឃោសនាអប់រំ និងចលនាមហាជនបក្ខភាគខេត្តជាគណឃោសនាអប់រំនិងចលនាមហាជនបក្ខភាគខេត្ត។បញ្ចប់សកម្មភាពគណៈការពារនិងថែទាំសុភាពកម្មាភិបាលខេត្ត។បទជម្រាបកែសម្រួល និងបំពេញបន្ថែមផែនការលេខ ១៩០-KH/TU ចុះថ្ងៃទី ២៧ ខែសីហា ឆ្នាំ ២០២៤ របស់បក្ខភាគខេត្ត ដើម្បីអនុវត្តសារាចរណ៍ណែនាំលេខ ៣៥-CT/TW របស់ការិយាល័យនយោបាយស្តីពីមហាសន្និបាតបក្ខភាគគ្រប់លំដាប់ថ្នាក់ឆ្ពោះទៅកាន់មហាសន្និបាតទូទាំងប្រទេសលើកទី ១៤ របស់បក្ស។ បទជម្រាបកែសម្រួល បំពេញបន្ថែមសេចក្តីណែនាំលេខ ០៣-HD/TU ចុះថ្ងៃទី ១១ ខែតុលា ឆ្នាំ ២០២៤ របស់គណៈអចិន្ត្រៃយ៍បក្ខភាគខេត្ត ស្តីពីខ្លឹមសារមួយចំនួននៃការរៀបចំមហាសន្និបាតបក្ខភាគក្រោមឱវ៉ាទបក្ខភាគខេត្ត និងសាខាបក្ស បក្ខភាគ ថ្នាក់មូលដ្ឋានអាណត្តិ ២០២៥ - ២០៣០។
សន្និបាតគណៈកម្មាធិការបក្ខភាគខេត្តឯកទេសបទនឹងបន្តនៅរសៀលថ្ងៃនេះ៕
ប្រែ៖ ណារីពៅ
