ក្នុងឱកាសបុណ្យចូលឆ្នាំថ្មីវៀតណាម ២០២៤ ទើបកន្លងទៅនេះ ភ្ញៀវទេសចរមួយចំនួនធំបានជ្រើសរើសខេត្ត អានយ៉ាង ជាគោលដៅរបស់ពួកគាត់។ ក្នុងអំឡុងថ្ងៃទី ៧ ដល់ថ្ងៃទី ១៤ ខែកុម្ភៈ (ពោលគឺថ្ងៃទី ២៨ ដល់ថ្ងៃទី ៥ នៃបុណ្យចូលឆាំ្នថ្មី) ខេត្តទទួលភ្ញៀវទេសចរណ៍ក្នុង និងក្រៅប្រទេសជាង ៦១០ពាន់នាក់ កើនឡើង ២០% ធៀបនឹងរយៈពេលដូចគ្នាក្នុងឆ្នាំ ២០២៣។
ភ្ញៀវទេសចរជាច្រើនបានទៅទស្សនា និងគោរពបូជានៅវត្តលោកយាយភ្នំស្វាម
គោលដៅទាក់ទាញបំផុតសម្រាប់ភ្ញៀវទេសចរគឺតំបន់ទេសចរណ៍ជាតិភ្នំស្វាម។ នៅទីនេះ ភ្ញៀវទេសចរគោរពបូជាលោកយាយភ្នំស្វាម ដើម្បីបួងសួងសុំសេចក្តីសុខនៅដើមឆ្នាំ។ ទន្ទឹមនឹងនោះ រួមផ្សំការទស្សនា និងការគោរពបូជានៅវត្ត តៃអាន ប្រាំងលោក ថ្វយង៉ុកហូវ និងវត្តរូងជាដើម។ ក្រៅពីនេះ ភ្ញៀវទេសចរជាច្រើនបានជ្រើសរើសបទពិសោធន៍ជិះកន្ត្រកខ្សែកាបឡើងលើកំពូលភ្នំស្វាម ដើម្បីគយគន់ទេសភាពព្រំដែននីរតីទិស។
នៅទីរួមខេត្ត ទីញបៀន តំបន់ទេសចរណ៍ភ្នំពពាល និងតំបន់ទេសចរណ៍ព្រៃស្មាច់ត្រាសឺ បន្តស្វាគមន៍ភ្ញៀវទេសចរជាច្រើន។ នៅភ្នំពពាល មនុស្សជាច្រើនបានជ្រែកគ្នាដើម្បីគយគន់កម្ពូលភ្នំខ្ពស់បំផុតនៅតំបន់វាលទំនាបទន្លេគឺវឡុងដោយធ្យោបាយជាច្រើនដូចជា កន្ត្រកខ្សែកាប រថយន្ត ម៉ូតូ និងទាំងថ្មើជើងឡើងភ្នំ។ ភ្ញៀវទេសចរជាច្រើនមានជំនឿថា ការធ្វើធម្មយាត្រាលើភ្នំនៅដើមឆ្នាំនឹងនាំមកនូវលាភសំណាងល្អ។
ព្រៃស្មាច់ត្រាសឺ បានភ្ញៀវទេសចរជាច្រើនមកទស្សនាដើម្បីសម្របខ្លួនជាមួយធម្មជាតិព្រៃឈើ និង “បរបាញ់” រូបថតប្លែកៗដែលមិនអាចរកឃើញនៅទីណាផ្សេងទៀត។ ដើម្បីទាក់ទាញភ្ញៀវទេសចរណ៍ គោលដៅទេសចរណ៍បានរៀបចំអាហារប៊ូហ្វេ នំប្រជាប្រិយ និងផ្លែឈើ គួបផ្សំនឹងល្បែងកម្សាន្តសប្បាយ និងអនុវត្តគោលនយោបាយបញ្ចុះតម្លៃជាច្រើន។
ដើម្បីបម្រើភ្ញៀវទេសចរឲ្យបានល្អ ក្នុងឱកាសបុណ្យចូលឆ្នាំថ្មីប្រពៃណីវៀតណាម បណ្តាតំបន់ទេសចរណ៍ និងទីតាំងទស្សនានានាក្នុងខេត្ត អានយ៉ាង បានយកចិត្តទុកដាក់លើការកែលម្អមូលដ្ឋានសម្ភារៈ និងសាងសង់នូវទេសភាពតូចៗដែលទាក់ទាញភ្នែក គុណភាពសេវាកម្មខ្ពស់ និងរៀបចំសកម្មភាពកម្សាន្ត ជាច្រើន។ ការកើនឡើងអំពីចំនួនភ្ញៀវទេសចរណ៍ក្នុងថ្ងៃដំបូងនៃដើមឆ្នាំគឺជាសញ្ញាចាប់ផ្តើមពោពេញទៅដោយភាបរីករាយសម្រាប់វិស័យទេសចរណ៍របស់ខេត្តអានយ៉ាងនៅក្នុងឆ្នាំ ២០២៤៕
ប្រែ៖ ណារីពៅ