ថ្ងៃទី ០១ ខែកក្កដា លោក ដាំងហុងទ្វឺន ប្រធានក្រុមហ៊ុនធានារ៉ាប់រងសង្គមអានយ៉ាង បានមានប្រសាសន៍ថា នៅថ្ងៃទី ៣០ ខែមិថុនា រដ្ឋាភិបាលបានចេញអនុក្រឹត្យលេខ ៧៥/២០២៤/ND-CP ស្តីពីការកែសម្រួលប្រាក់សោធននិវត្តន៍ ប្រាក់អត្ថប្រយោជន៍ធានារ៉ាប់រងសង្គម និងប្រាក់អត្ថប្រយោជន៍ប្រចាំខែ។
ការទូទាត់ប្រាក់សោធននិវត្តន៍ និងប្រាក់អត្ថប្រយោជន៍ធានារ៉ាប់រងសង្គមនៅសង្កាត់ប៊ិញខាញ់(ទីក្រុងឡុងស្វៀន)
តាមរយៈនោះ ចាប់ពីថ្ងៃទី ០១ ខែកក្កដា ឆ្នាំ ២០២៤ ប្រាក់សោធននិវត្តន៍ ប្រាក់អត្ថប្រយោជន៍ធានារ៉ាប់រងសង្គម និងប្រាក់អត្ថប្រយោជន៍ប្រចាំខែនឹងត្រូវបានកែសម្រួលកើនឡើង១៥%។ទន្ទឹមនិនោះ សម្រាប់អ្នកកំពុងទទួលប្រាក់សោធននិវត្តន៍ ប្រាក់អត្ថប្រយោជន៍ធានារ៉ាប់រងសង្គម និងប្រាក់អត្ថប្រយោជន៍ប្រចាំខែមុនថ្ងៃទី ០១ ខែមករា ឆ្នាំ ១៩៩៥ បន្ទាប់ពីការកែសម្រួលកើនឡើង ១៥% ដែលមានកម្រិតទទួលបានពី ៣ លាន ២០០ពាន់ដុង/ម្នាក់/ខែ ដល់ក្រោម ៣ លាន ៥០០ពាន់ដុង/ម្នាក់/ខែ គឺកែសម្រួលកើនឡើងដល់ ៣ លាន ៥០០ ពាន់ដុង/ម្នាក់/ខែ។
ធានារ៉ាប់រងសង្គមអានយ៉ាង បានកែសម្រួលប្រាក់សោធននិវត្តន៍ និងប្រាក់អត្ថប្រយោជន៍ធានារ៉ាប់រងសង្គមសម្រាប់មនុស្សជាង ១៦.៧០០នាក់ និងអនុវត្តការទូទាត់តាមរយៈគណនី ATM ទៅឲ្យអ្នកទទួលផលចំនួន១២.១៧៦នាក់នៅក្នុងទី ០១ ខែកក្កដា ជាមួយនឹងចំនួនទឹកប្រាក់ទូទាត់ជាសរុប ៩៤ ពាន់លានដុង។
នៅសល់ចំនួន ៤.៥៤៧នាក់ទៀតត្រូវទូទាត់ដោយសាច់ប្រាក់ ជាមួយនឹងទឹកប្រាក់ជាសរុបចំនួន ២៩ពាន់លានដុង នឹងដំណើការទទួលប្រាក់សោធននិវត្តន៍ និងប្រាក់អត្ថប្រយោជន៍ធានារ៉ាប់រងសង្គមនៅតាមកន្លែងប្រតិបត្តិការរបស់ប្រៃសណីយ៍ចាប់ពីថ្ងៃទី ០១ ដល់ថ្ងៃទី ១០ ខែកក្កដា។
នេះគឺជាកម្រិតកើនឡើងប្រាក់សោធននិវត្តន៍ និងប្រាក់អត្ថប្រយោជន៍ធានារ៉ាប់រងសង្គមខ្ពស់បំផុតតាំងពីមុនមកដល់ពេលនេះ។ ការកែសម្រួលលើកនេះ មានវិសាលភាពទូលំទូលាយ រួមទាំងអ្នកដែលកំពុងទទួលបានប្រាក់សោធនពីការចូលរួមធានារ៉ាប់រងសង្គមជាកាតព្វកិច្ច (ផែនរដ្ឋនិងឯកជន) និងអ្នកចូលរួមធានារ៉ាប់រងសង្គមដោយស្ម័គ្រចិត្ត។ អ្នកដែលត្រូវបានកែសម្រួលមានចំនួនប្រាក់ទាបបំផុតក្នុងលើកនេះគឺ ៨១ពាន់ដុង ខ្ពស់បំផុតគឺ ៣លាន២៩៧ពាន់២០០ដុង។
ប្រធានធានារ៉ាប់រងសង្គមខេត្តបានចុះហត្ថលេខាលើសេចក្តីប្រកាសលេខ ១៣៣២/BHXH-CDBHXH ស្តីពីការទូទាត់ប្រាក់សោធននិវត្តន៍ ប្រាក់ប្រអត្ថប្រយោជន៍ធានារ៉ាប់រងសង្គម និងប្រាក់អត្ថប្រយោជន៍ប្រចាំខែសម្រាប់ការទូទាត់ខែកក្កដា ឆ្នាំ ២០២៤។
តាមរយៈនោះ តម្រូវឲ្យប្រៃសណីយ៍ខេត្តអានយ៉ាង រៀបចំការជូនដំណឹងដល់អ្នកទទួលផលដឹងអំពីខ្លឹមសារនៃកម្រិតបានទទួលផល ពេលវេលា និងទីកន្លែងនៃការទូទាត់។ ធ្វើការទូទាត់ធានាថាទាន់ពេល ពេញលេញ និងដល់ដៃអ្នកបានទទួលផល (រួមទាំងអ្នកទទួលផលជាសាច់ប្រាក់ និងអ្នកទទួលផលតាមរយៈគណនីផ្ទាល់ខ្លួន)។ ប្រមូល និងធ្វើបច្ចុប្បន្នភាពព័ត៌មានអត្តសញ្ញាណពលរដ្ឋ អត្តសញ្ញាណផ្ទាល់ខ្លួន និងជួយដល់អ្នកបានទទួលផល ដំឡើងកម្មវិធី VssID៕
ប្រែ៖ ណារីពៅ