ដោយមានគោលដៅផ្តល់ពូជយ៉ាងសកម្មដល់អ្នកចិញ្ជឹមខ្យងនៅលើភូមិសាស្ត្រនិងសាកល្បងការបន្តពូជដោយសិប្បនិម្មិត និងសុក្រឹតការណែនាំបច្ចេកទេសសម្រាប់ការបន្តពូជខ្យងសិប្បនិម្មិត សមស្របនឹងលក្ខណៈជាក់ស្តែងរបស់មូលដ្ឋាន ស្ថានីយ៍ជំរុញកសិកម្មស្រុកចូវភូ បានរៀបចំ និងផ្សព្វផ្សាយអនុវត្តទម្រង់ “ផលិតពូជខ្យងហោងលឿងស្រែ” រួមចំណែកបង្កើនចំណូលបន្ថែមនិងអភិវឌ្ឍន៍សេដ្ឋកិច្ចសម្រាប់កសិករ។
ទម្រង់ “ផលិតពូជខ្យងហោងលឿងស្រែ”
ទម្រង់ “ផលិតពូជខ្យងហោងលឿងស្រែ” ដោយទ្រង់ទ្រាយ ១៥០ គីឡូក្រាមខ្យងញីឈ្មោល ព្រលែងក្នុងអាងសំណាញ ៥០ម៉ែត្រ នៅឯផ្ទះរបស់លោក ង្វៀនភូតឹន នៅឃុំ ប៊ិញភូ (ស្រុក ចូវភូ) ។ ទម្រង់នេះបានអនុវត្តពីបច្ចេកទេសចិញ្ចឹមខ្យងញីឈ្មោលពេញវ័យ និងរៀបចំខ្យងដើម្បីបង្កាត់ពូជ ប្រមូលពង ភ្ញាស់ពង និងចិញ្ចឹមខ្យងពូជ។ ក្នុងអំឡុងពេលផលិតពូជខ្យងហោងលឿងស្រែ គេបានរកឃើញថាខ្យងបន្តពូជបានល្អ ហើយអត្រាខ្យងពូជរស់រានមានជីវិតមានកម្រិតខ្ពស់។ បន្ទាប់ពីរយៈពេល ៤ ខែចិញ្ចឹមបរិមាណ ពងដែលទទួលបានគឺ ៤៨គីឡូក្រាម អត្រារស់រានរបស់ខ្យងញីឈ្មោលគឺ ៧៤% អត្រារស់រានរបស់ខ្យងពូជគឺ ៨១%។ តម្លៃលក់ពូជខ្យងគឺ ២០០ដុង/កូន ក្រោយពេលផាត់ថ្លៃដើមរួចរាល់ នៅចំណេញបានជាង ១៦ លានដុង តាមរយៈនោះបានបង្ហាញថា ទម្រង់សុទ្ឋតែសម្រេចបានតម្រូវការលើកឡើង។
បងស្រី ង្វៀន ធីឃីម កម្មាភិបាលបច្ចេកទេសនៃស្ថានីយ៍ជំរុញកសិកម្មចូវភូ បានឲ្យដឹងថា នៅពេលដែលចិញ្ចឹម ពូជខ្យងហោងលឿងស្រែគឺត្រូវជ្រើសរើសខ្យងញីឈ្មោលដែលធំខ្លាំង និងស្មើគ្នា ហើយមិនត្រូវជ្រើសរើសខ្យងញីខ្យងឈ្មោលដែលទិញមកពីផ្សារនោះទេ ត្រូវទិញពីម្ចាស់ជង្រុក។ ខ្យងញីខ្យងឈ្មោលមានចលនារហ័ស មានពណ៌ភ្លឺរលោងនិងមូលស្អាត។ ទំហំព្រលែងខ្យងគឺ ៣០ខ្យង/គីឡូក្រាម ដង់ស៊ីតេព្រលែងគឺ ៧៥គូនៃខ្យងញីឈ្មោលក្នុងមួយម៉ែត្រការ៉េ។ កម្ពស់ទឹកក្នុងស្រះចិញ្ជឹមពី ០,៨ ទៅ ១ ម៉ែត្រ។ សំណាញ់ត្រូវដាក់នៅជិតបាតស្រះ កម្រិតទឹករក្សាទុកនៅត្រឹមពី ០,៤ ទៅ០,៦ ម៉ែត្រ។ស្រះចិញ្ចឹមផ្គត់ផ្គង់ និងបង្ហូរទឹកយ៉ាងសកម្មក្នុងអំឡុងពេលចិញ្ជឹម។ ផ្ទៃទឹកត្រូវដាំចកស្លឹកធំ ស្មើ១/២នៃទំហំស្រះចិញ្ជឹម កម្រិត pH ពី ៦,៥ ទៅ ៨ សមរម្យសម្រាប់ការចិញ្ចឹមខ្យង។
នៅពេលព្រលែងខ្យងញីឈ្មោល ចាំបាច់ត្រូវជ្រើសរើសថ្ងៃត្រជាក់។ ខ្យងញីឈ្មោល (ចិញ្ជឹមពាណិជ្ជកម្ម) ត្រូវដឹកជញ្ជូនដោយកន្ត្រក កញ្រែងឫស្សី ទ្រុង (មានទ្រាប់នីឡុង) ឬប្រអប់ ផើង ឬថង់ក្រណាត់ដែលមានសារ៉ាយនិងចកនៅខាងក្នុង។ ជៀសវាងការបែកសំបក ឬសន្ទះខ្យងដែលប៉ះពាល់ដល់អត្រារស់រានរបស់ខ្យងញីឈ្មោល។ ក្នុងលក្ខណៈចិញ្ចឹមខ្យងសាច់នៅក្នុងអាង ខ្យងហោងលឿងស្រែស៊ីអាហារពណ៌បៃតងរួមជាមួយនឹងអាហារឧស្សាហកម្មដែលមានប្រូតេអ៊ីន ២០%។ បរិមាណអាហារដែលឲ្យខ្យងស៊ីក្នុងមួយថ្ងៃរក្សាពី ២ ទៅ ៣% នៃទម្ងន់ខ្លួន។ មួយថ្ងៃឲ្យខ្យងស៊ីតែម្តងនៅពេលព្រឹក។ ផ្លាស់ប្តូរទឹកក្នុងស្រះរៀងរាល់ ១៥ ថ្ងៃម្តង កម្រិតទឹកត្រូវរក្សានៅត្រឹមពី ០,៨ - ១ ម៉ែត្រ។ ដល់ពេលខ្យងត្រូវបន្តពូជ ចាំបាច់ត្រូវរៀបចំធ្នើពំនូកដីអណ្តែត (ប្រវែងមិនលើសពី ០,៥ម) បានរៀបចំក្នុងអាងចិញ្ជឹមសម្រាប់ខ្យងឡើងពង។ ដើម្បីចៀសវាងគ្រាប់ និងសំបុកពងត្រូវបែក សំបុកពងខ្យងគួរតែប្រមូលទិញបន្ទាប់ពីពងបាន ៤ ម៉ោងនៅពេលសំបកពងរឹង។ រើសចោលពងដែលខូចនិងពងពណ៌ស។
បន្ទាប់មកយកពងទៅភ្ញាស់ក្នុងអាង កម្រិតទឹកក្នុងធុងភ្ញាស់ត្រូវរក្សានៅចន្លោះប្រហែលពី ៤ ទៅ៦ សង់ទីម៉ែត្រ ដោយធានាថាសំបុកពងមិនលិចទឹក។ បន្ទាប់ពី ៥ ទៅ ៧ ថ្ងៃផ្លាស់ប្តូរទឹកហើយផ្លាស់ប្តូរទឹកក្នុងអាងភ្ញាស់ពី ៥០ ទៅ ៧០%។ ដង់ស៊ីតេសំបុកចាប់ពី ២០០ ទៅ ២៥០សំបុក/ម២។ ក្នុងអំឡុងពេលភ្ញាស់ ត្រូវបិទបាំងសំបុកពងឲ្យងងឹត ហើយបាញ់ទឹកទៅលើសំបុកពងជារៀងរាល់ថ្ងៃ។ រយៈពេលភ្ញាស់ពងខ្យងហោងលឿងស្រែញាស់អាចចាប់ពី ១៣ ទៅ ២៤ ថ្ងៃ អាស្រ័យលើលក្ខណៈបរិស្ថាន។ នៅដំណាក់កាលនៃការចិញ្ចឹមខ្យងពូជ ចាំបាច់ត្រូវប្រើសំណាញ់លួសល្អ នៅខាងក្នុងអាងត្រូវបានរៀបចំធ្នើដោយចកស្លឹកធំ។ ដង់ស៊ីតេភ្ញាស់ប្រហែលពី ៣០០ ទៅ ៦០០កូន/ម2 ។ អាហារ៖ ប្រើគ្រាប់អាហារឧស្សាហកម្មអណ្តែតទឹក (ប្រូតេអ៊ីនពី ១៨ ទៅ ២០%) កិនម៉ត់។ បរិមាណអាហារដែលឲ្យខ្យងស៊ីក្នុងមួយថ្ងៃរក្សាពី ៣ ទៅ ៥% នៃទម្ងន់ខ្លួន។ បន្ទាប់ពីរយៈពេលភ្ញាស់ ១៥ ថ្ងៃ ខ្យងដែលមានទម្ងន់ ១៥.០០០/គក្រ ក្លាយជាខ្យងពូជ ហើយអាចចិញ្ចឹមជាលក្ខណៈពាណិជ្ជកម្មបាន។
ខ្យងហោងលឿងស្រែព្រលែងចិញ្ជឹម
ក្នុងនាមជាអ្នកអនុវត្តផ្ទាល់នូវទម្រង់ “ផលិតពូជខ្យងហោងលឿងស្រែ” បង ង្វៀន ភូតឹន ចែករំលែកថា ដោយលក្ខណៈងាយស្រួលក្នុងការចិញ្ចឹម ស្របទៅនឹងលក្ខណៈចិញ្ជឹមដោយធម្មជាតិ មិនចំណាយថវិកាច្រើន ហើយការថែទាំក៏សាមញ្ញផងដែរ ប្រភពអាហារសំបូរបែប ងាយស្រួលរក ព្រោះខ្យងអ្វីក៏ស៊ី ភាគច្រើនជាបន្លែបៃតងដូចជា ចកល្អិត ត្រកៀត ស្លឹកដំឡូងមី ដំឡូងជ្វា ត្រកួន ផ្លែរនោងចាស់ ត្របែកនិងផ្លែជំពូរទុំជាដើម ដូច្នេះអាចទាញយកប្រយោជន៍ពីអាហារដែលមានស្រាប់នៅក្នុងសួនចំការរបស់អ្នកដើម្បីជួយខ្យងលូតលាស់យ៉ាងឆាប់រហ័ស និងបង្កើតពងបានច្រើន។កូនខ្យងហោងលឿងងាយស្រួលចិញ្ចឹម ស្ទើរតែគ្មានជំងឺ គ្រាន់តែត្រូវការប្រភពទឹកស្អាត និងផ្លាស់ប្តូរទឹកអាងចិញ្ជឹមជាប្រចាំ ហើយឲ្យខ្យងស៊ីអាហារច្រើនប្រភេទ បន្លែ និងមើម ខ្យងនឹងឡើងទម្ងន់យ៉ាងឆាប់រហ័ស។ វាត្រូវចំណាយពេលប្រហែលពី ៤ ទៅ ៤,៥ ខែគឺអាចប្រមូលផលបាន ដោយមានទម្ងន់ជាមធ្យមពី ៣០ ទៅ ៣៥ កូន/គីឡូក្រាម។ បច្ចុប្បន្ននេះ ខ្យងគឺជាមុខម្ហូបដ៏ពេញនិយមរបស់មនុស្សជាច្រើន ដូច្នេះក្បាលចេញមានស្ថិរភាព តម្លៃខ្យងហោងលឿងខ្មៅនៅលើទីផ្សារគឺខ្ពស់ណាស់ ចាប់ពី ៤០ពាន់ទៅ ៦៥ពាន់ដុង/គីឡូក្រាម ប្រសិនបើពងខ្យង និងខ្យងពូជលក់មិនបាន។ យើងអាចចិញ្ជឹមឡើងជាពាណិជ្ជកម្ម។
យោងតាមស្ថានីយ៍ជំរុញកសិកម្មស្រុកចូវភូ ទម្រង់ “ផលិតពូជខ្យងហោងលឿងស្រែ” គឺសមស្រប់ចិញ្ជឹមនៅក្នុងមូលដ្ឋាន ទាញយកអត្ថប្រយោជន៍ពីប្រឡាយដែលមានស្រាប់ និងគ្រួសារដែលមានដីតិចតួចសម្រាប់ផលិត។ ចំណាយដើមទុនតិច ទាញយកអត្ថប្រយោជន៍ពីទំហំអាងតូចៗ ឬប្រឡាយសួនចំការទំនេរ រួមផ្សំនឹងការចិញ្ចឹមខ្យង។ ក្រៅពីនេះ អ្នកចិញ្ជឹមអាចទាញយកអត្ថប្រយោជន៍ពីប្រភពអាហារបៃតងដែលមានស្រាប់ ដើម្បីសន្សំសំចៃលើការចំណាយ។ តាមនិន្នាការអភិវឌ្ឍន៍ ទម្រង់នៃការចិញ្ចឹមខ្យងគួបផ្សំនឹងការដាំដំណាំហូបផ្លែ មិនប្រើប្រាស់ជី ឬសារធាតុគីមី បង្កើតចេញផលិតផលកសិកម្មស្អាត។ ទន្ទឹនិងនោះ ប្រភពស្បៀងសម្រាប់ខ្យងគឺសម្បូរណាស់ហើយងាយស្រួលរក អត្រាខូចខាតទាប ជួយឲ្យមានប្រភពចំណូលសម្រាប់កម្មករទំនេរនៅតាមជនបទ ទន្ទឹមនឹងនោះឆ្លើយតបទៅនឹងតម្រូវការកូនពូជ របស់គ្រួសារចិញ្ចឹមផ្សេងទៀត។ នេះអាចចាត់ទុកថាជាទម្រង់ដ៏មានប្រសិទ្ធភាពមួយសម្រាប់ប្រជាជនក្នុងការជ្រើសរើសអនុវត្ត បើកទូលាយ នាំមកនូវប្រាក់ចំណូលសេដ្ឋកិច្ចគ្រួសារប្រកបដោយស្ថិរភាព រួមចំណែកដល់ការអភិវឌ្ឍន៍សេដ្ឋកិច្ចមូលដ្ឋាន៕
ប្រែ៖ ណារីពៅ