ក្នុងខណពេលដែលមានតម្រូវការលត់ដំសុខភាពនិងស្វែងយល់ពីធម្មជាតិថ្ងៃកាន់តែបានយកចិត្តទុកដាក់ ការដើរលេងកម្សានផ្លូវឆ្ងាយរួមបញ្ចូលនឹងការទទួលបទពិសោធន៍ពីទេសភាពធម្មជាតិកំពុងក្លាយជានិន្នាការទេសចរណ៍ដ៏ទាក់ទាញមួយ។ នៅខេត្តអានយ៉ាង ភ្នំពពាល (ទីរួមខេត្តទិញបៀន)គឺជាចំណុចទៅដល់បានមនុស្សជាច្រើនជ្រើសរើសអាស្រ័យដោយមានភូមិសាស្ត្រសម្បូបែប ទេសភាពស្រស់ស្អាត និងអាកាសធាតុត្រជាក់ត្រជំពេញមួយឆាំ្ន។
ស្ថិតនៅកម្ពស់ជាង ៧០០ ម៉ែត្រធៀបនឹងទឹកសមុទ្រ ភ្នំពពាលត្រូវបានគេចាត់ទុកថាជា "ដំបូលផ្ទះខាងលិច"។ ផ្លូវដើរលេងនៅទីនេះមានប្រវែងពី ៧ គីឡូម៉ែត្រទៅ ១៤ គីឡូម៉ែត្រដែលសមស្របនឹងមុខសញ្ញាជាច្រើនចាប់តាំងពីអ្នកចាប់ផ្តើមដំបូងរហូតដល់អ្នកមានបទពិសោធន៍។ ការធ្វើដំណើរឆ្លងកាត់ទីតាំងដូចជា វាលត្នោត ជ្រោះថាញឡុង ដុបឈើអែម ដុបមមង់ជាដើមបានផ្តល់ឲ្យអ្នកចូលរួមនៅឱកាសលត់ដំកម្លាំងខ្ជាប់ខ្ជួន ស្រូបខ្យល់អាកាសបរិសុទ្ធ និងបន្ធូរសម្ពាធបន្ទាប់ពីថ្ងៃពលកម្ម។
ចំណុចលេចធ្លោមួយនៅពេលដើរលេងកម្សាននៅភ្នំពពាលគឺការទទួលបទពិសោធន៍ប្រមាញពពកនៅពេលព្រឹកព្រលឹម ជាពិសេសចាប់ពីខែមិថុនាដល់ខែកញ្ញា អាកាសធាតុនៅលើភ្នំគឺខុសគ្នាយ៉ាងច្បាស់ធៀបនឹងវាលទំនាបនៅស្រទាប់ពពកពណ៌សរសាត់អណ្តែតនៅចន្លោះភ្នំ និងព្រៃឈើ។ ដើម្បីអាចប្រមាញពពកបានទាន់ពេល អ្នកចូលរួមត្រូវតែចេញដំណើរតាំងពីព្រលឹម ឆ្លងជម្រាលភ្នំ និងផ្លូវលំកាត់តាមព្រៃ។ នៅពេលទៅដល់ចំណុចខ្ពស់ៗ ដូចជាដុបមមង់ តំបន់ក្បែររូបសំណាកព្រះពុទ្ធ Maitreya ឬវត្តវ៉ានលិញ ទិដ្ឋភាពហាក់ដូចជាផ្ទាំងគំនូរពណ៌ទឹក ពពកតែងតែរសាត់តាមជ្រលងភ្នំ គ្របដណ្ដប់ លើជម្រាលភ្នំ ពេលខ្លះរសាត់ទាបអាចប៉ះបានទៀតផង។ ពន្លឺថ្ងៃពេលព្រឹកដ៏ស្រទន់បានជ្រាបចូលទៅក្នុងស្រទាប់ពពកបង្កើតជាទិដ្ឋភាពស្រមើស្រមៃមួយ ធ្វើឲ្យអ្នកដែលបានឃើញសរសើរមិនដាច់ពីមាត់។
លោក យឿងវៀតអាញ អ្នកគ្រប់គ្រងតំបន់ទេសចរណ៍ភ្នំពពាល ចែករំលែកថា៖ “រដូវនេះគឺជាពេលវេលាដ៏ស័ក្តិសមបំផុតសម្រាប់ការដើរលេងកម្សាននៅភ្នំពពាល។ ចាប់តាំងពីពេលព្រឹកព្រលឹម នៅពេលដែលឡើងដល់ពាក់កណ្តាលផ្លូវឡើងភ្នំ អ្នកនឹងអាចមើលឃើញពពករសាត់អណ្តែតមកក្រោមជើងអ្នក។មានអារម្មណ៍ដូចជាអ្នកកំពុងដើរនៅកណ្តាលឋានសួគ៌ ដ៏អស្ចារ្យផងនិងមានភាពក្សេមក្សានផង។ ក្រៅពីនេះ បរិយាកាសនៅពេលវេលានេះដ៏ត្រជាក់ត្រជំ សុខស្រួល និងសមស្របទៅនឹងការដើរកម្សានផងនិងគយគន់ទេសភាពផង។ ចំណុចមួយដែលទាក់ទាញទៀតគឺ នៅពេលដែលអ្នកឆ្លងកាត់ពពកនៅកណ្តាលព្រៃ អ្នកនឹងឃើញធម្មជាតិដូចជាកំពុងនិទានរឿង - ពេលខ្លះលាក់ខ្លួន ពេលខ្លះបង្ហាញ ខ្លួនដូចជាមានវេទមន្តមកបំបាំងភ្នែក។ សម្រាប់ខ្ញុំ ការដើរលេងកម្សាននៅ "រដូវពពក" មិនត្រឹមតែជាដំណើរផ្សងព្រេងប៉ុណ្ណោះទេ ថែមទាំងជាដំណើរព្យាបាល - និងជាកន្លែងដែលខ្ញុំបានស្រូបខ្យល់អាកាសបរិសុទ្ធដើម្បីបន្ធូរអារម្មណ៍នៅកណ្តាលធម្មជាតិ ហើយសំខាន់បំផុតគឺបានរស់នៅនឹងភាពយឺតៗ”។
មិនត្រឹមតែជាឱកាសដើម្បីកត់ត្រាពេលវេលាដ៏មានចំណាប់អារម្មណ៍ជាមួយនឹងម៉ាស៊ីនថត ឬទូរស័ព្ទដៃប៉ុណ្ណោះទេ ការប្រមាញ់ពពកក៏នាំមកនូវអារម្មណ៍ពិសេសក្នុងការសម្រាកលំហែកាយផងដែរ ពោលគឺពេលវេលាស្ងប់ស្ងាត់រវាងព្រះធរនីនិងមេឃផងដែរ ជួយឲ្យមនុស្សដូចជាបាន "បញ្ចូលថាមពលឡើងវិញ" បន្ទាប់ពីថ្ងៃរវល់ការងារ។ "រដូវពពក" ក៏បានភ្ញៀវទេសចរជាច្រើន ចាត់ទុកថា ជាពេលវេលាដ៏ល្អបំផុតក្នុងឆ្នាំដើម្បីស្វែងយល់ពីភ្នំពពាល។ ខ្យល់អាកាសបរិសុទ្ធ សីតុណ្ហភាពត្រជាក់ត្រជំ ទេសភាពផ្លាស់ប្តូរទៅតាមម៉ោងនីមួយក្នុងថ្ងៃធ្វើឲ្យការធ្វើដំណើរកម្សាន្តក្លាយជាអស្ចារ្យ មិនអាចបំភ្លេចបាន និងតែងតែថ្មី សូម្បីតែអ្នកដែលបានទៅទីនោះពីមុននេះក៏ដោយ។
ទៅទន្ទឹមនិងអត្ថប្រយោជន៍អំពីកាយសម្បទា និងស្មារតី សកម្មភាពដើរលេងកម្សានក៏បានរួមចំណែកដល់ការលើកកម្ពស់ការយល់ដឹងជាសហគមន៍អំពីការការពារបរិស្ថានផងដែរ។ គណកម្មការរៀបចំកម្មវិធីដើរលេងកម្សានតែងតែមានរួមបញ្ចូលសារនៃការរស់នៅបៃតង ដោយលើកទឹកចិត្តអ្នកចូលរួមកាត់បន្ថយនៅកាកសំណល់ប្លាស្ទិក និងចូលរួមរើសសំរាមតាមផ្លូវ។ នេះគឺជាវិធីអនុវត្តជាក់ស្តែងដើម្បីថែរក្សាប្រព័ន្ធអេកូឡូស៊ី និងទេសភាពធម្មជាតិនៃតំបន់ទេសចរណ៍ភ្នំពពាល ក្នុងគោលបំណងឆ្ពោះទៅរកការអភិវឌ្ឍន៍ទេសចរណ៍ដោយចីរភាព និងមានភាទទួលខុសត្រូវ។
មិនត្រឹមតែជាសកម្មភាពកីឡានៅខាងក្រៅផ្ទះប៉ុណ្ណោះទេ ការដើរលេងកម្សាននៅភ្នំពពាលក៏បានបើកចេញឱកាសផ្សព្វផ្សាយរូបភាពទេសចរណ៍ខេត្ត អានយ៉ាង ដល់ភ្ញៀវទេសចរក្នុងនិងក្រៅប្រទេសផងដែរ។ ឆ្លងតាមរយៈសកម្មភាពដែលភ្ជាប់ទំនាក់ទំនងយ៉ាងជិតស្និទ្ធជាមួយសហគមន៍ កម្មវិធីនេះរួមចំណែកណែនាំផលិតផល OCOP និងមុខម្ហូបពិសេស ហើយនិងតម្លៃវប្បធម៌ដ៏ពិសេសនៃតំបន់បៃនុយផងដែរ។
បង ផាមវូ - គណៈគ្រប់គ្រងតំបន់ទេសចរណ៍ភ្នំ ពពាល នឹងទាក់ទាញមិត្តយុវវ័យបានឲ្យដឹងថា នៅថ្ងៃទី ២១ ខែមិថុនាខាងមុខ តំបន់ទេសចរណ៍ភ្នំពពាល នឹងទាក់ទាញយុវវ័យ ភ្ញៀវទេសចរ និងអ្នកស្រឡាញ់ធម្មជាតិជាច្រើនមកចូលរួមសកម្មភាពដើរលេងកម្សាន្តនេះ ដោយនាំមកនូវដំណើរកម្សាន្តស្វែងយល់ពោពេញទៅដោយភាពរំភើបនៅចំកណ្តាលធម្មជាតិព្រៃភ្នំនៃ "ដំបូលផ្ទះខាងលិច" អ្នកស្រុក និងភ្ញៀវទេសចរអាចចុះឈ្មោះដោយផ្ទាល់តាមរយៈលេខទូរស័ព្ទក្រុមការងារសេវាកម្មទេសចរណ៍ (0965.799.500) ឬក៏ fanpage "ទេសចរណ៍ភ្នំពពាល"(“Du Lịch Núi Cấm”)។ ការរៀបចំកម្មវិធីដើរលេងកម្សាន នឹងបង្កើតបន្ថែមនូវចំណុចលេចធ្លោសម្រាប់ទេសចរណ៍នៅក្នុងមូលដ្ឋាន ទន្ទឹមនិងនោះទាក់ទាញនូវចំណាប់អារម្មណ៍របស់យុវជន និងអ្នកស្រឡាញ់ធម្មជាតិ។ តាមរយៈនោះ ក្លាយជារចនាប័ទ្មទេសចរណ៍ថ្មីនៅភាគខាងលិច ដោយថាមវន្ត បៃតង និងភ្ជាប់ជាមួយសហគមន៍។
ការដើរលេងនៅភ្នំពពាល មិនត្រឹមតែជាដំណើរកម្សាន្តប៉ុណ្ណោះទេ ថែមទាំងជាដំណើរតភ្ជាប់ជាមួយធម្មជាតិ លើកកម្ពស់សុខភាព និងរួមគ្នាថែរក្សាបរិស្ថាន។ នេះជាទិសដៅស្របតាមនិន្នាការនៃការអភិវឌ្ឍន៍ទេសចរណ៍ទំនើប រួមចំណែកជាវិជ្ជមានទៅក្នុងការអភិវឌ្ឍន៍រួមនៃវិស័យទេសចរណ៍អានយ៉ាង៕
ប្រែ៖ ណារីពៅ
