ថ្ងៃទី ១៣ មិថុនា ក្រុមប្រឹក្សាវាយតម្លៃ និងចាត់ថ្នាក់ផលិតផល OCOP ស្រុកថ្វយសឺន បានបើកកិច្ចប្រជុំវាយតម្លៃ និងចាត់ថ្នាក់ស្នើសុំឲ្យទទួលស្គាល់ផលិតផលចំនួន ៣ ដែលស្ថិតក្រោមកម្មវិធីឃុំមួយផលិតផល OCOP ថ្នាក់ស្រុកមួយលើកទី ៣ ឆ្នាំ ២០២៤។ លោក ផាមថាញ់ឌឿក អនុប្រធានគណៈកម្មាធិការប្រជាជនស្រុក រួមជាមួយសមាជិកក្រុមប្រឹក្សា និងម្ចាស់ផលិតផលបានចូលរួម។
នៅក្នុងកិច្ចប្រជុំ ម្ចាស់ផលិតផលដែលបានចូលរួមក្នុងការវាយតម្លៃ និងរៀបចំណាត់ថ្នាក់ OCOP លើកទី ៣ ឆ្នាំ ២០២៤ បានបង្ហាញយ៉ាងលម្អិតអំពីផលិតផលនិងដំណើរការអនុវត្ត ខ្លឹមសារមួយចំនួនតាមការស្នើសុំរបស់ក្រុមប្រឹក្សា OCOP ឲ្យពិន្ទុ។ ជាក់ស្តែង មានផលិតផលចំនួន៣ រួមមាន៖ ទឹកឃ្មុំ (គ្រួសារអាជីវកម្មទឹកឃ្មុំហុងបា ឃុំមីភូដុង)។ ណែមស្រស់ហុងវី (គ្រួសារអាជីវកម្មផលិតកម្មណែមស្រស់ - ណែមអាំងហុងវី នៅឃុំប៊ិញថាញ់)។ គីមជីស្ពៃបូកគោ (គ្រួសារអាជីវកម្មត្រាន់ជី ឃុំភូធ្វឺន)។
តាមរយៈពិចារណាលើឯកសារ និងនីតិវិធីចុះឈ្មោះរបស់ម្ចាស់ផលិតផល សមាជិកក្រុមប្រឹក្សាបានដំណើរការវិភាគ ពិភាក្សា និងផ្តល់យោបល់ដោយផ្តោតលើលក្ខណៈពិសេសមួយចំនួនលើផលិតផលដូចជា៖ ការវេចខ្ចប់ ពាណិជ្ជសញ្ញា ដំណើរការកែច្នៃនិងវត្ថុធាតុដើម។ល។ ហើយទន្ទឹមនិងនោះ ក៏ដំណើរការឲ្យពិន្ទុរៀបចំណាត់ថ្នាក់ផលិតផល និងផ្តល់មតិកែលម្អលើចំណុចខ្វះខាត ដើម្បីផលិតផលកាន់តែល្អឥតខ្ចោះ។
លទ្ធផល សមាជិកក្រុមប្រឹក្សាបានឯកភាពខ្ពស់ចំពោះផលិតផលទាំង ៣ ថាសម្រេចបានស្តង់ដារ OCOP ផ្កាយ ៣៕
ប្រែ៖ ណារីពៅ