នាព្រឹកថ្ងៃទី ២២ ឧសភា ក្រុមហ៊ុនភាគហ៊ុនបន្លែផ្លែឈើអានយ៉ាង (Antesco) បានសហការជាមួយគណៈកម្មាធិការប្រជាជនស្រុក អានភូ រៀបចំសន្និបាតបូកសរុបរដូវស្វាយកែវរមៀតត្រូវរដូវ និងផែនការសម្រាប់រដូវស្វាយខុសរដូវឆ្នាំ ២០២៤។លោក ត្រាន់ថាញហ៊ីប អនុប្រធានមន្ទីរកសិកម្ម និងអភិវឌ្ឍន៍ជនបទ អានយ៉ាង។ លោកស្រី ង្វៀនធីភឿង អនុប្រធានគណៈកម្មាធិការប្រជាជនស្រុក អានភូ និងលោក ង្វៀនហ្វាងមិញ អគ្គនាយកក្រុមហ៊ុន Antesco បានអញ្ជើញចូលរួម។
ប្រតិភូចូលរួមសន្និបាត
លោក ង្វៀនអានញ៉ាន ប្រធានស្តីទីនៃផ្នែកទិញ និងជាប្រធានការិយាល័យតំបន់ដាំដុះរបស់ក្រុមហ៊ុន Antesco រាយការណ៍សង្ខេបអំពីស្វាយកែវរដូវសម្រក ២០២៣-២០២៤
លោក ត្រាន់ថាញហ៊ីប អនុប្រធានមន្ទីរកសិកម្ម និងអភិវឌ្ឍន៍ជនបទខេត្តអានយ៉ាង តម្រង់ទិសសម្រាប់កិច្ចសហប្រតិបត្តិការនាពេលខាងមុខ
លោក ង្វៀនហ្វាងមិញ អគ្គនាយកក្រុមហ៊ុន Antesco ថ្លែងមតិអំពីការតភ្ជាប់របស់ក្រុមហ៊ុននាពេលខាងមុខ
លោក ង្វៀនហ្វាងមិញ អគ្គនាយកក្រុមហ៊ុន Antesco ផ្តល់អាហារូបករណ៍ដល់សិស្សានុសិស្ស
លោក ង្វៀនហ្វាងមិញ អគ្គនាយកក្រុមហ៊ុន Antesco និងលោកស្រី ង្វៀនធីភឿង អនុប្រធានគណៈកម្មាធិការប្រជាជនស្រុក អានភូ ប្រគល់អំណោយអាហារូបករណ៍ដល់សិស្សានុសិស្ស
លោក ត្រាន់ថាញហ៊ីប អនុប្រធានមន្ទីរកសិកម្ម និងអភិវឌ្ឍន៍ជនបទខេត្ត អានយ៉ាង និងលោក ង្វៀនហ្វីគឿង អគ្គនាយករងក្រុមហ៊ុន Antesco ប្រគល់អំណោយអាហារូបករណ៍ដល់សិស្សានុសិស្ស
លោកស្រី ង្វៀនធីភឿង អនុប្រធានគណៈកម្មាធិការប្រជាជនស្រុក អានភូថ្លែងមតិក្នុងសន្និបាត
ក្នុងរដូវសំខាន់ រដូវសម្រកឆ្នាំ ២០២៣-២០២៤ ក្រុមហ៊ុន Antesco សហការជាមួយសហករណ៍សេវាកម្មកសិកម្ម ភូធិញអានខាញ់ (ស្រុក អានភូ) និងកសិករនៅតាមស្រុកផលិត និងប្រើប្រាស់ស្វាយកែវរមៀត ស្វាយខ្ទិះ និងស្វាយល្ហួតសម្រកបៃតង ស្វាយគ្រាប់សំប៉ែត នៅលើផ្ទៃដី ១.១៦០ ហិកតា ទិន្នផលសម្រេចបាន ២៩.០០០តោន (ក្នុងនោះស្រុកអានភូ ៥.០០០ តោន នៅសេសសល់ក្នុងតំបន់ផ្សេង) ទិន្នផលលើសពីផែនការ ៤.០០០ តោន។ ទន្ទឹមនឹងនោះ កសាងតំបន់វត្ថុធាតុដើមសម្រាប់ផលិតស្វាយកែវតាមស្តង់ដារ GlobalGAP លើផ្ទៃដី ១៨០ ហិកតា នៅក្នុងឃុំចំនួន ២ គឺខាញ់អាន និង ភូហ៊ឺវ (ស្រុក អានភូ)។
ក្រុមហ៊ុន Antesco សហការជាមួយសហករណ៍សេវាកម្មកសិកម្ម ភូធិញអានខាញ់ ដើម្បីបង្កើតតំបន់វត្ថុធាតុដើមស្វាយកែវសម្រាប់កែច្នៃ។តាមរយៈនោះ ជំរុញការតភ្ជាប់រវាងការផលិត និងការប្រើប្រាស់ផលិតផលស្វាយតាមខ្សែចង្វាក់តម្លៃ ជាពិសេសគឺនាំចេញទៅកាន់ទីផ្សារដែលមានភាពខ្លាំងប្រកួតប្រជែងខ្ពស់តាមរយៈការចុះហត្ថលេខាលើកិច្ចសន្យាប្រើប្រាស់។
ស្វាយខុសរដូវឆ្នាំ ២០២៤ ចាប់ពីពេលនេះរហូតដល់ដំណាច់ឆ្នាំ ២០២៤ ក្រុមហ៊ុន Antesco បន្តតភ្ជាប់កសិករផលិត និងប្រើប្រាស់ស្វាយលើផ្ទៃដី ៣០០ហិកតានៅស្រុក អានភូ ទីក្រុងទីរួមខេត្តតឹនចូវ និងតំបន់ផ្សេងៗទៀត។ បរិមាណផលប្រហែល ៧.៥០០តោន។
“ក្រុមហ៊ុន Antesco នឹងបន្តលើកកម្ពស់ការតភ្ជាប់ជាមួយកសិករដែលមានផ្ទៃដីធំជាង និងតម្លៃមានស្ថិរភាពជាង ដើម្បីបងប្អូនកសិករមានអារម្មណ៍សុវត្ថិភាពក្នុងផលិតកម្ម និងលើកកម្ពស់ទីតាំង និងតម្លៃស្វាយកែវ របស់តំបន់ដីអានយ៉ាងនៅលើទីផ្សារពិភពលោក” លោកស្រី ង្វៀនធីភឿង អគ្គក្រុមហ៊ុនAntesco បានចែករំលែក។
យោងតាមលោកស្រី ង្វៀនធីភឿង អនុប្រធានគណៈកម្មាធិការប្រជាជនស្រុក អានភូ ស្រុកទាំងមូលមានដំណាំហូបផ្លែចំនួន ២.០៤៨ ហិកតា ដោយឡែកទំហំផ្ទៃដីដាំស្វាយតភ្ជាប់ ១.៩៥០ ហិកតា។ បរិមាណផលជាមធ្យមគឺពី ៤០-៧០តោន/ហិកតា/ឆ្នាំ។ ប្រមូលផ្តុំច្រើនបំផុតនៅក្នុងឃុំចំនួន ៦ គឺ ខាញ់ប៊ិញ ខាញ់អាន ឡុងប៊ិញ ញឺនហូយ ក្វុកថៃ និងភូហ៊ឺវ។ ស្រុកផ្តល់អាទិភាពក្នុងការអញ្ជើញធុរកិច្ចអនុវត្តការតភ្ជាប់ផលិតកម្ម និងគាំទ្របច្ចេកទេស រួមចំណែកបង្កើនផលិតភាព និងគុណភាពផលិតផលស្វាយ។
ថ្លែងមតិក្នុងសន្និបាត លោក ត្រាន់ថាញហ៊ីប អនុប្រធានមន្ទីរកសិកម្ម និងអភិវឌ្ឍន៍ជនបទខេត្តអានយ៉ាង បានវាយតម្លៃខ្ពស់ចំពោះការអនុវត្តតភ្ជាប់ផលិតកម្ម និងការប្រើប្រាស់ស្វាយរវាងក្រុមហ៊ុន សហករណ៍ និងអាជ្ញាធរមូលដ្ឋាន។ទន្ទឹមនឹងនោះ ក៏ស្នើដល់មូលដ្ឋានឲ្យបន្តយកចិត្តទុកដាក់ គាំទ្រ និងបង្កលក្ខណៈសម្រាប់ក្រុមហ៊ុន Antesco ក្នុងការអនុវត្តការតភ្ជាប់ផលិតកម្ម-ការប្រើប្រាស់ស្វាយកែវ នៅក្នុងតំបន់នេះ។ រីឯខាងក្រុមហ៊ុនវិញចាំបាច់ត្រូវតែផ្សព្វផ្សាយអនុវត្តការតភ្ជាប់ជាមួយផលិតផលផ្សេងទៀតដូចជា៖ ពោតយកផ្លែខ្ចី និងសណ្ដែកសៀងបន្លែ។
ក្នុងឱកាសនេះ ក្រុមហ៊ុនភាគហ៊ុនបន្លែផ្លែឈើអានយ៉ាង (Antesco) បានប្រគល់អំណោយអាហារូបករណ៍ចំនួន ២០០ចំណែកដល់សិស្សបឋមសិក្សា និងមធ្យមសិក្សាដែលមានស្ថានភាពលំបាក សិក្សាល្អនៅស្រុកអានភូ ដោយមានតម្លៃសរុប ១០០ លានដុង ដើម្បីឧបត្ថម្ភដល់កុមារនៅការចំណាយមួយ ផ្នែកក្នុងការសិក្សា៕
ប្រែ៖ ណារីពៅ